DEPUTAT BILAN UChRAShUVDA KOʻPLAB MUAMMOLAR OʻZ YeChIMINI TOPMOQDA

Qoraqalpogʻiston Respublikasidagi barcha darajadagi deputatlarning faolligini yanada oshirish maqsadida 9-martdan 19-martgacha oʻtkazilayotgan deputatlar faoliyatida “Dolzarb 10 kunlik” doirasida 32-Qilichboy saylov okrugidan Qoraqalpogʻiston Respublikasi Joʻqorgʻi Kengesi deputati Sanobar Xoʻjamuratova Xalq deputatlari Amudaryo tuman Kengashi deputati Bahrom Qodirov bilan birgalikdagi 11-mart kuni Qilichboy ovulida istiqomat qiluvchi saylovchilari bilan uchrashdi.

Deputat bilan uchrashuv ovuldagi Qoʻchqorboy Nurimovning tomorqasida tashkil etilib, unda Qilichboy ovuli faollari va yoshlar ishtirok etdilar.

Uchashuvda deputat Sanobar Xoʻjamuratova saylovchilarga Prezidentimizning Qoraqalpogʻistonga tashrifi, ijtimoiy-siyosiy hayotdagi oʻzgarishlar, mamlakatimizda, xususan, Amudaryo tumanida yoshlar va xotin-qizlarga yaratilayotgan sharoitlar, qishloqlarda tomorqa xoʻjaligi, yoshlar va ayollar tadbirkorligini rivojlantirish boʻyicha amalga oshirilayotgan keng koʻlamli islohotlar haqida gapirib berdi.

Sanobar Xoʻjamuratova saylovchilar bilan muloqot qilish va ularning tomorqa xoʻjaligini yuritish boʻyicha muammolarini oʻrganish jarayonida Taraqqiyot strategiyasida belgilangan ustuvor vazifalarga ham batafsil toʻxtaldi. Ana shu ustuvor vazifalardan kelib chiqib, saylovchilar bilan uchrashuv joyining qilichboylik mohir tomorqa yer egasi Qoʻchqorboy Nurimov tomorqa xoʻjaligida tashkil etilganiga alohida urgʻu berdi. U mahalladoshlari orasida oʻz halol va fidoyi mehnati, tadbirkorligi bilan eʼtibor va obroʻ topgan Qoʻchqorboy Nurimov erishayotgan yutuqlarni yoshlarga ibrat qilib koʻrsatdi.

Rasmiyatchilikdan xoli tarzda tashkillashtirilgan uchrashuvda deputat moʻʼjazgina tomorqadan yilning toʻrt faslida ham unumli foydalanib, oʻzi va barcha  oila aʼzolari bandligini taʼminlagan Qoʻchqorboy Nurimovning tajribalarini yoshlar oʻrtasida  keng ommalashtirish yuzasidan zarur tavsiyalar berdi. Uchrashuvda saylovchilar, asosan dehqonchilik uchun bahorgi ekish-tikish ishlarida zarur boʻladigan bioorganik mahsulotlar yetishmovchiligi, auktsion orqali yer olish, mikrokreditlar ajratish borasida hamda oʻzlarini qiziqtirgan boshqa masalalar boʻyicha murojaat qildilar.

Ovul yoshlaridan Raʼno Rahimboyeva tomorqa xoʻjaligini yuritish uchun organik oʻgʻit olishni rejalashtirgani, lekin hujjatlarni rasmiylashtirishda huquqiy yordam zarurligini aytib, ushbu masalada yordam berishni soʻradi. Uning murojaati ovul fuqarolar yigʻinida faoliyat olib borayotgan hokim yordamchisi Murodjon Boltayev tomonidan roʻyxatga olinib, tez fursatlarda bu muammoni bartaraf etishga kelishib olindi.

Shuningdek, Shohista Eshimmetovning dehqonchilik qilish uchun yer ajratib berishni soʻrab qilgan murojaati ham shu yerning oʻzida atroflicha oʻrganib chiqilib, auktsionga qoʻyilgan yerlar hisobidan 25 sotix yer olishi mumkinligi va auktsionda ishtirok etish tartib-qoidalari toʻgʻrisida zarur tushunchalar berildi.

Uchrashuvdan keyin deputat Sanobar Xoʻjamuratova xalq deputatlari Amudaryo tuman Kengashi deputati Bahrom Qodirov bilan birgalikda ovuldagi keksa va bemor onaxonlar holidan ham xabar oldilar.

Deputatlar 84 yoshli bemor onaxon Salima Hayitboyeva xonadonida boʻlishib, onaxonning oilasidagi muammolarni oʻrgandilar va onaxonning murojaatiga koʻra, unga qarayotgan qizi Saida  Hayitboyevaga bemor onasining parvarishiga masʼul ekanligi toʻgʻrisidagi hujjatlarni rasmiylashtirish va byudjetdan tashqari Pensiya jamgʻarmasiga topshirish boʻyicha masʼul tashkilotlarga Saida Hayitboyevaning bemor onasiga qarab turgan davri mehnat stajiga hisoblanishi toʻgʻrisida deputat soʻrovi kiritish boʻyicha kelishib olindi.

Deputatlar hududdagi 15-sonli umumtaʼlim maktabining uyda taʼlim olayotgan 8 nafar oʻquvchilari holidan xabar olishib, ularga berilayotgan taʼlim sifati bilan ham yaqindan tanishdilar hamda bu oʻquvchilarga mamlakatimizda taʼlim sohasiga qaratilayotgan eʼtibor, nogironligi boʻlgan oʻquvchi-yoshlarning oliy taʼlim muassasalarida taʼlim olishlari, oʻz orzularini roʻyobga chiqarishlari uchun yaratilayotgan imtiyozlar xususida maʼlumot berib, ularni yangi orzular, ilm olish, hunar egallash, kuchli tadbirkor boʻlish sari ruhlantirdilar.

Robiya YOʻLDOShEVA.