Sektor rahbariyati tomonidan 7 nafar fuqaroga joʻja chiqarishga moʻljallangan inkubatorlar berildi

Xalq bilan muloqot qilish, joylardagi mavjud muammolarni mahallabay, xonadonbay oʻrganish orqali odamlarni qiynayotgan masalalarga yechim topish, oʻzaro hamjihatlik asosida hududlarni rivojlantirish, aholi yashash hududlari infratuzulmalarni yaxshilash, oilaviy tadbirkorlik va kichik biznesga qulay sharoitlar yaratish kabi keng koʻlamli ishlarni amalga oshirishda sektorlar rahbarlari samarali tarza faoliyat olib borishmoqda.

7-fevral kuni Amudaryo tumanining 4-sektori rahbari Aydos Seyitov tomonidan oʻz xududidagi aholi yashash sharoitlari oʻrganilib, tadbirkorlik qilish istagidagi fuqarolar bilan suhbat oʻtkazildi.

Fuqarolarning istak va murojaatlari inobatga olinib, cektor rahbari hamda sektor hududida faoliyat yuritayotgan fermerlar tomonidan tadbirkorlik qilish istagidagi 7 nafar fuqaroga 500 ta joʻja chiqarishga moʻljallangan inkubatorlar berildi.

Oʻzbekiston Respublikasi Prezidentining “Tadbirkorlik faoliyati va oʻzini oʻzi band qilishni davlat tomonidan tartibga solishni soddalashtirish chora tadbirlari toʻgʻririda”gi qarorida oʻzini oʻzi band qilgan shaxslarning mehnat faoliyati natijasida olingan daromadlari jismoniy shaxslarning jami daromadlari tarkibiga kiritilmasligi belgilab berilgan.

Mazkur qarorda oʻzini oʻzi band qiladigan shaxslar uchun xizmat va faoliyat turlarining 68 tasi koʻrsatilgan boʻlib, shulardan biri − Fermer xoʻjaliklari egalari buyurtmasi boʻyicha qishloq xoʻjaligi ishlarini yoʻlga qoʻyish xizmat turi hisoblanadi.

Shu maqsadda, Qangli ovulida yashovchi Xursandbek Turgʻanbayev, Ozoda Matrizayeva, Feruza Jabbarova, Gulnora Qoʻchqorova, shuningdek, Qum yop mahallasida yashovchi Sayyora Rajapova, Sarvar Matchanov, Davronbek Xolmuratovlar oʻzini-oʻzi band qilib, tadbirkorlik faoliyatini yoʻlga qoʻyishmoqda.

Fuqarolar qarorda koʻrsatilgan tartibda roʻyxatdan oʻtkazilib, ularga guvohnomalar rasmiylashtirilib berildi. Qolaversa oʻz ish faoliyatini endigina boshlayotgan ushbu fuqarolarga huquqiy tushuntirish va maslahatlar berilib, fermerlar tomonidan doimiy ravishda yoʻl-yoʻriqlar koʻrsatib turilishi maʼlum qilindi.

Shu oʻrinda aytib oʻtish joizki, Inson qadrini ulugʻlash va faol mahalla yili deb nomlangan mazkur yilda mahallalarda ish boshlagan hokim yordamchilari va yoshlar yetakchilari sektor rahbarlari bilan hamkorlikda oʻz mahallasi hududidagi aholining yashash sharoitini yaxshilash borasida tizimli ishlarni boshlab yuborishgan.

Sektor rahbarlari va hokim yordamchilari xonadonma-xonadon yurib, odamlar bilan muloqotda boʻlib fuqarolarning oʻz dardi, muammosi, taklif va tashabbusini qoʻllab-quvvatlayotganligi alohida diqqatga sazovordir. Eng muhimi, tumanimiz aholisining hayotini yaxshilash, farovonligini oshirishga doir amaliy saʼy-harakatlar tufayli islohotlar samarasi xalqimiz hayotida yaqqol namoyon boʻlmoqda.

Tuman hokimligining axborot xizmati