Tuman boʻyicha 24 ming 993 ta xonadon suyultirilgan gaz bilan uzluksiz taʼminlanmoqda

Ayni kunlarda butun mamlakatimizda boʻlgani kabi Amudaryo tumanida ham aholini kuz-qish mavsumida aholi va ulgurji isteʼmolchilarni issiqlik va elektr energiyasi bilan uzluksiz taʼminlash borasida samarali ishlar olib borilmoqda.

Tuman aholisini asosiy issiqlik energiyasi manbayi hisoblangan tabiiy gaz hamda suyultirilgan gaz bilan taʼminlash borasida “Hududgaz Qoraqalpogʻiston” filiali “Amudartumangaz” gaz taʼminoti boʻlimi tizimli faoliyat olib bormoqda.

Tumanda jami 38 ming 849 xonadon boʻlib, shundan 13 ming 856 xonadon tabiiy gaz bilan gazlashtirilgan,  24  ming 993 ta xonadon suyultirilgan gazdan foydalanadi. Tumandagi barcha tabiiy gaz isteʼmolchilariga 5 ta gaz taqsimlash punktlari orqali tabiiy gaz yetkazib berilmoqda. Ulardan ikkitasi Tosh yop ovulida, qolganlari Toʻlqin, Nazarxon ovullari hamda Beshtom mahallasida joylashgan. Bugungi kunda foydalanishda 407 km gaz tarmoqlari boʻlib, shundan 53,5 km yuqori bosimli, 65,3 km oʻrta bosimli va 288,9 km past bosimli gaz tarmoqlaridir. Tabiiy gaz yetkazib beruvchi gaz quvurlarining 15,8 km qismi yer ostida va 392 km qismi yer ustida joylashgan.

Tumanda jami suyultirilgan gazdan foydalanuvchi 24 ming 993 ta xonadon mavjud boʻlib, shundan 12 ming 947 xonadon tabiiy gaz yetib bormagan, 12 ming 46 xonadon esa tabiy gaz yetmasligi sababli suyultirilgan gazga moslashtirilgan.

2021-yil 1-iyundan suyultirilgan gaz ballonlarni tarqatish ID kartalar orqali amalga oshirilishi boshlangan boʻlib, hozirda tumanimizdagi suyultirilgan gazdan foydalanuvchi xonadonlarga ID karta tarkatish ishlari davom etmoqda va jami aylanmadagi 27 ming 982 dona ijara ballonlari, 12 ming 19 dona aholi oʻz hisobidagi gaz ballonlariga stikerlar yopishtirilgan.

Tuman aholisini suyultirilgan gaz bilan taʼminlashda gaz tarqatish shoxobchalari faoliyati tashkil etilgan boʻlib, shoxobchalardan uzoq hududlarda yashovchi xonadonlarga maxsus transport vositalari yordamida suyultirilgan gaz ballonlari yetkazib berilmoqda.

Shuningdek, tuman buyicha jami 39 ta maktabgacha taʼlim muassasalari suyultirilgan gaz bilan taʼminlanib kelinayotgan boʻlib, joriy yilning 30-oktyabr holatiga suyultirilgan gaz boʻyicha belgilangan limit 3 ming 477 tonna boʻlib, shundan 3 ming 222 tonna suyultirilgan gaz olib kelinib, aholiga tarqatilgan. Tuman aholisiga ijaraga jami 27 ming 982 dona yangi maishiy gaz ballonlari tarqatilgan boʻlib, joriy yilning 30-oktyabr holatiga 821 dona yangi gaz ballonlari ijaraga tarqatilgan.

“Hududgaz Qoraqalpogʻiston” filiali “Amudartumangaz”gaz taʼminoti boʻlimi tuman aholisi oʻrtasida is gazi va tabiiy gazdan zaharlanish, gaz-havo aralashmasining chaqnashi oqibatida portlash va yongʻinlar kelib chiqishi kabi favqulodda vaziyatlarning oldini olish borasida tushuntirish-targʻibot ishlarini olib bormoqdalar. Targʻibot tadbirlarini tashkil etishda tuman hokimligi masʼul xodimlari, tuman Favqulodda vaziyatlar boʻlimi xodimlari, tuman Elektr tarmoqlari korxonasi xodimlari bilan hamkorlik qilinib, koʻpchilik aholi vakillari jalb etilmoqda.

J.Yermetov, “Amudaryotumangaz” gaz taʼminot boʻlimi boshligʻi.