Tuman Ichki ishlar boʻlimi shaxsiy tarkibi ishtirokida yigʻilish boʻlib oʻtdi

Korruptsiyaga qarshi kurashish Oʻzbekistonda davlat siyosatining eng ustuvor yoʻnalishlaridan biridir. Buni soʻnggi yilllarda sohaga oid qabul qilingan kontseptual ahamiyatga ega normativ-huquqiy hujjatlar, korruptsiyanining oldini olishga qaratilgan maʼmuriy islohotlar misolida ham koʻrish mumkin.

Bugungi kunda korruptsiyaga qarshi kurashish hamda uning oldini olish maqsadida Ichki ishlar organlari tomonidan koʻplab tizimli ishlar amalga oshirilmoqda. Jumladan, 27-fevral kuni Amudaryo tumani Madaniyat markazida Oʻzbekiston Respublikasi va Qoraqalpogʻiston Respublikasi Ichki ishlar Vazirligi masʼul xodimlari hamda tuman Ichki ishlar boʻlimi shaxsiy tarkibi ishtirokida yigʻilish boʻlib oʻtdi.

Yigʻilishda xodimlar oʻrtasida qonuniylik va xizmat intizomini mustahkamlash hamda korruptsiyaga qarshi kurashishning oʻziga xos usullari muhokama qilindi. Shuningdek, Oʻzbekiston Respublikasi Prezidenti tomonidan qabul qilingan “Korruptsiyaga qarshi kurashish faoliyatini samarali tashkil etishga doir qoʻshimcha chora-tadbirlar toʻgʻrisida”gi qarorga muvofiq amalga oshirilayotgan ishlar boʻyicha keng tarzda maʼlumot berib oʻtildi.

Bundan tashqari yigʻilishda, korruptsiyaga qarshi kurashish tadbirlarining samaradorligini oshirish boʻyicha bir qator vazifalar belgilab olindi.

Darhaqiqat, korruptsiya shunchaki jinoyat yoki huquqbuzarlik emas, balki maʼnaviy buzilish holati hamdir. Shunday ekan, ushbu illatni tag-tomiri bilan yoʻqotish uchun faqatgina huquq-tartibot organlari vakillari emas balki butun bir jamiyat jipsligi talab etiladi.

Oʻtkazilgan mazkur yigʻilishda shu mavzuga bagʻishlangan “Korrupiya − jaholatga yoʻl” nomli videorolik namoyish etildi.

 Yigʻilish ishtirokchilari tomonidan fikr va mulohazalar bildirish jarayonida korruptsiya mamlakatning iqtisodiy rivojlanishiga putur yetkazuvchi demokratik institutlarni zaiflashtiruvchi, ijtimoiy tartibni buzuvchi va jamiyat ishonchini poymol etuvchi illat sifatida eʼtirof etilib, uning oldini olish va unga barham berishda davlat organlari va xalqning hamkorligini yoʻlga qoʻyish zarurligi qayd etib oʻtildi.

Bunday yigʻilishlarni oʻtkazishdan maqsad, avvalo korruptsion jinoyatchilikning oldini olishda huquq-tartibot organlari vakillarining oʻrni nihoyatda katta ahamiyatga ega ekanligini va bu borada amalga oshirilayotgan tizimli ishlar koʻlamdorligini yanada oshirish boʻyicha aniq chora-tadbirlar belgilab olishdan iboratdir.

Yigʻilish yakunida oʻz xizmat vazifasini bajarish davomida jamiyatimizda qonun ustuvorligini taʼminlash, jinoyatchilikka qarshi kurashish va uning oldini olish borasida mardona xizmatlar qilgan 5 nafar soha xodimlari hamda ularning ota-onalari tashakkurnomalar bilan taqdirlandi.

Yigʻilishda soʻzga chiqqanlar taqdirlangan xodimlarni tabriklab, ichki ishlar idoralari xodimlarining oʻz xizmat vazifasiga yanada masʼuliyat bilan yondashib, xalqimiz tinchligi va jamiyat osoyishtaligini taʼminlashdek sharafli ishlariga omad tiladilar.

Fotima Eshimbetova.