BIOLOGIYa FANLARI FALSAFA DOKTORI OʻZI OʻQIGAN MAKTABDA “MAHORAT DARSI” OʻTDI

Tumanimizda faoliyat yuritayotgan umumiy oʻrta taʼlim muassasalarida taʼlim – tarbiya olib, oʻz orzulari yoʻlida olgʻa intilib, izlanib, ilm-fan rivojiga hissa qoʻshayotganlar talaygina. Mangʻit shahrida tugʻilib voyaga yetgan Anvar Sherimbetov shularning biri. U 40-sonli maktabni tamomlab Toshkent Davlat Agrar universiteti Nukus filialiga oʻqishga kirdi. 2004-yilda ushbu oliygohning bakalavriat bosqichini tamomlab, Mangʻit shahridagi 38-sonli maktabda oʻqituvchilik faoliyatini boshladi. Oʻz sohasini chuqur egallash maqsadida magistratura bosqichida oʻqishini davom ettirdi.

 Toshkent Davlat Agrar universitetining magistratura bosqichida oʻqishi jarayonida Anvarda oʻz ixtisosligi boʻyicha chuqur bilim olish, ilmiy izlanishlar olib borib, yangiliklar yaratish ishtiyoqi uygʻondi. Shu niyatda u magistraturani tamomlab, Oʻzbekiston Respublikasi Fanlar akademiyasi Genetika va oʻsimliklar eksperimental biologiyasi instituti aspiranturasini ham tugatib, 2012-2016-yillarda institutda kichik ilmiy xodim boʻlib faoliyat yuritdi va dessertatsiyasini muvaffaqiyatli himoya qildi. 2016-yildan hozirga qadar esa Oʻzbekiston Respublikasi Fanlar akademiyasi Genetika va oʻsimliklar eksperimental biologiyasi institutida ilmiy obʼekt kollektsiyasi rahbari lavozimida ishlab kelmoqda. Oʻtgan yillar davomida olib borgan ilmiy izlanishlari natijasida dotsent ilmiy unvonini oldi, biologiya fanlari falsafa doktori boʻldi.

 Mangʻitning ana shunday iqtidorli oʻgʻloni yaqinda tumanimizga tashrif buyurdi. Tashrifi chogʻida oʻzining doimiy odatiga koʻra taʼlim olgan 40-sonli maktabiga ham bordi. Bu yerdagi taʼlim – tarbiya jarayoni, xususan biologiya fanining oʻqitilishi ahvoli bilan qiziqdi.

 Maʼlumki, biologiya fanini yaxshi oʻrganish oʻquvchiga borliqni anglashga, oʻzini anglashga, atrofini qurshagan oʻsimliklar dunyosini anglashga yordam beradi va tabiatga oqilona munosabatda boʻlish hissini tarbiyalaydi. Yosh olim shuning uchun oʻzi oʻqigan maktab oʻquvchilariga biologiya fanidan “Mahorat darsi” oʻtdi va yoshlarni qiziqtirgan barcha savollarga batafsil javoblar berdi. Albatta, nufuzli olim bilan boʻlgan dars oʻquvchilarga ulkan motivatsiyalar berdi.

 Ikkinchi dars – Mangʻit shahrida faoliyat yuritayotgan umumiy oʻrta taʼlim maktablarining biologiya fani oʻqituvchilari uchun “Mahorat darsi” boʻldi. Oʻtkazilgan dars, biologiya fani sohasidagi yangiliklar, fanni oʻquvchilarga oʻqitishda qoʻshimcha tariqasida foydalanish mumkin boʻlgan maʼlumotlar oʻqituvchilar uchun ham juda qiziqarli boʻldi.Ular yosh olimning kasallangan qishloq xoʻjaligi ekinlariga tashhis qoʻyish, oʻsimliklarda kasallik keltirib chiqaruvchi mikroorganizmlar turlari tarkibini aniqlash, ularning tuzilishini, xususiyatlarini oʻrganish, kollektsiyada saqlash va ularni optimizatsiya qilish yoʻnalishida olib borayotgan ishlari haqida ham qoʻshimcha maʼlumotlarga ega boʻldilar. Hindiston, Isroil, Rossiya kabi davlatlarda malaka oshirib, olimlari bilan mustahkam ijodiy hamkorlik oʻrnatgan mangʻitlik olim bilan suhbat oʻquvchilarda ham, oʻqituvchilarda ham ulkan taassurotlar qoldirdi.

 Oygul RAJABOVA.