Amudaryo tumani Davlat xizmatlari markazida seminar boʻlib oʻtdi

Mamlakatimizda davlat xizmatlari koʻrsatish tizimi izchillik bilan takomillashtirilmoqda va modernizatsiya qilinmoqda. Jumladan, xalq ogʻirini yengil qilish, ularga “davlat-fuqaro” munosabatlarida qulaylik yaratish va shaffoflikni taʼminlash maqsadida koʻplab tizimli ishlar amalga oshirilmoqda.

Amudaryo tumani Davlat xizmatlari markazida maʼnaviy-maʼrifiy ishlarning yangi tizimini yaratish hamda davlat tili toʻgʻrisidagi qonun hujjatlariga rioya etilishini taʼminlash, shuningdek, fuqarolarga davlat xizmatlari koʻrsatilishi qanday tartibda amalga oshirilishi bilan yaqindan tanishtirish maqsadida koʻrgazmali seminar tashkil etildi.

Seminar tuman Adliya boʻlimi Davlat xizmatlari markazi boshligʻi Moʻʼminjon Matyusupov, yuridik xizmat koʻrsatish markazi boshligʻi Nilufar Jumaniyazova va bosh yuriskonsultlari Mansur Matyusupov, Shavkat Vaisniyazov, Jurʼat Avezov, Abror Tojiboyev, Said Sultanovlar boshchiligida oʻtkazildi.

Seminarni tuman Adliya boʻlimi Davlat xizmatlari markazi boshligʻi Moʻʼminjon Matyusupov ochib berdi va davlat xizmatlari sohasida yangidan tadbiq etilgan davlat xizmatlari turlari boʻyicha tushunchalar berdi.

Shundan soʻng, fuqarolarga Yuridik xizmat koʻrsatish markazi xodimlari tomonidan idora va tashkilotlarda yuridik tusdagi hujjatlarini rasmiylashtirilish tartibi, yillik mehnat taʼtillarini berish, taʼtilni uzaytirish va boshqa muddatga koʻchirish, mehnat shartnomasini bekor qilish, mehnat daftarchalarini yuritish tartibi va my.mehnat.uz sayti orqali rasmiylashtirish jarayonlari, xodimlarni intizomiy jazoga tortish va muddatidan oldin olib tashlash tartiblari haqida keng turda maʼlumotlar berildi.

Seminar davomida fuqarolarga elektron davlat xizmatlaridan foydalanish tartib va qoidalari boʻyicha tushunchalar berilib, fuqarolardan kelib tushgan barcha savollarga toʻliq javoblar berildi.

 Shu bilan bir qatorda E-huquqshunos tizimi orqali kelib tushayotgan yuridik tusdagi hujjatlarni rasmiylashtirishda eʼtibor qaratilishi lozim boʻlgan muhim jihatlarga toʻxtab oʻtildi.

Seminarda tuman Adliya boʻlimi Fuqarolik holati dalolatnomalarini yozish boʻlimi boshligʻi Sanobar Xolbayeva koʻrsatilayotgan davlat xizmatlari va Fuqarolik holati dalolatnomalarini yozish xizmatlarini soddalashtirish hamda aholiga yaratilayotgan qulayliklar yuzasidan qonunchilikdagi yangiliklar boʻyicha maʼruza qildi.

“Madad” nodavlat notijorat tashkilotining bosh maslahatchisi Davron Pirmanov esa maslahat byurosiga kelib tushayotgan mehnat nizolari, oilaviy munosabatlar, fuqarolarning ijtimoiy muhtoj qatlamiga nafaqa olish hamda qonunchilikdagi yangiliklar boʻyicha keng tarzda tushunchalar berdi.

Seminar davomida har bir mavzu boʻyicha ishtirokchilar oʻzlarini qiziqtirgan savollariga qonuniy asoslantirilgan javoblar oldilar va seminardan mamnun boʻlib, bunday seminarlar tumanimizning chekka hududlarida ham sayyor tarza tashkil etilishi lozimligi boʻyicha oʻz takliflarini bildirdilar.

Amudaryo tumani Adliya boʻlimi.