65-sonli maktabda “Tarixiy xotirasiz kelajak yoʻq” mavzusida maʼnaviy-maʼrifiy tadbir oʻtkazildi

65-sonli umumtaʼlim maktabida “Tarixiy xotirasiz kelajak yoʻq” mavzusida  maʼnaviy-maʼrifiy tadbir oʻtkazildi. Tadbirda nafaqat oʻquvchi-yoshlar, balki tadbir mehmonlari boʻlgan maktab ota-onalar qoʻmitasi aʼzolari hamda maktab pedagogika jamoasi ham xalqimizning teran tarixiy ildizlari, yuksak maʼnaviyati, milliy-madaniy qadriyatlari buyuk va betakrorligidan yana bir bora faxrlandilar.

Ijtimoiy fanlar oyligi doirasida oʻtkazilgan mazkur tadbirni maktabning ijtimoiy fanlar boʻyicha uslubbirlashma rahbari Omongul Jumaboyeva ochdi va maktabda ijtimoiy fanlar oyligi doirasida fan oʻqituvchilari tomonidan amalga oshirilgan ishlar, biri-birini takrorlamaydigan namunali ochiq darslar, sinflararo bellashuvlar va ularning ijobiy natijalari haqida batafsil toʻxtalib oʻtdi.

Shundan soʻng, maktabning 5-sinfidan 11-sinfigacha barcha oʻquvchilari ishtirokida ulugʻ tarixiy siymolar yaratgan buyuk kashfiyotlar, Oʻzbekiston zaminida tugʻilib, dunyoning turli mamlakatlariga betakror maʼnaviyat, ilm-irfon nurlarini taratgan, dunyo  tamadduniga oʻz ilmiy, badiiy asarlari, yirik kashfiyotlari bilan juda katta hissa qoʻshgan bobokalonlarimiz hayoti va ijodiy faoliyati aks ettirilgan koʻrgazma namoyish etildi.

Xususan, oʻquvchi-yoshlar buyuk allomalar Al-Xorazmiy, Imom Buxoriy, Al-Beruniy, Abu Ali Ibn Sino, Amir Temur siymolarini gavdalantirdilar. Xorazmiyning matematik kashfiyotlari, Buxoriy hadislari, Beruniy tomonidan kashf etilgan jugʻrofiy aniqliklar,  Abu Ali Ibn Sinoning dunyo tibbiyoti sohasiga qoʻshgan ulkan hissasi, Amir Temur hazratlari tomonidan bunyod etilgan buyuk davlatchilik tarixi xususida soʻz yuritishib, ulugʻ ajdodlarimizning bebaho tarixiy, madaniy va ilmiy, maʼnaviy merosiga ehtirom koʻrsatdilar.

Tadbir davomida Qoʻqon adabiy muhiti namoyondalari Uvaysiy, Nodira, Anbar otinlarning betakror adabiy merosi haqidagi oʻquvchi-yoshlarning maʼruzalari, kichik sahna koʻrinishlari tadbir ishtirokchilarida katta taassurot qoldirdi. Oʻquvchilar Uvaysiy va Nodira, Anbar otin gʻazallaridan oʻqidilar. Bu nodir asarlarning bugungi kunda ham oʻz qadr-qimmatini yoʻqotmaganini, tarbiyaviy ahamiyatini oʻz chiqishlari orqali ifodalab berdilar.

Tadbirning adabiy-musiqiy qismida 7-sinf oʻquvchi-qizlari “Oʻzbekiston” qoʻshigʻiga raqsga tushdilar va “Oʻtror fojeasi”ni aks ettiruvchi sahna koʻrinishini namoyish etib, oʻzbek xalqining Chingizxon qoʻshinlariga qarshi olib borgan tarixiy kurashini koʻrsatib berdilar.

Shuningdek, 6-sinf oʻquvchilari tomonidan sahnalashtirilgan “Ajdodlar” raqsi, 10-sinf oʻquvchilari tomonidan tayyorlangan Amir Temurning yoshligini ifodalovchi kichik sahna koʻrinishi tadbirga yanada goʻzal maʼnaviy ruh bagʻishladi.

“Tarixiy xotirasiz kelajak yoʻq” deb nomlangan ijtimoiy fanlar oyligi doirasida tashkil etilgan mazkur tadbir ajdodlar xotirasiga hurmat va ehtirom tuygʻularini yanada mustahkamladi.

Robiya YOʻLDOShEVA.