HARBIY VATANPARVARLIK – YuRTGA MUHABBAT VA BURChGA SADOQAT

Har qanday davlat oʻz istiqbolini sogʻlom va barkamol avlod timsolida koʻradi. Aksariyat rivojlangan mamlakatlarda yoshlarni vatanparvarlik ruhida tarbiyalash maqsadidagi koʻplab jamoatchilik tashkilotlari tashkil etilgan. Mamlakatimizda ham yoshlarni vatanparvarlik ruhida tarbiyalashda katta ahamiyatga ega boʻlgan mudofaaga koʻmaklashuvchi “Vatanparvar” tashkiloti faoliyat yuritib kelmoqda.
Tashkilot tomonidan yosh avlodni harbiy vatanparvarlik ruhida tarbiyalash borasida izchil saʼy-harakatlar olib borilib, asosan uch yoʻnalishdagi faoliyat yoʻlga qoʻyilgan. Birinchi yoʻnalish − aholi, ayniqsa, yoshlarni Vatanga sadoqat, harbiy-vatanparvarlik, milliy maʼnaviyatimizga hurmat ruhida tarbiyalashdir. Tashkilotning ikkinchi yoʻnalishi − yoshlarni tashkilot tizimidagi avtokross, motokross, karting, triatlon, duatlon, yozgi biatlon, pnevmatik quroldan oʻq otish, dengiz koʻpkurashi, harbiy-amaliy koʻpkurash, xizmatchi itlar, aviamodel, raketamodel, kemamodel, radiosport kabi sportning texnik va amaliy turlariga jalb etish, ular orasida sogʻlom turmush tarzini targʻib qilish hisoblanadi. Tashkilotimizning uchinchi yoʻnalishi esa fuqarolarni ommaviy texnik kasblarga tayyorlash hisoblanadi.
Tashkilotimizda ushbu yoʻnalishlar boʻyicha amaliy ishlar yoʻlga qoʻyilgan boʻlib, turli sport musobaqalari ham oʻtkazilib kelinmoqda. Bu borada tuman hokimligi, Yoshlar ishlari agentligi tuman boʻlimi,  Milliy gvardiyaning qoʻriqlash xizmati, tuman Ichki ishlar boʻlimi va boshqa tashkilotlar bilan hamkorlikda “Shunqorlar”, “Havo miltigʻida oʻq otish” va “Yozgi biatlon” harbiy sport musobaqalari muntazam ravishda tashkil etiladi. Shu kabi musobaqalarda gʻolib boʻlgan jamoalar Respublika bosqichida qatnashish imkoniyatiga ega boʻlishmoqda.
Tashkilot tomonidan yoshlarni harbiy vatanparvarlik ruhida tarbiyalash maqsadida turli uchrashuv va davra suhbatlari, targʻibot tadbirlari ham tashkil etilib, vatanparvarlikning timsoli boʻlgan ajdodlarimizning jasorati va jangovar taktikasi haqida soʻzlab beriladi. Shuningdek, Vatan uchun jonini fido qilgan, xizmat burchini bajarish chogʻida mardlarcha halok boʻlgan harbiy xizmatchilarning jasorati namuna qilib koʻrsatilib, yoshlar qalbida burchga sadoqat, yurtga muhabbat tuygʻulari mustahkamlab boriladi.
Xulosa oʻrnida shuni aytish kerakki, yoshlarda Vatanga daxldorlik hissini kuchaytirish, Vatanni sevish va asrash tuygʻularini shakllantirish bugungi kunda eng asosiy vazifalardan sanaladi. Biz mana shunday sharafli va masʼuliyatli vazifani bajarayotganimizdan, yoshlarning vatanparvar insonlar boʻlib voyaga yetishlariga hissa qoʻshayotganimizdan faxrlanamiz.

Shuhrat KAMOLOV, Mudofaaga koʻmaklashuvchi “Vatanparvar” tashkiloti

tuman oʻquv-sport texnika klubi boshligʻi.