DXX ChEGARA QOʻShINLARIGA QARAShLI HARBIY QISM ZOBITLARI YoShLAR BILAN UChRAShDI

Yoshlarni harbiy vatanparvarlik ruhida tarbiyalash, ayniqsa, harbiy sohaga qiziquvchi yoshlar bilan ularning orzulari, oʻz oldlariga qoʻygan  ezgu maqsadlarini amalga oshirishlari yoʻlidagi intilishlarini qoʻllab-quvvatlash maqsadida  9202-sonli harbiy qism zobitlari tomonidan tez-tez uchrashuvlar, samimiy muloqot tadbirlarini oʻtkazish anʼanaga aylangan.

Ayniqsa, Amudaryo tumanining chegara hududlarida istiqomat qiluvchi yoshlar oʻrtasida oʻtkazilayotgan bu kabi tadbirlar turli xil huquqbuzarliklar va jinoyatchilikning oldini olishda muhim ahamiyat kasb etmoqda.

Qilichboy madaniyat markazida boʻlib oʻtgan ana shunday tadbirlardan biri “Osoyishta hayot, xotirjam va tinch mahalla!” shiori ostida qiziqarli taassurotlarga boy tarzda oʻtkazildi.

Qilichboy  mavzesidagi ovul va mahallalarda istiqomat qiluvchi yoshlar bilan uchrashuv tadbirida Davlat xavfsizlik xizmati Chegara qoʻshinlariga qarashli 9202-sonli harbiy qism komandiri, podpolkovlik O.Narzullayev, 9202-sonli harbiy qism komandirining oʻrinbosari S.Toshmatov, Amudaryo tumani  Ichki ishlar boʻlimi xodimi, kapitan Bahodir Allanazarov, Davlat xavfsizlik xizmati Chegara qoʻshinlari qoʻmondonligi tomonidan tashakkurnoma olgan Dilafroʻz Ismoilova, OʻzYoI Amudaryo tumani Kengashi raisi Sardor Ismoilov, Afgʻoniston urushi ishtirokchisi, sobiq baynalmilal jangchi Hamro Safarboyev, Amudaryo tuman Xalq taʼlimi boʻlimining maʼnaviy-maʼrifiy tarbiya ishlari boʻyicha boʻlim boshligʻi Zafar Abdullayev hamda “Moʻʼtabar Ayol” koʻkrak nishoni sohibasi Amina ona Yusupovalar ishtirok etdilar.

Yoshlar bilan uchrashuv tadbirida Davlat xavfsizlik xizmati Chegara qoʻshinlariga qarashli 9202-sonli harbiy qism komandiri, podpolkovnik O.Narzullayev mamlakatimiz Qurolli kuchlarining kuch-qudrati, zamonaviy harbiy texnikalar xususida soʻz yuritib, Milliy Armiyamizni yanada takomillashtirish, uni dunyodagi qudratli  armiyalar safiga qoʻshish bugungi yoshlarga bogʻliq ekanligini, buning uchun zamonaviy harbiy bilimlarni puxta egallash, xorijiy tillarni mukammal darajada oʻrganish zarurligini taʼkidladi. Shu bilan birga, har tomonlama, ham jismoniy, ham aqliy jihatdan barkamol yigitlargina Milliy Armiyamiz zobitlari boʻlishga munosibligini, buning uchun, eng avvalo, oʻzi tugʻilib-oʻsgan zaminga cheksiz mehrmuhabbat qoʻyishi, Vatanning har bir qarich yerini muqaddas deb bilishi zarurligini, bugungi Qurolli Kuchlar safiga aynan ana shunday salohiyatli yoshlar tanlab olinishini misollar tariqasida yoshlarga batafsil tushuntirdi.

Shuningdek, uchrashuv tadbirida soʻzga chiqqanlar yoshlar oʻrtasida huquqbuzarliklarning oldini olish, oilalar mustahkamligini taʼminlash, bugungiday tinch, osuda hayotning qadriga yetib, ahil-inoqlikda yashash inson uchun eng ulugʻ baxt ekanligini aytishib, yoshlarni halol va fidoyi mehnat qilib, biri-biriga hurmat va ehtirom koʻrsatib yashashga daʼvat etdilar.

Oʻz navbatida yoshlar ham soʻzga chiqishib, oʻz orzulari haqida gapirdilar. Shu bilan birga, harbiy sohaga oid oʻzlarini qiziqtirgan savollar bilan murojaat qildilar. Yoshlar tomonidan  havola etilgan barcha savollarga masʼullar batafsil javob berdilar.

Robiya YOʻLDOShEVA.