XALQ QABULXONALARI AHOLI MUAMMOLARIGA YeChIM TOPIShDA YaQIN KOʻMAKDOSh BOʻLMOQDA

Prezident Xalq qabulxonalari bugun xalqimizning muammolariga yechim topishiga koʻmaklashib, hayotdan rozi boʻlib yashashiga xizmat qilmoqda. Shu maqsadda Qabulxonalar mutasaddilari tomonidan barcha darajadagi rahbarlarning fuqarolar bilan ochiq, oshkora muloqoti yoʻlga qoʻyilib, murojaatlar imkon qadar ijobiy hal etilmoqda. Xalq davlat organlariga emas, davlat organlari xalqqa xizmat qilishi kerak, degan ulugʻvor gʻoyaga amal qilinib, aholining yashash darajasini yaxshilashga harakat qilinmoqda.

Amudaryo tumanidagi Xalq qabulxonasi tomonidan ham jismoniy va yuridik shaxslarning murojaatlarini koʻrib chiqish, muammolarini oʻrganish va hal etish borasida oʻtgan davrlar mobaynida tegishli ishlar amalga oshirildi.

Qabulxonaga shu yilning uch oyi davomida 391 ta masalada murojaatlar kelib tushgan boʻlib, shundan 342 tasi koʻrib chiqilgan, 49 tasi oʻrganilmoqda. Koʻrib chiqilgan murojaatlarning 276 tasi qanoatlantirilgan.

Maʼlumki, joriy yildan boshlab hokim yordamchilari faoliyatining natijadorligini oʻrganish, natijalarini xalq deputatlari viloyat, tuman va shahar Kengashlarida muhokama qilib borish amaliyoti yoʻlga qoʻyilgan. Shunga koʻra, Qabulxona tomonidan tumandagi hokim yordamchilari faoliyati ham muvofiqlashtirilib borilmoqda.

Hokim yordamchilari tomonidan joriy yil boshidan 35 393 xonadonlar xatlovdan oʻtkazilib, 4 ta toifaga ajratib olindi. Birinchi toifaga daromadi kam, ishsiz aʼzolari boʻlgan, daromad topishga, kasb oʻrganishga harakat qilayotgan 6114 ta xonadon, ikkinchi toifaga doimiy daromadga ega, qoʻshimcha daromad topish istagi boʻlgan 17551 ta xonadon, uchinchi toifaga nogironligi bor va kasal aʼzolari boʻlgan, boquvchisini yoʻqotgan hamda ijtimoiy himoyaga muhtoj 2640 ta xonadon, toʻrtinchi toifaga iqtisodiy ahvoli yaxshi va oʻziga toʻq 9088 ta xonadon kiritildi.

Xatlov oʻtkazilgan xonadonlarda 5 909 nafar mehnatga layoqatli ishsizlar aniqlanib, ularning 3565 nafarida ishlash, 294 nafarida kasb-hunar va tadbirkorlikka oʻqish, 1083 nafarida tadbirkorlik bilan shugʻullanish, 2075 nafar fuqarolarning kredit olish, yana 113 nafar fuqarolarning kooperatsiya asosida ishlash hohishi borligi aniqlangan.

Oilaviy tadbirkorlikni rivojlantirish dasturi asosida 2075 nafar fuqarolar tomonidan kredit olish uchun arizalar yuborilgan boʻlib, shundan 1172 tasi maqsadli deb topilib hokim yordamchilari tomonidan tavsiyanomalar berildi. Bugungi kunda 434 nafar fuqarolarga dastur doirasida 8,6 mlrd.soʻmlik kreditlar ajratilgan. Subsidiya asosida issiqxona qurib berish maqsadida 100 nafar fuqarolarga pul mablagʻlari ajratildi. Bugungi kunda 80 nafar fuqarolarga issiqxona qurib berish ishlari yakunlangan.

Tumandagi umumiy maydoni 775,5 gektar boʻlgan qishloq xoʻjaligi yerlarini ijaraga berish maqsadida 3054 ta lotlarga boʻlinib, auktsion savdo maydonchasiga joylashtirildi. Shundan auktsion natijasiga koʻra bugungi kunda salkam 415 gektar yer 1640 nafar fuqarolarga ajratilgan.

Hokim yordamchilari tomonidan oʻtkazilgan xatlov natijasida 2534 nafar ishlash istagini bildirgan mehnatga layoqatli ishsiz fuqarolar aniqlanib, bugungi kunda 1282 nafar fuqarolarning bandligi taʼminlangan.

Qabulxona xodimlari uyma-uy yurib ham, aholining oʻta sharoiti ogʻir, ijtimoiy himoyaga muhtoj qatlami oʻrganib chiqilmoqda. Oʻrganishlar davomida "Temir daftar", "Ayollar daftari" va "Yoshlar daftari"ga kiritilgan, lekin yordam koʻrsatilmasdan daftardan chiqarib yuborilgan hamda daftarga kiritilishi lozim boʻlgan oilalar daftarga kiritilmasdan eʼtiborsiz qoldirilgan bir qancha holatlar ham aniqlandi.

Boʻston mahallasida yashovchi 77 yoshli fuqaro Oʻrozgul Pirnafasovaning farzandi Asqar Qoʻchqorov oʻsma kasalligiga chalingan, 6 marotaba fizoterapiya muolajasini olgan. Bemorga har bir olingan muolaja uchun 6 mln. soʻmdan jami 36 mln. soʻm mablagʻ sarflangan. Nevarasi Toʻliboyev Jahongirning bosh miya qismida oʻsimta paydo boʻlgan, oʻz vaqtida davolanishi uchun Toshkent shahrida operatsiyani amalga oshirishga yoʻllanma ololmagan. Davolanishga mablagʻi boʻlmaganligi sababli bir koʻzi koʻrmay qolgan. Zudlik bilan jarrohlik yoʻli bilan davolanishi zarur boʻlsa-da, ushbu oila "Temir daftar"ga kiritilmasdan, eʼtiborsizlik bilan qaralib kelingani aniqlangan.

Xalq qabulxonasi koʻmagi bilan mazkur oila "Temir daftar"ga kiritildi va fuqaro Jahongir Toʻlibayevga bosh miya qismidagi oʻsimtani davolatishga Toshkent shahridagi tibbiyot muassasasiga borishiga bepul yoʻllanma olishda amaliy yordam berildi.

Tumandagi Xalq qabulxonasi tomonidan yillar davomida qiynab kelayotgan muammolarining qisqa muddatda bartaraf qilinayotganidan fuqarolar mamnun. Zero, davlatimiz rahbari taʼkidlaganlaridek, barcha ishlar tub zamirida xalqimizni rozi qilish maqsadi mujassamdir.

E.Rajabov, Xalq qabulxonasi mudiri.