Olmazor va Gulzor mahallalari hududidagi yoʻllarda qurilish-taʼmirlash ishlari olib borildi

Maʼlumki, 2020-yilning 11-noyabr sanasida Oʻzbekiston Respublikasi Prezidentining Qoraqalpogʻiston Respublikasining mavjud ijtimoiy-iqtisodiy, shu jumladan ishlab chiqarish va investitsiya salohiyatidan samarali foydalanish, hududda muhandislik-kommunikatsiya, ijtimoiy va ishlab chiqarish infratuzilmalarini yaxshilash, iqtisodiyot tarmoqlarini barqaror rivojlantirish, shu asosda aholi bandligini taʼminlash va turmush darajasini oshirish maqsadida “2020 — 2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirish chora-tadbirlari toʻgʻrisida”gi qarori qabul qilingan edi.

Mazkur qarorda 2020 — 2023-yillarda Qoraqalpogʻiston Respublikasini kompleks ijtimoiy-iqtisodiy rivojlantirishning ustuvor yoʻnalishlari belgilanib, ulardan biri boʻlgan muhandislik-kommunikatsiya va yoʻl-transport infratuzilmasini rivojlantirish sohasida qator vazifalar belgilab berildi.

Amudaryo tumanida bu boradagi vazifalar ijrosini taʼminlash, xususan, yoʻl-transport infratuzulmasini rivojlantirish maqsadida tizimli ishlar amalga oshirilmoqda. Xususan, tumandagi Olmazor va Gulzor mahallasi hududlariga salomatlik yoʻlakchasini qurish boʻyicha 7,1 km uzunlikdagi velosiped va piyodalar yoʻlakchasini hamda 1,6 km uzunlikdagi avtomobil yoʻliga asfalt qoplamasini yotqizish ishlari rejalashtirilgan boʻlib, ushbu calomatlik yoʻlakchasini qurish ishlari pudratchi tashkilot “Jayhun yoʻl qurilish” MChJ tomonidan olib borilmoqda.

Hozirda mazkur pudratchi tashkilot tomonidan Olmazor va Gulzor mahallasi hududlariga 5 km uzunlikda velosiped va piyodalar yoʻlakchasi  qurilishi oʻz nihoyasiga yetkazilgan boʻlib, 1,6 km uzunlikdagi avtomobil yoʻliga asfalt qoplamasi yotqizilgan. Olmazor va Gulzor mahallalari hududidagi Barkamol avlod koʻchasi shaharning markaziy koʻchalaridan biri boʻlib, ushbu koʻchadan oʻtuvchi yoʻlning taʼmirlanishi hamda asfalt qoplamasi yotqizilishi, hudud aholisi, piyodalar va avtomobil boshqaruvchilari uchun katta qulayliklar yaratdi.

Ushbu koʻchada tumandagi qator maktabgacha taʼlim muassasalari, 82-sonli umumtaʼlim maktabi, Xotira maydoni va Istirohat bogʻi, tuman Fuqarolik holati dalolatnomalarini yozish boʻlimi binosi joylashgan boʻlib, piyodalar va transport vositalari eng koʻp harakatlanishlarni amalga oshiradigan hudud hisoblanadi. Hududdagi yoʻl ancha taʼmirtalab holga kelib qolganligi sababli aholi vakillari hamda transport vositalari boshqaruvchilari uchun qator noqulayliklarni keltirib chiqarayotgan edi.

Yoʻlning taʼmirlanganligi hamda velosiped va piyodalar yoʻlakchasining qurilgani markaziy koʻchada kelib chiqishi mumkin boʻlgan salbiy holatlarning, transport vositalari, piyodalar bilan sodir etilishi mumkin boʻgan nohush holatlarning oldi olindi.

Shu oʻrinda maʼlumot tariqasida aytish kerakki, joriy yilda tumandagi taʼmirtalab holga kelib qolgan yoʻllarni taʼmirlash boʻyicha tizimli ishlar amalga oshirildi. Tumandagi jami 14 ta mahallalar hududlarida loyiha qiymati 9 mlrd. 432,7 mln soʻm boʻlgan 41,235 km ichki yoʻllarni taʼmirlash ishlari rejalashtirilgan. Ushbu rejani amalga oshirish boʻyicha pudratchi tashkilotlar tomonidan 7 mlrd. 787,4 mln.soʻm mablagʻ hisobidan 5,252 km ichki yoʻllarga asfalt qoplamasi va 35,91 km ichki yoʻllarga tosh yotqizish ishlari bajarilgan.

Tuman hokimligining Axborot xizmati.