Ehtiyojmand aholi xonadonlariga koʻmir tarqatildi

Soʻnggi oylarda butun mamlakatimiz boʻylab hududlarda kuz-qish mavsumiga tayyorgarlik ishlari amalga oshirildi. Mavsumni betalofat oʻtkazish maqsadida kommunal sohaga dahldor xizmatlarning ish sifati va samaradorligini oshirish boʻyicha zarur choralar koʻrildi. Xususan, aholini tabiiy gaz va elektr energiyasi bilan uzluksiz taʼminlash maqsadida kommunal soha tashkilotlari xodimlari mavsum oldidan belgilangan chora-tadbirlar rejasiga muvofiq qator ishlarni amalga oshirdilar.

Amudaryo tumanida ham 2021-2022-yillarda kuz-qish mavsumiga tayyorgarlik koʻrish boʻyicha tizimli ishlar tashkil qilindi. Barcha ijtimoy soha obektlari, umumtaʼlim maktablari, maktabgacha taʼlim muassasalari, sogʻliqni saqlash sohasi obʼektlari, koʻp qavatli turar joy binolaridagi mavjud kamchiliklar aniqlanib, ularni oʻz vaqtida bartaraf qilish yuzasidan qurilish-taʼmirlash hamda obodonlashtirish ishlari tashkil etildi.

Kuz-qish mavsumida aholining issiqlik va elektr energiyalarga boʻlgan talabi va ehtiyoji yanada ortadi. Mavsumga tayyorgarlik borasida olib borilgan tizimli ishlar natijasida aholini issiqlik energiyasi hamda elektr energiyasi bilan uzluksiz taʼminlashda mavjud muammolarni bartaraf qilishga hamda bu borada yuzaga kelishi mumkin boʻlgan salbiy holatlarning oldini olishga alohida eʼtibor qaratildi.

Tumanda 2021-2022-yil kuz-qish mavsumiga tayyorgarlik koʻrish maqsadida aholini hamda ijtimoiy soha obʼektlarini koʻmir bilan taʼminlash borasidagi ishlar ham rejali tarzda amalga oshirilmoqda. Xususan, tumanda aholiga 9963 tonna koʻmir yetkazib berish boʻyicha reja belgilangan boʻlib, joriy yilning 20-oktyabr holatiga jami 6465 tonna koʻmir mahsuloti aholi xonadonlariga tarqatilgan. Ayni paytda reja asosida koʻmir mahsulotlarini aholi xonadonlariga tarqatish ishlari davom ettirilmoqda.

Shuningdek, pandemiya sharoitida tumandagi kam taʼminlangan, ehtiyojmand oilalarni yanada qoʻllab-quvvatlash hamda ularning kuz-qish mavsumini betalofat oʻtkazishlariga amaliy yordam berish borasida ham qator ishlar qilinmoqda. Tuman hokimligi tashabbusi bilan tumandagi ovul va mahallalarda istiqomat qiluvchi ijtimoiy yordamga muhtoj, kam taʼminlangan, boquvchisini yoʻqotgan, ehtiyojmand oilalar, yakka-yolgʻiz keksalar, moddiy koʻmakka muhtoj oilalar yanada qoʻllab-quvvatlanib, kuz-qish mavsumida issiqlik energiyasi bilan bogʻliq muammolarga duch kelishlarining oldini olish maqsadida ehtiyojmand oilalarga koʻmir mahsulotlari tarqatildi.

Tumandagi barcha ijtimoiy soha obʼektlariga kuz-qish mavsumi uchun koʻmir yetkazib berish boʻyicha ham amaliy ishlar olib borilmoqda. Xususan,  ijtimoiy soha obʼektlariga jami 3088 tonna koʻmir yetkazib berish rejalashtirilgan boʻlib, 20-oktyabr holatiga reja 81,5 foizga bajarilgan, yaʼni 2516 tonna koʻmir tarqatilgan.

Shundan tuman Xalq taʼlimi boʻlimiga 1675 tonna, Tibbiyot birlashmasiga 260 tonna, Maktabgacha taʼlim boʻlimiga 525 tonna, kasb-hunar maktablariga 56 tonna, madaniyat obʼektlariga 72 tonna koʻmir tarqatilgan.

Tumandagi aholi xonadonlari hamda ijtimoiy soha obʼektlariga tarqatilgan koʻmir jami 8981 tonna boʻlib, bu boradagi reja 68,8 foizga bajarilgan. Kuz-qish mavsumini betalofat oʻtkazish borasidagi bu kabi samarali ishlar davom ettirilmoqda.

Tuman hokimligining Axborot xizmati.