IJTIMOIY SOHADAGI DAVLAT XIZMATLARIDAN FOYDALANING!!!

Mamlakatimizda keksalar va nogironligi boʻlgan shaxslarga eʼtibor qaratish, ijtimoiy sohani yanada rivojlantirish maqsadida  Oʻzbekiston Respublikasi Vazirlar Mahkamasining 2021-yil 19-noyabr knugi “Aholiga sanatoriylarda davolanish uchun yoʻllanmalar berish sohasiga axborot-texnologiyalarini joriy etish toʻgʻrisida”gi 693-sonli qarori qabul qilindi.

Qaror bilan keksalar va nogironligi boʻlgan shaxslarga sanatoriylarda davolanish uchun yoʻllanmalar berish boʻyicha davlat xizmatlari koʻrsatishning maʼmuriy reglamenti, keksalar va nogironligi boʻlgan shaxslarga Davlat xizmatlari markazlari orqali sanatoriylarda davolanish uchun yoʻllanmalarni berish boʻyicha davlat xizmati koʻrsatish tartibi, keksalar va nogironligi boʻlgan shaxslar yoki ularning vakillari tomonidan sanatoriylarda davolanish uchun yoʻllanmalarni berish boʻyicha davlat xizmatidan foydalanish tartibi, keksalar va nogironligi boʻlgan shaxslarga Davlat xizmatlari markazlari orqali sanatoriylarda davolanish uchun yoʻllanmalarni taqsimlash tartibi tasdiqlandi.

2022-yil 1-iyuldan boshlab ushbu qaror bilan tasdiqlangan maʼmuriy reglamentga muvofiq keksalar va nogironligi boʻlgan shaxslarga Davlat xizmatlari markazlari orqali sanatoriylarda davolanish uchun yoʻllanmalar berish boʻyicha davlat xizmatidan foydalanish uchun jismoniy shaxslar faqat Davlat xizmatlari markazlari yoki Oʻzbekiston Respublikasi Yagona interaktiv davlat xizmatlari portali orqali murojaat qiladilar.

Yoʻllanmalar Oʻzbekiston Respublikasi Tibbiy-ijtimoiy xizmatlarni rivojlantirish agentligi tizimidagi keksalar, nogironligi boʻlgan shaxslar, urush va mehnat faxriylari uchun sanatoriylarga beriladi.

Yoʻllanmalarni berish davriyligi (birlamchi murojaat etganlar bundan mustasno) quyidagilardan iborat boʻladi:

a) har yili — navbat asosida:

urush nogironlariga tenglashtirilgan shaxslarga;

respublika ahamiyatiga molik shaxsiy pensiya oluvchi shaxslar;

Chernobil AES halokati oqibatida nurlanish kasalligiga chalingan va uni boshidan kechirgan shaxslar, shuningdek, Chernobil AES halokati sababli nogiron boʻlib qolgan shaxslarga;

yadro poligonlari va boshqa radiatsiya-yadro obʼektlarida harbiy xizmatni oʻtagan pensiya yoshidagi shaxslarga;

oʻzgalar parvarishiga muhtoj boʻlgan yolgʻiz keksalarga;

b) ikki yilda bir marotaba — navbat asosida:

urush qatnashchilariga tenglashtirilgan shaxslarga;

halok boʻlgan harbiy xizmatchilarning yangi nikohdan oʻtmagan beva xotinlariga (beva erlariga);

I va II guruh nogironligi boʻlgan shaxslarga, koʻzi ojiz I guruh nogironini kuzatib boruvchi shaxsga;

v) uch yilda bir marotaba — navbat asosida yoshga doir pensiya oluvchilarga.

Davlat xizmatidan foydalanish uchun Keksalar va nogironligi boʻlgan shaxslar yoki ularning vakillari Davlat xizmatlari markazlariga kelib murojaat etadilar yoki davlat xizmatidan elektron tarzda foydalanish uchun Yagona interaktiv davlat xizmatlari portalida roʻyxatdan oʻtadilar.

Keksalar va nogironligi boʻlgan shaxslar oʻzlari yoki vakillari kelib murojaat etgan taqdirda, Davlat xizmatlari markazi xodimi keksalar va nogironligi boʻlgan shaxslar nomidan, Yagona interaktiv davlat xizmatlari portalida orqali murojaat etgan taqdirda esa — mustaqil tarzda soʻrovnomani elektron ravishda toʻldiradilar.

Soʻrovnomaga quyidagi hujjatlar ilova qilinadi:

imtiyozdan foydalanish huquqini beruvchi hujjat (pensiya guvohnomasi, mavjud boʻlsa, ushbu Reglamentning 4-bandida nazarda tutilgan holatlarni tasdiqlovchi hujjatlar) nusxasi;

tibbiy maʼlumotnoma (davolovchi shifokor tomonidan beriladigan sanatoriy-sogʻlomlashtirish tavsiya etiladigan maʼlumotnoma).

Mansur Sadikov, Tuman Davlat xizmatlari markazi direktori