Mahalladagi xotin-qizlar faoliyatini samarali tashkil etishga bagʻishlangan oʻquv-seminar boʻlib oʻtdi

Oʻzbekiston Respublikasi Prezidentining 2022-yil 1-martdagi “Oila va xotin-qizlar bilan ishlash, mahalla va nuroniylarni qoʻllab-quvvatlash tizimini takomillashtirish chora-tadbirlari toʻgʻrisida”gi farmoniga asosan respublikamizning har bir shahar va qishloqlarida shuningdek, ulardagi har bir ovul va mahallalarda Xotin-qizlar faoli lavozimi joriy etilgan edi.

Respublikamizning barcha hududlarida boʻlgani singari Amudaryo tumanidagi 49 ta ovul va mahalla fuqarolar yigʻinlariga ham xotin-qizlar faollari tayinlandi.

Xotin-qizlar faollari xotin-qizlarni oila, mahalla va mehnat jamoalarida ijtimoiy-huquqiy jihatdan qoʻllab-quvvatlash, ularning ijtimoiy-siyosiy faolligini oshirish, maʼnaviyatini yuksaltirish, yoshlarni oilaviy hayotga tayyorlash, zamonaviy namunali oilani shakllantirish, uning maʼnaviy-axloqiy muhitini va anʼanaviy oilaviy qadriyatlarni mustahkamlash boʻyicha maqsadli chora-tadbirlarni amalga oshiradi.

Amudaryo tumanida xotin-qizlar faollari faoliyatini samarali tashkil etish maqsadida oʻquv seminarlari oʻtkazilib kelinmoqda. Jumladan, mahalladagi xotin-qizlar faollari uchun ehtiyojmand oilaning ijtimoiy himoyasi va mahallada ijtimoiy xizmatlarni yuritish ishlarini tashkil qilish maqsadida 23-maydan 27-mayga qadar 5 kunlik oʻquv-seminar oʻtkazilmoqda.

 24-may kuni Aniq fanlarga ixtisoslashtirilgan iqtidorli bolalar maktabida boshlangan oʻquv seminarining ikkinchi kunida tuman hokimining oʻrinbosari, Oila va xotin-qizlar boʻlimi boshligʻi Goʻzal Saburova yuqoridagi masalalar boʻyicha xotin-qizlar faollariga tushuntirishlar berdi.

Seminarda tumanda faoliyat yuritayotgan korxona va tashkilot mutasaddilari ishtirok etib, xotin-qizlar faollariga ish faoliyatlari davomida zarur boʻladigan barcha nazariy va amaliy bilimlarini berishdi.

Maʼlumot oʻrnida aytish kerakki, endigina ish faoliyatini boshlagan xotin-qizlar faollari oʻzlarining bor bilim va tajribalari bilan harakat qilib, mahalladoshlari eʼtirofiga sazovor boʻlishmoqda.

Jumladan, 2-sektor hududidagi xotin-qizlar faollari tomonidan 11 ming 854 xonadonda istiqomat qiluvchi 33 ming 498 nafar xotin-qizlarni xatlovdan oʻtkazish toʻliq yakunlandi. Undan tashqari, 29 ming 995 nafar xotin-qizlar haqidagi maʼlumotlar maxsus dasturga kiritildi.

2-sektor rahbariyati huddagi xotin-qizlar faollari bilan samarali tarzda hamkorlik olib bormoqda. Shuningdek oʻz ish faoliyatini namunali tarzda tashkil qilgan faollar sektor rahbariyati tomonidan munosib ravishda taqdirlanmoqda.

Tuman prokurori, 2-sektor rahbari Aziz Roʻzmetov 24-may kuni sektor hududidagi mahallalarning xotin-qizlar faollari bilan uchrashib, xatlov tadbirlarida faol ishtirok etgan Xizr eli, Boʻzsolma, Qilichboy va boshqada ovul hamda mahalla fuqarolar yigʻinlarining xotin-qizlar faollariga tashakkurnoma eʼlon qilib, birinchilar qatorida boʻlgan 3 nafar xotin-qizlar faollariga qimmatbaxo sovgʻalar topshirdi va ularning kelgusidagi ish faoliyatiga omadlar tiladi.

Ishonamizki, mahallalardagi xotin-qizlar faollari xotin-qizlarning taʼlim va kasbiy koʻnikmalar olishlari, munosib ish topishlariga koʻmaklashish, tadbirkorligini qoʻllab-quvvatlash, iqtidorli yosh xotin-qizlarni aniqlash va ularning qobiliyatlarini toʻgʻri yoʻnaltirish, gender tenglikni taʼminlash, xotin-qizlarning ijtimoiy-siyosiy faolligini oshirish ishlariga munosib hissa qoʻshadilar.

Tuman hokimligining Axborot xizmati.