“Ayol-qizlarni eʼzozlash haftaligi” doirasida oʻqituvchi ayol-qizlar oʻrtasida sport musobaqalari oʻtkazildi

Xalqaro xotin-qizlar kuni bayrami oldidan ayol-qizlar oʻrtasida turli sport musobaqalari, kzrik-tanlovlar oʻtkazish yaxshi anʼanaga aylangan. Zero, ayollarning jamiyat va davlat ishlarida ishtirokini kuchaytirish, ijtimoiy faolligini oshirish davlatimiz siyosatining ustuvor yoʻnalishidir. Prezidentimiz raisligida shu yil 1-mart kuni boʻlib oʻtgan videoselektor yigʻilishidan keyin ayol-qizlar faoliyatiga doir koʻplab ijobiy qarorlar qabul qilindi. Ayol-qizlarning oʻz hayotlaridan rozi boʻlib yashashlari, jamiyatda munosib oʻrin egallashlari borasida amalga oshirilayotgan ishlar tizimli ravishda davom ettirilmoqda.

Shu bilan birga ayol-qizlar hayotida sogʻlom turmush tarzini keng turda qaror toptirish, ular oʻrtasida sport tadbirlarini ommalashtirish masalasiga ham katta eʼtibor qaratilmoqda.

Shu maqsadda 8-mart – Xalqaro xotin-qizlar kuni bayrami oldidan “Ayol-qizlarni eʼzozlash haftaligi” doirasida tumanimizdagi barcha korxona, tashkilot va muassasalarda faoliyat yuritayotgan ayol-qizlar oʻrtasida sport musobaqalari tashkil etildi.

Jumladan, Taʼlim va fan xodimlari kasaba uyushmasi tuman boʻlinmasi tomonidan 16-sonli ixtisoslashtirilgan davlat umumtaʼlim maktabi binosida tumanimizdagi umumtaʼlim maktablarda faoliyat olib boryotgan oʻqituvchi ayol-qizlar oʻrtasida sportning voleybol, shaxmat, shashka, yengil atletika, darts, stol tennisi turlari boʻyicha musobaqalar oʻtkazildi. Musobaqalarga jami 300 nafar ayol-qiz qamrab olindi.

Oʻtkazilgan voleybol musobaqasida tumanimizdagi har bir maktabning ayol-qizlaridan iborat jamoa qatnashib oʻzaro kuch sinashdilar. Mazkur musobaqaning yakuniy natijalariga koʻra 28-maktab jamoasi faxrli 1-oʻrinni qoʻlga kiritgan boʻlsa, 12-maktab jamoasi 2-oʻrinni, 22-maktab jamoasi 3-oʻrinni egalladi.

Shu oʻrinda aytish kerakki, sport musobaqalarini oʻtkazish ayol-qizlarni turli kasb kasalliklaridan muhofaza qilibgina qolmasdan ularning jamiyatning faol aʼzosi sifatida alohida oʻringa ega ekanliklarini his qilishlari uchun yaqindan yordam beradi.

Bundan tashqari, sportning shaxmat va shashka turlari boʻyicha ham musobaqalar boʻlib oʻtdi. Shaxmat boʻyicha 1 –oʻrinni Nazokat Gaipova, 2-oʻrinni Muborak Rahimova, 3-oʻrinni Dildora Karimboyevalar egallagan boʻlsa, shashka boʻyicha Adolat Bekchanova, Sanobar Sharifboyeva hamda Saida Yusupovalar mutloq gʻolib boʻldilar.

Shuningdek, sporting yengil atletika turi boʻyicha Nodira Yoʻldasheva oʻz epchilligini namoyish qilib 1-oʻringa munosib deb topildi.

Bundan tashqari, sportning darts hamda stol tennisi turi boʻyicha ham bellashuvlar boʻlib oʻtdi. Darts boʻyicha Gulbahor Yoʻldasheva, Rahima Saparbayeva hamda Matluba Qurbaniyozovalar gʻolib boʻlgan boʻlsalar, stol tennisi boʻyicha Eʼtibor Bobojanova yetakchilikni qoʻldan boy bermay 1-oʻrinni egallashga muvaffaq boʻldi.

Kun boʻyi davom etgan sport musobaqalarida jami 28 nafar gʻoliblar aniqlanib, Taʼlim va fan xodimlari kasaba uyushmasi tuman boʻlinmasi Kengashi tomonidan esdalik sovgʻalari bilan taqdirlandi.

Tuman hokimligining Axborot xizmati