QAROR MAZMUN-MOHIYaTINI TARGʻIB ETIShGA BAGʻIShLANGAN DAVRA SUHBATI BOʻLIB OʻTDI

Mamlakatimizda barcha sohalarda boʻlgani kabi sud-huquq tizimida ham islohotlar olib borilib, sud tizimini demokratlashtirish, sudlar faoliyatining shaffofligini taʼminlash, aholi bilan muloqotni kengaytirish va odil sudlovni amalga oshirishda jamoatchilik rolini kuchaytirishga ulkan eʼtibor qaratilmoqda.

Shuningdek, fuqarolar va tadbirkorlik subʼektlarining buzilgan huquqlarini himoya qilishda sudlarning ayniqsa, maʼmuriy sudlarning rolini kuchaytirishga, ularni fuqarolarning va tadbirkorlarning haqiqiy himoyachisiga aylantirishga harakat qilinayapti.

Oʻzbekiston Respublikasi Prezidentining shu yil 29-yanvar kuni qabul qilgan “Davlat organlari bilan munosabatlarda fuqarolar va tadbirkorlik subʼektlari huquqlarining samarali himoya etilishini taʼminlash hamda aholining sudlarga boʻlgan ishonchini yanada oshirish chora-tadbirlari toʻgʻrisidagi qarori bu boradagi ishlarni yangi bosqichga koʻtarishga asos boʻladi.

Yaqinda Amudaryo tumani hokimligi majlislar zalida ushbu qaror mazmun-mohiyatini oʻrganishga bagʻishlangan davra suhbati oʻtkazildi.

Tuman Adliya boʻlimi va Qoraqalpogʻiston Respublikasi Maʼmuriy sudi sudyasi Rahima Xudoyberganovalar hamkorligida tashkillashtirilgan davra suhbatida tuman hokimligi masʼullari, siyosiy partiyalar tuman Kengashlari raislari, xalq deputatlari tuman Kengashi deputatlari va tumandagi korxona, muassasalar rahbarlari ishtirok etdilar.

Tadbirda Qoraqalpogʻiston Respublikasi Maʼmuriy sudi sudsi Rahima Xudoyberganova kun tartibida mavzu yuzasidan maʼruza qildi. U oʻz soʻzida keyingi yillarda sud-huquq sohasidagi islohotlar, xususan, u insonlarni jazolovchi emas, amalda qonuniy haq-huquqlarini himoya qiluvchi suyanchigʻiga aylanayotganini taʼkidladi. “Davlat organlari bilan munosabatlarda fuqarolar va tadbirkorlik subʼektlari huquqlarining samarali himoya etilishini taʼminlash hamda aholining sudlarga boʻlgan ishonchini yanada oshirish chora-tadbirlari toʻgʻrisida”gi Prezident qarori fuqarolar va tadbirkorlik subʼektlarining buzilgan huquqlarini himoya qilishda sudlarning, ayniqsa maʼmuriy sudlarning rolini kuchaytirish, ularni fuqarolar va tadbirkorlarning haqiqiy himoyachisiga aylantirish lozimligi vazifa qilib belgilanganligiga keng toʻxtaldi.

Buning uchun maʼuriy sud ishlarini yuritishni “sudning faol ishtiroki” tamoyili asosida amalga oshirish, bunda maʼmuriy sudlarga ishning haqiqiy holatlarini aniqlash uchun oʻz tashabbusi bilan dalillarni yigʻish majburiyatini yuklash, huquqi buzilgan fuqaro yoki tadbirkorlik subʼektiga dalillarni yigʻishda faqat oʻz imkoniyati doirasida ishtirok etishga sharoit yaratish ham nazarda tutilganligi keng tushuntirildi.

Davra suhbatida ishtirokchilar oʻzlarini qiziqtirgan savollar bilan maʼruzachiga murojaat etib, batafsil javoblar oldilar, Ochiq muloqot ruhida oʻtgan tadbir ishtirokchilarning huquqiy bilimlarini oshirishga xizmat qilgani bilan ahamiyatli boʻldi.

Oygul RAJABOVA.