Diniy qadriyatlarimiz toptalgan QORA KUNLAR
Hammamiz yaxshi bilamizki, muqaddas islom dinimiz asrlar davomida butun dunyo xalqlarini mehr-oqibatli, xayr-saxovatli, boʻlishga undab kelgan. Ayniqsa, muqaddas dinimizda inson xotirasiga alohida hurmat bilan qaraladi. Vaholanki, sobiq ittifoq davrida ana shunday insonparvar, xalqparvar va adolatpesha dinimizni eskilik sarqiti, xurofot deb baholab, xalqimizni imon-eʼtiqodidan mahrum qilishga ochiqdan-ochiq urinishlar boʻlgani ayni haqiqat. Sobiq tuzum mafkurasi mayyitlarni qabrga qoʻyishdan oldin jamoat oldida yuzini ochib qoʻyib, mitinglar oʻtkazib, tobut ustida diniy maʼrifatga zid maʼruzalar (janoza emas!) oʻqib, mayyitlarning ruhlarini chirqiratib, dafn marosimlari oʻtkazishga millatimizni majburlashgacha borib yetdilar. Ana shunday ruscha mitinglar, dafn marosimlari Mangʻit shahrining "Besh gujum” dahasida, tumanimizning koʻpchilik ovullarida ham oʻtkazilganini koʻpchilik biladi. Bundan tashqari, masjidlarga tegishli mulklar musodara etilib, sotuvga chiqarib yuborildi, oʻtgan asrning 20-30-yillarida "Kurashchan xudosizlar ittifoqi" degan uyushma, Toshkent shahrida dinga qarshi targʻibot muzeylari faoliyat olib borardi.
Bu nimani bildiradi?
Albatta, bu - birinchidan, diniy-axloqiy, maʼnaviy-maʼrifiy qadriyatlarimiz, urf-odatlarimizni kamsitish boʻlsa, ikkinchidan, millatni erkidan, imon-eʼtiqodidan mahrum manqurtlarga aylantirishga oshkora urinish edi.
Diniy bayramlar – qurbon hayiti va ramazon hayitlari azal-azaldan xalqimizni mehr-muruvvat, oʻzaro oqibat, imon-eʼtiqod, xayr-saxovat tamoyillariga sadoqat tuygʻulari ila birlashtirib kelgan muborak sanalarki, aynan ana shu bayram kunlarida insonlar gina-kuduratlarni unutib, bir-birlariga yaxshi, samimiy tilaklar tilagan holda maʼnan birlashadilar. Dinimizning kamsitilishi – xalqimizning ana shu asrlar osha shakllangan maʼnaviy birlik kamolotiga qarshi qaratilgan xuruj boʻldi.
Ming shukurki, 23-yildan beri hur va ozodmiz. Vijdon va eʼtiqod erkinligi, diniy qadriyatlarga hurmat va sadoqat tamoyillari Konstitutsiyamiz orqali mustahkam kafolatlangan. Atrofimizdagi goʻzallikka, erkinlikka, oʻzgarishlarga, xalqimizning ahilligi va birodarligiga, hayotimizdagi toʻkin-sochinlikka shukronalar aytaman. Ilohim, barchalarimizni Yaratganning oʻzi qoʻllab, rushdu hidoyatga boshlasin, koʻngillarimizni imon nuri bilan munavvar aylasin.
Abdurahmon Abdukarimov,
"Qarshili xoʻja” jomʼe masjidi imom-xatibi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
