Yangi yil bayrami oldidan dehqon bozorlarida oziq-ovqat mahsulotlari xavfsizligini taʼminlashga doir targʻibot ishlari olib borilmoqda

Polizlarda yoz boʻyi yetilgan turli meva, sabzavotlar yo quritib, yo bankalarga joylab qish fasli uchun isteʼmolga tayyorlanadi. Bu inson hayoti uchun koni foyda mevalar, sabzavotlar qishga uy sharoitida gʻamlanganida baʼzan bodring, pomidor tuzlamalari, ikralar xavfsizlik qoidalariga amal qilinmasa hayot uchun xavfli mahsulotga  aylanishi ham mumkin.

Shuningdek, savdo shoxobchalarida sotilayotgan buningdek mahsulotlarning sifatiga ham eʼtibor qaratish zarur.

Shu yilning 13-dekabrida tumanimiz markazi hududida joylashgan umumiy ovqatlanish, savdo shoxobchalari, maktabgacha taʼlim muassasalarida oziq-ovqat mahsulotlarini saqlash, tashish, sotish qoidalariga rioya qilinishi yaʼni ovqatdan zaharlanish - botulizm kasalligining oldini olish boʻyicha targʻibot-tashviqot tushuntirish ishlari olib borildi. Ovqatdan zaharlanish - tarkibida organizm uchun zaharli moddalar boʻlgan ovqatni isteʼmol qilganda rivojlanadigan kasallik hisoblanadi. Ovqatdan zaharlanish ichida eng koʻp uchraydigani botulizm  kasalligidir.

Botulizm – oʻtkir yuqumli ovqatdan zaharlanish kasalligi boʻlib, oshqozon-ichak, markaziy nerv sistemasi, yurak qon tomir tizimini zararlash bilan kechadi.

Botulizm kasalligi uy sharoitida tayyorlangan pomidor, bodring, patisson marinadi, baqlajon ikrasi va boshqa konserva, oziq-ovqat mahsulotlarini isteʼmol qilish natijasida yuzaga kelishi mumkin.

Kasallikka chalingan bemorda holsizlanish, koʻngil aynishi, qayd qilish, ogʻiz qurishi, koʻrishning xiralashishi, buyumlarning ikkita boʻlib koʻrinishi, koʻz qovogʻining osilishi, ovoz boʻgʻilishi kabi shikoyatlar kuzatiladi. Bunday hollarda bemor darhol shifokorga murojaat qilishi, davo muolajalarini olishi lozim.

Kasallikning oldini olishda fuqarolar - isteʼmolchilar doʻkonlardan konserva mahsulotlarini xarid qilish paytida mahsulotning muvofiqlik sertifikatini soʻrashi, mahsulotni ishlab chiqargan korxonaning nomi, sanasi, yaroqlilik muddatini koʻrib, isteʼmolga yaroqli ekanligiga ishonch hosil qilib xarid qilishlari kerak. Har bir inson oʻz hayoti uchun eng avvalo oʻzi javobgar ekanligini anglab yetishlari lozim. Yaʼni, ovqatdan zaharlanish, botulizm kasalligiga chalinmaslikka ham har kim oʻzi intilishi kerak.

Botulizm kasalligining oldini olishga qaratilgan targʻibot tadbirlarida tuman Sanitariya epidemiologiya osoyishtaligi va jamoat salomatligi boʻlimining sanitariya va gigiyena boʻlimi mudiri Durbek Bobojonov oziq-ovqat mahsulotlari savdo doʻkonlarida sotuvchilarga, doʻkonga kelgan xaridorlarga bu haqda keng tushunchalar berdi.

Inson hayoti aziz. Uy sharoitida tayyorlangan korserva mahsulotlari, oziq-ovqat doʻkonlarida muddati oʻtib ketgan yo yaxshi saqlanmagan oziq-ovqat mahsuloti baʼzan inson sogʻligʻi buzilishiga, hayoti xavf ostida qolishiga sababchi boʻlishi mumkin.

Shu jihatdan qaraganda buningdek targʻibot tadbirlarining ahamiyati juda katta.

O.RAJABOVA.