FIZIKA FANI BILIMDONLARI ANIQLANDI

Oʻzbekiston Respublikasi Prezidentining 2021-yil 19-martdagi “Fizika sohasidagi taʼlim sifatini oshirish va ilmiy tadqiqotlarni rivojlantirish chora-tadbirlari toʻgʻrisida”gi Qarorining 1-ilovasi bilan tasdiqlangan “Kompleks chora-tadbirlar dasturi”ning 14-15-bandlarida Davlat va nodavlat taʼlim tashkilotlari bilan hamkorlikda fizika fani boʻyicha tanlovlar va musobaqalar tashkil etish vazifasi yuklangan.

Dasturda belgilangan vazifalarning ijrosini taʼminlash maqsadida “Umumiy oʻrta taʼlim muassasalari oʻquvchilari oʻrtasida fizika fanidan tanlovlar va musobaqalarni tashkil etish toʻgʻrisida” Taʼlim sifatini nazorat qilish davlat inspeksiyasi hamda Xalq taʼlimi vazirligining qoʻshma Qarori tasdiqlangan. Unga koʻra, Xalq taʼlimi vazirligi va nodavlat taʼlim tashkilotlari bilan hamkorlikda umumiy oʻrta taʼlim muassasalarining 7-8 va 9-10-sinflar oʻquvchilari oʻrtasida fizika fanidan tanlovlar va musobaqalarni oʻtkazish rejalashtirilgan.

Ushbu belgilangan vazifalarning ijrosini taʼminlash maqsadida Amudaryo tumani Xalq taʼlimi boʻlimiga qarashli umumiy oʻrta taʼlim muassasalarining 7-8 va 9-10-sinflar oʻquvchilari oʻrtasida 38-sonli umumtaʼlim maktabida fizika fanidan tanlov boʻlib oʻtdi.

Avvalo, tanlov oʻtkaziladigan xonalar fizika faniga oid koʻrgazmali vositalar bilan jihozlandi. Tanlov  ishtirokchilari yoshi va qaysi sinfdaligiga muvofiq alohida guruhlar tuzildi. Tanlovning ishonchli va shaffof oʻtkazilishini taʼminlash maqsadida  tanlovning oʻtishini tajribali fizika fani oʻqituvchilaridan iborat masʼul hayʼat aʼzolari sinchkovlik bilan kuzatib bordilar.

Shaffoflik asosida,  doʻstona vaziyatda oʻtkazilgan tanlovda oʻquvchilar fizika faniga oid savollarga javob berdilar, maktab dasturi doirasidagi masalalarni yechdilar hamda nazariy bilimlarini laboratoriya mashgʻulotlari orqali amaliy ifoda etdilar.

Nihoyatda doʻstona va samimiy ruhda oʻtgan fizika fani boʻyicha tanlovda haqiqiy fizika bilimdonlari aniqlandi.

Tanlov natijlariga koʻra, 7-8-sinf oʻquvchilari orasida 1-oʻrinni 14-sonli maktabning 8-sinf oʻquvchisi Araylim Tajiboyeva, 2-oʻrinni 32-sonli maktabning 8-sinf oʻquvchisi Jasurbek Umarov, 3-oʻrinni 12-sonli maktabning 8-sinf oʻquvchisi Ixlosbek Bozorboyev, hamda 9-10-sinf oʻquvchilari orasida esa 1-oʻrinni 40-sonli maktabning 9-sinf oʻquvchisi Sevinch Jabborberganova, 2-oʻrinni 56-sonli maktabning 10-sinf oʻquvchisi Sherali Karimov, 3-oʻrinni 18-maktabning 10-sinf oʻquvchisi Jasurbek Toʻliboyev egalladilar va gʻoliblar tanlovning Qoraqalpogʻiston Respublikasi bosqichida qatnashish uchun yoʻllanmani qoʻlga kiritdilar.

Robiya YOʻLDOShEVA.