PROBATsIYa NAZORATIDAGI 9 NAFAR MAHKUM MUDDATIDAN ILGARI JAZODAN OZOD ETILDI

Jinoyat ishlari boʻyicha tuman sudi tomonidan ochiq sayyor sud oʻtkazilib, Probatsiya nazoratidagi mahkumlarga doir ish materiallari koʻrib chiqildi.

Shu yil 4-aprel kuni tuman Ichki ishlar boʻlimining maʼmuriy binosida boʻlib oʻtgan sud majlisida Jinoyat ishlari boʻyicha tuman sudi masʼullari, tuman prokurori yordamchisi S.Xolmuradov, tuman IIO Probatsiya guruhi katta inspektori R.Iskandarovlar ishtirok etdilar. Sud majlisida Probatsiya xizmati taqdimnomasiga koʻra, Oʻzbekiston Respublikasi JKning 73-moddasi tartibida ilgari jinoyat sodir qilib, hozirgi kunda tuzalish yoʻliga qatʼiy oʻtgan hamda jazo turlari uchun oʻrnatilgan tartib-qoida talablarini bajargan, mehnatga halol munosabatda boʻlgan 9 nafar mahkum belgilangan jazolaridan muddatidan ilgari shartli ravishda ozod qilindi.

Sud davomida ushbu shaxslarga jazoni oʻtashdan muddatidan ilgari shartli ravishda ozod qilinib, oʻtalmagan qismi mobaynida qasddan yangi jinoyat sodir etgan taqdirda Jinoyat Kodeksning 60-moddasida nazarda tutilgan qoidalarga muvofiq jazo tayinlanishi tushuntirildi. Shundan soʻng, tuman IIB xodimlari ishtirokida davra suhbati oʻtkazildi. Unda Prezidentimizning 2021-yil 6-iyuldagi “Korruptsiyaga qarshi murosasiz munosabatda boʻlish muhitini yaratish, davlat va jamiyat boshqaruvida korruptsiyaviy omillarni keskin kamaytirish va bunda jamoatchilik ishtirokini kengaytirish chora-tadbirlari toʻgʻrisida”gi Farmoni, “Korruptsiyaga qarshi kurashish boʻyicha 2021-2022-yillarga moʻljallangan davlat dasturi”ning 34-bandi ijrosini taʼminlash boʻyicha amalga oshirilayotgan chora-tadbirlar toʻgʻrisida soʻz yuritildi. Shuningdek, korruptsiya davlat va jamiyat taraqqiyoti uchun eng jiddiy xavf-xatarlardan biri ekanligi tushuntirildi.

Bahs-munozara tarzida oʻtgan davra suhbatida davomida ishtirokchilarni qiziqtirgan boshqa savollarga ham batafsil javoblar berildi.

J.Oʻrazbayev, Jinoyat ishlari boʻyicha tuman sudi raisi.