Kelajak – maktab oʻqituvchisining qoʻlida

Taʼlim-tarbiyaning targʻibotchisi oʻqituvchi ekanligini sharqning buyuk mutafakkirlari qayta-qayta eʼtirof etishgan.

Alloma Abu Nasr Farobiy fikricha, har bir inson ham baxtni va narsa-hodisalarni oʻzicha bila olmaydi. Unga buning uchun ustoz lozim va taʼlim-tarbiya jarayoni tajribali, ilmli ustoz tomonidan maʼlum maqsadlarga yoʻnaltirilgan holda tashkil etilishi lozim.

"Taʼlim toʻgʻrisida”gi qonun qoʻygan asosiy maqsadlarga erishishda ham bosh rolni maktab pedagogik jamoasi oʻynashi sir emas. Bunda jamoaning aʼzosi boʻlmish oʻqituvchilarning kasbiy salohiyati, saviyasi juda muhim.

Oʻqituvchi zamondan bir-ikki odim oldinda boʻlishi kerak. Oʻz fani materillaridan tashqari davlatimiz siyosati, madaniyati va fanning boshqa sohalari boʻyicha yetarli bilimga ega boʻlib, taʼlim jarayoniga ijodiy yondashib, ijobiy natijalar beradigan yoʻllarni aniqlay oladigan darajada malakali boʻlmogʻi kerak.

Fanga, ilmga muhabbat oʻqituvchiga muhabbatdan boshlanadi. Oʻqituvchi uchun oʻz oʻquvchisining mehr-muhabbati katta baxt, katta mukofot. Oʻqituvchi eʼtibor berishi lozim boʻlgan yana bir zarur xislat – odillikdir. Oʻquvchilar adolat bilan ish tutadigan, vaziyatga xolisona baho beradigan oʻqituvchini qadrlaydilar.

Yurtboshimiz I.Karimov soʻzlari bilan aytsak, "Oʻqituvchilik mansab emas, balki masʼuliyatdir”.

Shubhasiz, obroʻ qozonish oson ish emas, buning uchun oʻqituvchi yillar davomida har qanday pedagogik jarayonda har bir oʻtayotgan darsining muqaddasligini his qilib, masʼuliyatni sezishi kerak.

Yurtimizda oʻqituvchi-murabbiylar faoliyatiga yetarli eʼtibor qaratilmoqda, maʼnaviy jihatdan qoʻllab-quvvatlanmoqda. Shu oʻrinda maktab faoliyatining muvaffaqiyatini chin dildan istagan har bir rahbar xodim avvalo mazkur maktab oddiy oʻqituvchilarining mehnatini, pedagoglik mahoratini toʻgʻri baholashi, u erishgan muvaffaqiyatlari uchun ragʻbatlantirishni adolatli tarzda toʻgʻri yoʻlga qoʻyishi lozim. Chunki bugungi kundagi oʻqituvchining mehnati bundan oʻn yillar oldingidan ancha murakkabligi bilan farq qiladi.

Yurtimizda 1-oktyabr – Oʻqituvchi va murabbiylar kuni umumxalq bayrami sifatida belgilangani oʻqituvchining jamiyatda yuksak mavqega ega ekanligining dalolatidir. Barcha ustozlarga shu eʼtiborga munosib boʻlishlarini tilab qolaman.

Toʻlgʻonoy POLVONOVA,

21-sonli maktab oʻqituvchisi.