PROKURATURA XODIMLARI MAKTABDA OChIQ DARS OʻTKAZIShDI

Oʻzbekiston Respublikasida prokuratura organlari tashkil etilganiga kelgusi yilda 30-yil toʻladi. Shu munosabat bilan joylarda turli tadbirlar tashkil etilmoqda.

 27-noyabr kuni tumandagi 40-sonli umumtaʼlim maktabida «Oʻzbekistonda prokuratura organlarining shakllanish tarixi» mavzusida ochiq dars oʻtkazildi. Ochiq dars Amudaryo tuman prokuraturasi tergovchisi Janibek Kurbanov hamda prokuror yordamchisi Abbaz Niyazimbetov tomonidan tashkil etildi.

Ochiq darsda prokuratura organlarining shakllanish tarixi, asosiy yoʻnalishlari, vazifalari, bugungi kunda olib borayotgan faoliyati toʻgʻrisida soʻz yuritildi.

Taʼkidlanganidek, mustaqilligimizning dastlabki kunlaridan boshlab, milliy davlatchiligimizni tiklash, davlat tuzilmalarini tashkil etish hamda sud-huquq tizimini isloh qilishga kirishildi. Bunda asosiy eʼtibor huquqni muhofaza qiluvchi idoralar, jumladan, prokuratura organlarini sobiq Ittifoq boʻysunuvidan chiqarib, mustaqil Oʻzbekistonning milliy davlat organlari sifatida qayta tashkil etishga qaratildi. Bu saʼy-harakatlar natijasida 1992-yil 8-yanvarda Oʻzbekiston Respublikasi Prezidentining “Oʻzbekiston Respublikasi prokuratura organlari toʻgʻrisida“gi Farmoni qabul qilindi hamda sobiq Ittifoq qaramogʻidagi Oʻzbekiston SSR prokuraturasi mustaqil Oʻzbekiston prokuraturasiga aylantirildi. Oʻtgan davrlar mobaynida prokuratura organlarining faoliyati islohotlarga hamohang tarzda takomillashtirib borildi.

Ochiq dars davomida prokuratura masʼullari oʻquvchilarga davlatimiz rahbari Shavkat Mirziyoyev asos solgan taraqqiyotimizning yangi bosqichida ham jamiyatda adolatni qaror toptirish, qonuniylikni mustahkamlash hamda inson huquqlarini himoya qilish boʻyicha keng qamrovli va misli koʻrilmagan islohotlar amalga oshirilayotgani, soʻnggi uch yilda prokuratura organlari faoliyati bilan bogʻliq 20 ga yaqin qonun, farmon, qaror va farmoyish qabul qilingani, Prezidentimiz tomonidan 2016-yil 19-dekabrda Oʻzbekiston Respublikasining “Oʻzbekiston Respublikasi prokuratura organlari xodimlari kunini belgilash toʻgʻrisida”gi qonuni imzolangani, bu haqdagi qonun Yurtboshimizning Prezident sifatida imzolagan birinchi qonuni ekanligini soʻzlab berishdi. Muhtaram Prezidentimiz 2016-yil 19-dekabr kuni prokuratura xodimlari uchun muhim tarixiy sanaga asos solgani, 8-yanvar sanasi – Oʻzbekiston Respublikasi prokuratura organlari   xodimlari   kuni” deb belgilanganini eʼtirof etishdi.

Undan tashqari, prokuratura organlari tomonidan jamiyatda qonuniylikni mustahkamlash, qonun ustuvorligini taʼminlash, jinoyat va huquqbuzarliklarning oldini olish, umuman, barcha yoʻnalishlarda salmoqli ishlar qilinayotgani va muhim natijalarga erishilayotganiga keng toʻxtalib oʻtishdi. Hozirgi paytda prokuratura organlarida jismoniy va yuridik shaxslarning murojaatlari uzluksiz ishlaydigan “Call centr” markazining qisqa raqamli “1007” ishonch telefoni orqali qabul qilinayotganligi, “pm.gov.uz” internet sayti orqali ham onlayn rejimda prokuratura organlariga murojaat etish mumkinligini qayd etishdi.

Ochiq darsda oʻquvchi-yoshlarni qiziqtirgan savollarga batafsil javoblar berildi.

Abbaz Niyazimbetov, tuman prokurori yordamchisi.