“Bugun elimiz tinchligining qadriga yetaylik!” mavzusida davra suhbati oʻtkazildi

3-oktyabr kuni Amudaryo tumani Xalq taʼlimi boʻlimiga qarashli 82-sonli umumtaʼlim maktabida yoshlarni jalb qilgan holda “Bugun elimiz tinchligining qadriga yetaylik!” mavzusida davra suhbati oʻtkazildi.

Tumanimiz yoshlari bilan uchrashish hamda ular bilan dildan suhbat qurish maqsadida tashrif buyurgan Qoraqalpogʻiston Respublikasi Vazirlar Kengashi raisi oʻrinbosari Rustam Saparbayev, Oʻzbekiston Respublikasi Vazirlar Mahkamasi huziridagi Din ishlari boʻyicha qoʻmitaning Qoraqalpogʻiston Respublikasi boshqarmasi bosh mutaxassisi Nurulla Jamalov, Din ishlari boʻyicha qoʻmitaning Qoraqalpogʻiston Respublikasi boshqarmasi yetakchi mutaxassisi Bayramgul Ayimbetovalar, shuningdek, tuman hokimi Sultonboy Yoʻldashev, hokim oʻrinbosari Mahmud Shermetov hamda qator masʼullar maktabda tashkil etilgan tumanimizdagi yosh ijodkorlarning ijod mahsullari, qoʻl mehnatlari namunalaridan iborat koʻrgazmani tomosha qildilar.

Shundan soʻng yoshlar bilan mavzu yuzasidan suhbat tashkil etilib, unda soʻzga chiqqan Qoraqalpogʻiston Respublikasi Vazirlar Kengashi raisi oʻrinbosari Rustam Saparbayev tinchlik Alloh taoloning bizlarga bergan neʼmatlari ichida eng ulugʻi ekanligi, uni asrab-avaylash, tinchlik va osoyishtalikning qadriga yetish, tinch va osuda hayotimizga, xotirjam otayotgan har bir tongimizga shukrona keltirish lozimligi, bunday dorilomon kunlarga yetish oson boʻlmagani, yer yuzida necha minglab insonlar hayotining har bir daqiqasini yuragida qoʻrquv, hadik bilan oʻtkazayotgani xususida soʻz yuritdi.

Taʼkidlanganidek, bugungi kunda butun yer yuzida koʻplab davlatlar oʻrtasidagi oʻzaro urushlar ularning taraqqiy etishi va rivojlanishini ortda qoldirmoqa. Hozirgi tahlikali davrda tinch va osoyishta hayotimizni saqlab qolish, tinchligimizni asrash har bir kishining muqaddas burchi hisoblanadi. Vatan tinch boʻlsa, yashash uchun eng qulay maskan hisoblanadi. Tinchlik boʻlsa, insonlarning hayoti farovon boʻladi. Bu neʼmat davomli boʻlishi uchun esa, uning sabablari, uni tutib turuvchi omillari yaʼni oʻzaro ishonch, mehr-muruvvat, shukronalik, adolatli boʻlish, zulm va xiyonat qilmaslik kabi fazilatli xislatlarga ham eʼtiborli boʻlish lozim.

Davra suhbatida Oʻzbekiston Respublikasi Vazirlar Mahkamasi huziridagi Din ishlari boʻyicha qoʻmitaning Qoraqalpogʻiston Respublikasi boshqarmasi bosh mutaxassisi Nurulla Jamalov soʻzga chiqib,  har bir inson oʻz maqsadi yoʻlida doimo harakat qilishi, orzu va maqsadlarning, ezgu niyatlarning roʻyobga chiqishi uchun esa tinchlik va osoyishtalik eng zaruriy omil ekanligini taʼkidlab, oiladagi xotirjamlik insonning ish samaradorligini oshirishga, oila mustahkamligiga asos boʻlsa, yurtdagi tinchlik mamlakat taraqqiyotiga, farovonligiga zamin yaratishini qayd etib oʻtdi.

Tumanimiz yoshlari bilan tashkil etilgan mazkur uchrashuv doirasida “Bugun elimiz tinchligining qadriga yetaylik!” mavzusida insholar tanlovi oʻtkazildi. Insholar tanlovi tumandagi barcha umumtaʼlim maktablari yuqori sinf oʻquvchilari oʻrtasida boʻlib oʻtdi. Tanlovda har bir maktabdan bir nafardan oʻquvchi ishtirok etdi.

Aytish kerakki, mazkur insholar tanlovi yoshlarning tinchlik va uning qadriga yetish borasidagi fikr-mulohazalarini, ularning bu boradagi bilimlari qay darajada ekanligini, tinchlik haqidagi dunyoqarashlarini yaqindan oʻrganish maqsadida tashkil etilib, yoshlar mavzu yuzasidan bor bilim va tasavvurlarini qogʻozga tushirdilar.  Juda qiziqarli tarzda oʻtgan insholar tanlovining yakuniy natijalarga koʻra 62-sonli maktabning 10-sinf oʻquvchisi Shahlo Quralovaning yozgan inshosi eng oliy oʻringa loyiq deya topildi. Tanlovning 2-oʻrni 40-sonli maktabning 11-sinf oʻquvchisi Durdona Yoʻldashevaga, 3-oʻrin 67-sonli maktabning 11-sinf oʻquvchisi Dilnoza Xudoyorovaga nasib qildi.

Tadbir yakunida insholar tanlovi gʻoliblari masʼullar tomonidan turli badiiy kitoblar jamlanmasi hamda esdalik sovgʻalari bilan taqdirlandilar.

Tuman hokimligining Axborot xizmati.