FAROVON MAHALLASIDA MAXSUS-TAKTIK OʻQUV MAShQI OʻTKAZILDI

Amudaryo tumani Favqulodda vaziyatlar boʻlimi tomonidan tuman hokimi – Fuqaro muhofazasi boshligʻining 2022-yil 17-yanvardagi tegishli buyrugʻiga muvofiq maxsus-taktik oʻquv mashqi tashkil etildi.

Joriy yilning 2-mart kuni Farovon mahallasi hududida “Mahalla fuqaro muhofazasi” yigʻma guruhini yaratish va faoliyatini tashkillashtirish maqsadidagi ushbu oʻquv mashqi doirasida dastlab oʻquv-amaliy seminar oʻtkazildi. Oʻquv-amaliy seminarga tuman hokimligi, Favqulodda vaziyatlar boʻlimi, Oʻzbekiston Qizil yarim oy jamiyati tuman boʻlimi, Mahalla va oilani qoʻllab-quvvatlash boʻlimi hamda fuqarolar yigʻinlari xodimlari ishtirok etishdi.

Koʻrgazmali oʻquv-seminarning nazariy qismini tuman Favqulodda vaziyatlar boʻlimi xodimi Bekzod Tajiboyev olib bordi hamda “Mahalla fuqaro muhofazasi”ning asosiy vazifalari, funktsiyasi, tuzilma faoliyatini tashkil etish, moliyalashtirish va moddiy-texnik taʼminlash tartibi toʻgʻrisida maʼruzalar qildi.

Shuningdek, “Mahalla fuqaro muhofazasi” yigʻma guruhlarini asbob-anjom, mol-mulk va himoya vositalari bilan taʼminlashni tashkil etish va guruh aʼzolarining amaliy koʻnikmalarini shakllantirishga qaratilgan tartib-qoidalari, birinchi tibbiy yordam koʻrsatish, aholini favqulodda vaziyatlar, yaʼni zilzila, sel va suv toshqini, is gazi va boshqa zaharli gazlardan, ovqatdan zaharlanish, yongʻin, suvda choʻkish, quturish kasalligi hamda hududlarning radioaktiv, kimyoviy va biologik zararlanishi bilan bogʻliq favqulodda vaziyatlardan muhofaza qilishga, tayyorlashga doir harakatlar toʻgʻrisida tushunchalar berib oʻtdi.

Koʻrgazmali oʻquv mashqining amaliy qismida “Mahalla fuqaro muhofazasi” yigʻma guruhi shaxsiy tarkibining holati hamda Farovon mahalla fuqarolar yigʻini hududida sodir boʻlishi mumkin boʻlgan favqulodda vaziyatlar inobatga olinib, maxsus-taktik oʻquv mashqi oʻtkazildi. Dastlab tuman Favqulodda vaziyatlar boʻlimining Qutqaruv otryadi hamda hududiy Favqulodda vaziyatlar davlat tuzilmasi kuch va vositalarining maxsus texnika, asbob-anjomlarini ishlatish va ularning taktik-texnik tavsiflari boʻyicha tushunchalar berildi.

Favqulodda vaziyatlar davlat tuzilmasi kuch va vositalari tomonidan favqulodda vaziyatlarni bartaraf etish boʻyicha amaliy harakatlar oʻquv mashqlari tarzida koʻrsatib berildi. Shuningdek, avariya, halokat, tabiiy ofatlar, epidemiya xavfi yuzaga kelganda hamda harbiy harakatlar davrida yuzaga kelishi mumkin boʻlgan favqulodda vaziyatlardan aholi hayoti va sogʻligini, moddiy boyliklarni muhofaza qilishga qaratilgan tadbirlar, bu jarayondagi harakatlar amalda bajarib koʻrildi.

Ushbu tadbirga Farovon mahalla fuqarolar yigʻinida tuzilgan Fuqaro muhofazasi tuzilmasidan 11 nafar xodim jalb qilindi. Jami oʻtkazilgan koʻrgazmali oʻquv amaliy seminari va taktik-maxsus oʻquv mashqiga 37 nafar fuqaro va 9 ta maxsus texnika qatnashdi.

Tadbir yakunida barcha vakolatli idoralar vakillari bilan oʻquv mashqi yuzasidan fikrlar almashildi va kelgusidagi vazifalar belgilab olindi.

B.Tajiboyev, tuman FVB boʻlinma boshligʻi.