PREZIDENT SAYLOVI KARANTIN QOIDALARIGA AMAL QILINGAN HOLDA OʻTKAZILADI

Joriy yilning 24-oktyabr kuni mamlakatimizda muhim siyosiy jarayon – Oʻzbekiston Respublikasi Prezidenti saylovi boʻlib oʻtadi.

Saylov – bu fuqarolarning Konstitutsiyada belgilangan asosiy huquqi hisoblanadi. Saylovda oʻn sakkiz yoshga toʻlgan Oʻzbekiston Respublikasi fuqarolari ishtirok etish huquqiga ega.

Saylovchilar bu boradagi huquqlarini amalga oshirish jarayonida Saylov Kodeksi va Markaziy saylov komissiyasining 2021-yil 25-avgust kungi Qarori bilan tasdiqlangan “Oʻzbekiston Respublikasi Prezidenti saylovini oʻtkazishda koronavirus infektsiyasi (COVID-19) tarqalishining oldini olish boʻyicha Yoʻriqnoma”da belgilangan qoidalarga amal qilishlari kerak.

Ovoz berish 24-oktyabr kuni 8:00 dan 20:00 ga qadar oʻtkaziladi. Ovoz berish vaqti va oʻrni haqida uchastka saylov komissiyasi saylovchilarni saylovdan kamida oʻn kun oldin xabardor etadi. Saylovchilarni ovoz berish joyi va vaqti haqida xabardor qilish qoʻshimcha ravishda ommaviy axborot vositalari, axborot-kommunikatsiya texnologiyalari va targʻibot materiallari yordamida amalga oshirilishi mumkin.

Oʻzbekiston Respublikasining chet eldagi diplomatik hamda boshqa vakolatxonalarida tuzilgan saylov uchastkalarida ovoz berish saylov kuni ushbu saylov uchastkalari joylashgan yerdagi mahalliy vaqt bilan 8:00 dan 20:00 ga qadar amalga oshiriladi.

Saylovchi ovoz berish binosiga kelganida uning tana harorati oʻlchanadi va qoʻliga antiseptik suyuqligi sepiladi, himoya niqobi boʻlmagan saylovchiga niqob beriladi va binoga kiritiladi. Saylovchi oraliq masofani saqlagan holda oʻzining shaxsini tasdiqlovchi hujjatining tegishli betini ochadi va uchastka saylov komissiyasini ushbu hujjat bilan kontaktsiz tanishishiga imkoniyat yaratib, saylovchilar roʻyxatiga imzo qoʻyadi. Shundan soʻng, unga saylov byulleteni beriladi.

Saylovchi tibbiy qoʻlqop kiygan holda roʻyxatga imzo qoʻyishi, saylov byulletenini olishi, ovoz berish kabinasi (xonasi)da saylov byulletenini toʻldirishi hamda kabinada bir daqiqadan ortiq boʻlmasligi tavsiya etiladi. Qandaydir sababga koʻra tizimga familiyasi kirmay qolgan saylovchilarning familiyalari – shaxsi, fuqaroligi va yashash joyini tasdiqlovchi hujjat asosida saylovchilar roʻyxati ilovasiga kiritiladi.

Saylovchi saylov byulletenini olgach, uni yashirin ovoz berish kabinasida toʻldiradi. Oldingi saylovlardan farqli turda joriy yilgi saylovda yashirin ovoz berish kabinalariga parda osilmaydi. Saylov byulletenini toʻldirish chogʻida ovoz beruvchi shaxsdan boshqa shaxslarning hozir boʻlishi taʼqiqlanadi.

Saylov byulletenini mustaqil ravishda toʻldirish imkoniyatiga ega boʻlmagan saylovchi oʻz xohishiga koʻra yashirin ovoz berish kabinasiga yoki xonasiga boshqa shaxsni taklif qilishga haqli, bundan saylov komissiyasi tarkibiga kiradigan shaxslar, kuzatuvchilar va ommaviy axborot vositalari vakillari mustasno.

Saylovchi oʻzi yoqlab ovoz berayotgan nomzodning fa-miliyasi roʻparasida, oʻng tomonda joylashgan boʻsh kvadratga «+» yoki «P» yoxud «x» belgisini qoʻyadi. Ovoz beruvchi toʻldirilgan saylov byulletenini saylov qutisiga tashlaydi. Buzib qoʻyilgan saylov byulleteni saylovchining iltimosiga koʻra yangisiga almashtirilishi mumkin.

Eslatib oʻtamiz, saylovchilar saylov byulletenidagi faqatgina bir nomzodga ovoz berishi kerak. Sababi ovoz berish vaqtida xato belgilangan saylov byulletenlari haqiqiy emas deb topiladi. Saylovchi saylovchilar roʻyxatiga imzo qoʻyishda, saylov byulletenini olishda, yashirin ovoz berish kabinasida saylov byulletenini toʻldirishda tibbiy qoʻlqopda boʻlishi, yashirin ovoz berish kabinasida bir daqiqadan ortiq boʻlmasligi tavsiya etiladi.

Saylovchilar va saylov jarayoni boshqa ishtirokchilarining tana harorati 37 daraja va undan yuqori boʻlgan taqdirda ular ovoz berish xonasiga kiritilmaydi.

Bunda, tana harorati 37 daraja va undan yuqori boʻlgan saylovchilar uchun alohida ajratilgan joylarda ikki nafar uchastka saylov komissiyasi aʼzosi hozirligida koʻchma saylov qutilari va kabinalaridan foydalangan holda yashirin ovoz berish huquqi taʼminlanadi.

Koronavirus infektsiyasidan uy sharoitida davolanayotgan saylovchining yashash joyida ovoz berishi tashkil etiladi.

Saylov Kodeksiga koʻra, agarda saylovchi 2021-yil 24-oktyabr kuni oʻzi yashaydigan joyda boʻlish imkoniyatiga ega boʻlmagan holda muddatidan oldin ovoz berishi, agarda sogʻligi holatiga yoki boshqa sabablarga koʻra ovoz berish binosiga kela olmasa, turgan joyida ovoz berish huquqiga ega.

Jamshid Bekimbetov, tuman Adliya boʻlimi bosh maslahatchisi.