“Borliqni boʻston aylagan Bobur” nomli badiiy kecha oʻtkazildi

Mamlakatimizda milliy va maʼnaviy qadriyatlar ardoqlanib, boy madaniy merosimizga yangicha munosabat shakllanib bormoqda. Shoh va shoir, ham nasr, ham nazmda samarali ijod qilgan, buyuk mutafakkir Zahiriddin Muhammad Boburning boy adabiy va ilmiy merosi jahon ahlining yuksak eʼtirofiga sazovor boʻlib kelmoqda. Millatimiz faxri boʻlmish Bobur kabi buyuk siymolarni yod etish har birimiz uchun ham farz ham qarzdir.

14-fevral kuni Amudaryo tumani Xalq taʼlim boʻlimiga qarashli 11-sonli umumiy oʻrta taʼlim maktabida shoh va shoir, davlat arbobi − Zahiriddin Muhammad Bobur tavalludining 539 yilligi munosabati bilan “Borliqni boʻston aylagan Bobur” nomli badiiy kecha oʻtkazildi. Tadbirda 65- ,67- va 11-sonli umumtaʼlim maktabi oʻquvchilari qatnashib, buyuk bobomiz haqida olgan bilimlarini yanada kengaytirib, mustahkamlashdi.

Tadbirda soʻzga chiqqanlar Bobur shaxsiyatining mamlakatimizda va umuman, jahon tarixi, madaniyatidagi oʻrni, navqiron avlod uchun ibratli jihatlari, bu zot qoldirgan bebaho maʼnaviy merosning ahamiyati xususida toʻxtalishdi.

Tadbir doʻstona va koʻtarinki ruhda boʻlib oʻtdi. Dastlab, ona tili va adabiyot fani oʻqituvchilarining Bobur hayoti va ijodi yuzasidan tuzgan savollariga oʻquvchilar zukkolik va epchillik bilan javoblar berishdi. Shuningdek, maktab oʻquvchilari tomonidan Zahiriddin Muhammad Boburning hayot yoʻlini gavdalantirish maqsadida, Bobur sulolasi va uning shaxsiyatiga daxldor suratlar nomoyish qilindi.

Bundan tashqari, oʻquvchilar shoirning gʻazal va ruboiylaridan namunalarni ifodali tarzda oʻqidilar.

Ayniqsa, maktab kutubxonasi tomonidan tashkil qilingan koʻrgazma oʻquvchilarda oʻzgacha qiziqish va taassurot qoldirdi. Sababi, Bobur hayotini toʻlaqonli aks ettiruvchi “Boburnoma”, XV-XVI asrlarda zamonasining mashhur shoirlari tomonidan yozilgan qoʻlyozmalarning nusxalari oʻquvchilarni XV asr tomon yetakladi.

Tadbir davomida oʻquvchilar 12 yoshidan boshlab davlatni boshqargan buyuk sarkardaning Alisher Navoiydan keyingi betakror siymo ekanligini yanada teran his qildilar.

Oʻtkazilgan ushbu tadbir orqali Boburning hayot yoʻli, boshidan kechirgan qiyinchiliklari va undan chiqargan xulosalari oʻquvchilarga har tomonlama oʻrnak va namuna boʻldi desak adashmagan boʻlamiz.

Tadbir yakunida badiiy kechada ishtirok etgan barcha oʻquvchilar faxriy yorliq va esdalik sovgʻalari bilan taqdirlanishdi.

Darhaqiqat, oʻz ona zaminidan yiroqda butunlay begona yurtni makon tutgan bobomiz tarqoq holdagi hind qabilalarini birlashtirib Boburiylar imperiyasiga asos soldi. Bor yoʻgʻi 47-yil umr koʻrgan boʻlsa ham, avlodlariga bitmas-tuganmas maʼnaviy xazina qoldirdi. U oʻzining maʼlum va mashhur asarlari bilan tarixnavis adib, lirik shoir va ijtimoiy masalalar yechimiga oʻz hissasini qoʻshgan olim sifatida jahon hamjamiyatida oʻzining yuksak oʻrniga egaligi bilan bizga gʻurur va iftixor bagʻishlaydi.

Boburning tavallud kuni munosabati bilan oʻtkazilayotgan kechalar, konferetsiyalar, tadbirlar bobomizni yod etishga, uning boy merosini targʻib qilishga qaratilganligi bilan ahamiyatlidir. Shunday ekan, har bir Vatandoshimiz qalbida Bobur siymosini aardoqlab, uning boy merosini kelgusi avlodga etkazishga daxldor ekanligini chuqur his qilmogʻi lozim.

F.Eshimbetova