“Xotin-qizlarni eʼzozlash haftaligi” doirasida mahalla ayol-qizlari oʻrtasida sport musobaqalari boʻlib oʻtdi

Mamlakatimiz rahbari olib borayotgan koʻpqirrali siyosatda xotin-qizlarga alohida eʼtibor qaritilib kelinmoqda. Ayniqsa, xotin-qizlar salomatligi uchun qaygʻurish ustuvor masala sifatida belgilab olindi. Zotan, sogʻlom avlodgina yurt kelajagini taʼminlaydigan asosiy omil sanaladi. Bu avlodning dunyoga kelishi va kamolga yetishida esa, shubhasiz, ayollarimiz, onalarimizning oʻrni va xizmatini hech bir narsaga tenglashtirib boʻlmaydi.

Shu maqsadda, 5-mart kuni Xalqaro xotin qizlar bayrami oldidan “Xotin-qizlarni eʼzozlash haftaligi” doirasida tumanimizdagi faol mahalla ayol-qizlari oʻrtasida sport musobaqalari boʻlib oʻtdi. Musobaqalar tuman Mahalla va oilani qoʻllab-quvvatlash boʻlimi, “Mahalla” hayriya jamoat fondi tuman boʻlinmasi, Turizm va sport boʻlimi, Davlat muassasalari va jamoat xizmati xodimlari kasaba uyushmasi tuman Kengashi bilan hamkorlikda tashkil etildi.

Nukus davlat pedagogika instituti huzuridagi matematika fanlariga ixtisoslashtirilgan maktab binosida boʻlib oʻtgan mazkur sport bellashuvlarini Mahalla va oilani-qoʻllab-quvvatlash boʻlimi boshligʻining birinchi oʻrinbosari Goʻzal Soburova ochib berdi hamda barcha ayol-qizlarni bayram bilan qizgʻin muborakbod etdi.

Davlatimiz rahbarining alohida eʼtiborlari natijasida moʻʼtabar onalarimiz, opa-singillarimizni hayotdan rozi qilish, ularning jamiyatdagi mavqeini yanada mustahkamlash soʻnggi yillarda davlat siyosatining bosh masalalaridan biriga aylanganini alohida taʼkidlab, yangi tashkil etilgan Oila va xotin-qizlar qoʻmitasi va uning tizimida har bir mahallada xotin-qizlar faoli lavozimi joriy qilingani xotin-qizlar masalalarini yanada kengroq qamrab olinishiga asos boʻlishini qayd etdi.

Shundan soʻng Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimboychiyeva va tuman Turizm va Sport boʻlimi mutaxassisi Xurshid Ismoilovlar ayol-qizlarni Xalqaro xotin-qizlar bayrami bilan muborakbod etib, sport musobaqalarida barchaga omad tiladi.

Shiddatli va murosasiz kechgan musobaqalarda ctol tennisi boʻyicha 1-oʻrinni Gulbahor Xidirova, 2-oʻrinni Muqaddas Beknazarova va 3-oʻrinni Gavhar Chimboychiyevalar egallashdi.

Darts musobaqalarida 1-oʻrinni Sabohat Rajapova, 2-oʻrinni Dilnoza Otaboyeva, 3-oʻrinni Feruza Allaberganovalar egalladi.

Shaxmat-shashka musobaqalari ham murosasiz kechdi. Musobaqada 16 ta ishtirokchi qatnashib, oʻzaro kuch sinashdilar. Sportning shashka turi boʻyicha, 1-oʻrinni Gulnora Matniyazova, 2-oʻrinni Feruza Saidmuratova, 3-oʻrinni Sanamjon Kazakovalar egalladi.

 Shaxmat musobaqalari uzoq vaqt davom etdi. Ishtirokchilar mazkur musobaqada oʻz aqliy salohiyatini va mantiqiy fikrlash qobilyatini sinovdan oʻtkazish bilan birgalikda koʻplab doʻstlar orttirdilar. Musobaqa natijalariga koʻra, 1-oʻrinni Nodira Yoʻldosheva, 2-oʻrinni Dildora Kenjaboyeva, 3-oʻrinni Nargiza Boboniyozovalar egalladi.

Musobaqalar yakunida Davlat muassasalari va jamoat xizmati xodimlari kasaba uyushmasi tuman Kengashi raisi Azad Almuratov barcha ayol-qizlarni bayram bilan tabriklab oilaviy hayotlarida va kasbiy faoliyatlarida muvaffaqiyatlar tilab esdalik sovgʻalarini topshirdi.

Tadbir yakunida sport musobaqalarida ishtirok etgan barcha ayol-qizlar jamiyatda ayollarga koʻrsatilayotgan eʼtibor va eʼtirofdan mamnunligini bildirib, barcha tashkilotchilarga minnaddorlik bildirishdi.

Tuman hokimligining Axborot xizmati