TUMAN MUDOFAA IShLARI BOʻLIMI MASʼULLARI OʻQUVChI-YoShLAR UChUN YIGʻILISh OʻTKAZILDI

Yoshlarni harbiy vatanparvarlik ruhida tarbiyalash – bu millati, tili va kasbidan qatʼiy nazar, yoshlarda Vatanga sadoqat tuygʻusini shakllantirish, ularni oʻz fuqarolik burchi va konstitutsion majburiyatlarini bajarishga, jamiyat va davlat manfaatlarini himoya qilishga qodir shaxslar qilib tarbiyalashga yoʻnaltirilgan faoliyatdir.

Bugungi kunda mamlakatimizda faoliyat yuritayotgan umumiy taʼlim maktablarida yoshlarni chaqiriqqa qadar boshlangʻich tayyorgarlik fani yoshlarni Vatan himoyasi uchun munosib xizmat qilishga ruhan va jismonan tayyorlashga yoʻnaltirilgan, shuningdek, milliy armiyamiz saflarida xizmat qilish uchun jismonan baquvvat, maʼnan yetuk yoshlar zarurligi, harbiy xizmatning ahamiyati, Qurolli Kuchlarda olib borilayotgan islohotlar haqida ular batafsil xabardor qilib boriladi.

28-mart kuni Amudaryo tumanidagi 16-sonli maktabda ushbu muassasa yoshlarni chaqiruvga qadar boshlangʻich tayyorgarlik fani oʻqituvchisi Akmal Saidov va tuman Mudofaa ishlari boʻlimi masʼullari hamkorligida harbiy vatanparvarlik tarbiyasiga bagʻishlangan yigʻilish boʻlib oʻtdi. Tadbirda Mangʻit shahrida faoliyat yuritayotgan maktablarning 9- va 11-sinflari bitiruvchilari ishtirok etdilar.

Yigʻilishda tuman Mudofaa ishlari boʻlimi boshligʻi, podpolkovnik Sherzod Murodov, yoshlarni harbiy xizmatga tayyorlash boʻlinmasi boshligʻi Roman Roʻzmetovlar soʻzga chiqib, ishtirokchilarga keng turda tushunchalar berdi. Taʼkidlanganidek, mamlakatimizda oʻsmirlarni harbiy – vatanparvarlik ruhida tarbiyalash hamda Oʻzbekiston Respublikasi Qurolli Kuchlari va davlat xizmati uchun kadrlash zahirasini tayyorlash tizimini takomillashtirish boʻyicha qator amaliy ishlar qilinmoqda. Shu maqsadda qabul qilingan Prezident qaroriga koʻra Mudofaa, Ichki ishlar, Favqulodda vaziyatlar vazirliklari, davlat xavfsizlik xizmati, milliy gvardiya tarkibida “Temurbeklar maktabi” harbiy-akademik litseylari tashkil etildi. Ushbu litseylarga umumtaʼlim maktablarining 9-sinfini aʼlo baholarga tamomlagan, sogʻligʻining holatiga koʻra oʻqishga yaroqli deb topilgan hamda saralash tanlovidan muvaffaqiyatli oʻtgan oʻsmir oʻgʻil bolalar qabul qilinadi. “Temurbeklar maktabi” harbiy-akademik litseylarida oʻqish davomiyligi ikki yil ekanligi, bitiruvchilarga mazkur sohalarda ishlash yo oʻqishni davom ettirish uchun yaratilgan imkoniyatlar haqida batafsil maʼlumot berdilar.

Harbiy xizmat – har bir yigitning muqaddas burchidir. Yurtimizda harbiy xizmatga borishni, oliy harbiy bilim yurtlarida tahsil olib, yetuk harbiy mutaxassis boʻlib, Qurolli Kuchlarimiz safida xizmat qilishni, yurtimiz tinchlik-osoyishtaligiga hissa qoʻshishni orzu qiladigan yigitlar koʻpchilikni tashkil etadi.

Maktabda oʻtkazilgan tadbirda oʻquvchilarga yurtimizdagi mavjud harbiy oliy taʼlim muassasalariga oʻqishga kirish shartlari keng tushuntirildi.

Tadbir soʻngida yoshlarni chaqiriqqa qadar boshlangʻich tayyorlash fani oʻqituvchisi Akmal Saidov soʻzga chiqib, oʻz faoliyatida oʻquvchi-yoshlarni bilimli, kuchli, yurt koriga yaraydigan vatanparvar qilib voyaga yetkazish maqsadida amalga oshirayotgan ishlari, erishayotgan yutuqlari haqida maʼlumot berdi. Uchrashuv tashkilotchilari oʻquvchilarni “Temurbeklar maktabi”da, harbiy oliy taʼlim muassasalarida oʻqishga, iqtidorli harbiy mutaxassislar boʻlib yetishib, vatanimiz ravnaqiga, osoyishtaligiga munosib hissa qoʻshishga chaqirdi.

Tadbir oʻquvchilarda ulkan taassurotlar qoldirdi.

O.RAJABOVA.