AMUDARYo TUMANIDA XALQARO BAGʻRIKENGLIK KUNI KENG NIShONLANDI

Xalqaro YuNESKO tashkiloti dunyoda tinchlik, dinlar va konfessiyalararo muloqotni oʻrnatish, millatlar va elatlar oʻrtasida hamkorlikni rivojlantirish borasida bir qator ishlar amalga oshirilib, hozirda bagʻrikenglikka oid 70 dan ziyod xalqaro hujjatlar qabul qilingan. 1995-yil 16-noyabrda Parijda YuNESKO Bosh konferentsiyasida “Bagʻrikenglik tamoyillari Deklaratsiyasi” qabul qilingan. Hozirgi kunda 16-noyabr – Xalqaro  bagʻrikenglik kuni sifatida keng nishonlanadi.

Mustaqil Oʻzbekistonimizda tinchlik, osoyishtalik, osuda hayotning qadr-qimmati hamisha yuksak. Mamlakatimizda xilma-xil diniy eʼtiqodga mansub millatlarning bir xil buyuk gʻoya va sof niyatlarning roʻyobi yoʻlida hamkor, hamjihatlikda, tinch-totuv yashayotganlarining oʻzi diniy bagʻrikenglikning yorqin namunasidir.

Bugungi kunda Oʻzbekistonda yashayotgan 136 ta millat vakillari 16 ta turli konfessiyaga eʼtiqod qilishadi va dinlararo, konfessiyalararo  mustahkam aloqa, samimiy doʻstlik oʻrnatilgan.

Joriy yilning 17-noyabr sanasida tuman Madaniyat markazida Xalqaro bagʻrikenglik kuni munosabati bilan boʻlib oʻtgan maʼnaviy-maʼrifiy, adabiy-musiqiy  tadbirda mutasaddi tashkilotlar rahbarlari mamlakatimiz xalqiga xos rang-baranglik, millatlararo va dinlararo doʻstlik, bagʻrikenglik tamoyillari, ana shu tamoyillar asosida tobora ravnaq topayotgan mustaqil davlatimiz hamda millatlar va elatlar oʻrtasidagi samimiy  doʻstlik, totuvlik haqida mamnuniyat bilan soʻz yuritdilar. Shu bilan birga tumanimiz mahallalarida yashab, Amudaryo tumanini ijtimoiy-iqtisodiy rivojlantirishga oʻzlarining munosib hissalarini qoʻshayotgan turli millat  vakillarini Xalqaro bagʻrikenglik kuni munosabati bilan tabrikladilar.

Darvoqe, ayni paytda Amudaryo tumanida 13 millat vakillari ahil-inoq yashab, mehnat qilishmoqda. Ularning farzandlari yaxshi taʼlim-tarbiya olishlari, oʻz ona tillarida emin-erkin soʻzlashishlari uchun tumanda zarur shart-sharoitlar yaratilgan. Xususan, tumanda oʻqish oʻzbek qozoq, rus, turkman, qoraqalpoq tillarida olib boriladigan maktablar boʻlib, ushbu taʼlim-tarbiya maskanlari zamonaviy pedagogik texnologiyalar bilan jihozlangan.

Tumanning  barcha hududlarida xalqimizning emin-erkin oʻz diniy eʼtiqodlarini amalga oshirishlari uchun esa diniy-islomiy talablar darajasidagi masjidlar faoliyati yoʻlga qoʻyilgan.

Xalqaro bagʻrikenglik kuni munosabati bilan boʻlib oʻtgan bayramona tadbirda mutasaddilar buni alohida eʼtirof etishdi.

Tadbirning adabiy-musiqiy qismida tuman Madaniyat boʻlimi sanʼatkorlari tomonidan tayyorlangan kontsert dasturi namoyish etildi. Oʻzbekiston Respublikasi Konstitutsiyasida belgilab qoʻyilgan huquq va imkoniyatlardan foydalanib, mustaqil Vatanimizning har tomonlama taraqqiy etishiga munosib hissalarini qoʻshib kelayotgan barcha millat va elat vakillari bilan bagʻrikeng diyorda yashayotganliklaridan mamnunlik tuygʻulari madh etilgan kuy va qoʻshiqlar yangradi.

“Oʻzbekiston – bagʻrikeng diyor” deb nomlangan maʼnaviy-maʼrifiy va adabiy-musiqiy tadbirda doʻstlik va tinchlikni, millatlararo totuvlik va bagʻrikenglikni ifodalovchi jarangdor sheʼrlar oʻqildi.

“Bu muqaddas Vatanda azizdir inson!” shiori ostida biri-biridan mazmundor taronalar yangradi. Oʻzbek, qozoq, qoraqalpoq, rus, tatar, boshqird xalqlarining koʻngillarda ezgu tuygʻular uygʻotuvchi kuy-qoʻshiqlari, raqslari ijro etilib, tadbir ishtirokchilari qalblariga xush kayfiyat bagʻishladi.

Robiya YOʻLDOShEVA.