Xalq deputatlari Amudaryo tuman Kengashining navbatdagi 45-sessiyasi toʻgʻrisida axborot
2022-yil 21-yanvar kuni Xalq deputatlari Amudaryo tuman Kengashining navbatdagi 45-sessiyasi boʻlib oʻtdi. Sessiya majlisida tuman hokimi Sultonboy Yoʻldashev, tuman Kengashi deputatlari, sektor rahbarlari, tuman hokimi oʻrinbosarlari, hokimlik masʼul xodimlari, huquq-tartibot organlari masʼullari, boʻlimlar, tijorat banklari rahbarlari, fuqarolarning oʻzini oʻzi boshqarish organlari raislari hamda ommaviy axborot vositalari vakillari ishtirok etdilar.
Sessiyani tuman hokimi, xalq deputatlari tuman Kengashi raisi Sultonboy Yoʻldashev kirish soʻzi bilan ochdi va olib bordi.
Sessiyada dastlab tuman darajasidagi davlat organlari va tashkilotlarining norma ijodkorligi va huquqni qoʻllash amaliyoti holatini oʻrganish toʻgʻrisida tuman Adliya boʻlimi boshligʻi Moʻminjon Matyusupovning axboroti tinglandi.
Axborotda keltirilishicha, idora va tashkilot rahbarlari fuqarolarning murojaatlari bilan ishlashda va xodimlarning mehnat huquqlariga rioya qilishda yoʻl qoʻyilgan qonunbuzilish holatlari sababli tuman Adliya boʻlimi tomonidan maʼmuriy javobgarlikka tortish yuzasidan 2021-yilda 12 ta taklif berilgan.
Boʻlim tomonidan 2021-yil davomida jami 65 ta idora va tashkilotlarda 21 ta oʻrganish va 47 ta monitoringlar oʻtkazilgan. Eʼtiborlisi, oʻtkazilgan oʻrganish va monitoringlar davomida jami 7830 ta qonun buzilish holatlari aniqlangan.
Shundan soʻng “Sudlar tomonidan fuqarolar huquqlari va erkinliklarini, korxonalar, muassasalar va tashkilotlarning huquqlari hamda qonun bilan qoʻriqlanadigan manfaatlarini himoya qilish hamda odil sudlovni amalga oshirishga doir 2021-yildagi faoliyati toʻgʻrisida”gi masala koʻrib chiqildi. Jinoyat ishlari boʻyicha Amudaryo tuman sudi raisi Jasur Oʻrazbayev kun tartibidagi masala boʻyicha axborot berdi.
Axborotda oʻtgan yil davomida koʻrib chiqilgan jinoyat ishlari va huquqbuzarliklar profilaktikasi boʻyicha amalga oshirilgan ishlar yuzasidan batafsil maʼlumotlar berildi.
Shuningdek sessiya ishida “Oʻzbekiston Respublikasi Prezidentining Amudaryo tumanidagi Xalq qabulxonasining 2021-yil davomida tumanni kompleks ijtimoiy-iqtisodiy rivojlantirish boʻyicha sektorlar va hududdagi tashkilotlar rahbarlari faoliyati, murojaatlar bilan ishlash holati yuzasidan axboroti toʻgʻrisida”gi masala ham koʻrib chiqildi. Mazkur masala yuzasidan tuman Xalq qabulxonasi mudiri Erkin Rajapovning axboroti tinglandi.
Axborotda qayd etilganidek, 2021-yil davomida tuman Xalq qabulxonasiga aholidan kelib tushgan 1 ming 10 ta murojaatlarning 834 tasi, yaʼni 82,6 foizi ijobiy hal qilingan.
Shundan soʻng Qoraqalpogʻiston Respublikasi Xalq taʼlimi vazirligi tomonidan tumandagi 18-sonli maktab direktorligi lavozimiga oʻtkazilgan tanlov yakunlari boʻyicha tavsiya qilingan nomzodga kelishim berish toʻgʻrisidagi masala koʻrib chiqildi.
Deputatlar nomzod Yeshbayeva Surayyo Ziyatbayevaning maktabda taʼlim sifati va samaradorligini oshirish borasida kelgusi 3-yilda amalga oshirishni rejalashtirgan dasturi bilan tanishdilar. Shundan soʻng ochiq ovoz berish yoʻli bilan nomzodga kelishim berish toʻgʻrisidagi masala boʻyicha qaror qabul qilindi va nomzod Surayyo Yeshboyeva 18-sonli maktab direktori lavozimiga tayinlandi.
Bundan tashqari, sessiya ishida Kengash vakolatiga kiruvchi boshqa masalalar ham muhokama qilinib, ular yuzasidan ham qarorlar qabul qilindi. Shuning bilan sessiya oʻz ishini yakunladi.
Tuman hokimligining axborot xizmati.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
