XOTIRALAR TILGA KIRGANDA

Umr – oqar daryo, deyishadi. Haqiqatan ham, kunlarimiz oqar suv kabi oqib oʻtaveradi, aslo ortiga qaytmaydi. Kunlar ketidan haftalar, oylar, yillar koʻz ochib-yumguncha oʻtib ketadi. Yillar bilan boʻy talashib, insonning bolalik, oʻsmirlik, yoshlik davri shirin xotiralarga joylanadi. Olis yillar xotiralari ogʻushiga qaytib yashash, ayniqsa, bolalik va oʻsmirlik davrining unutilmas lahzalarini eslash insonga olam-olam zavq bagʻishlaydi.

Amudaryo tumanidagi 24-sonli umumtaʼlim maktabini 2002-yilda tugatgan sobiq sinfdosh doʻstlarning 20-yildan keyingi uchrashuvi ana shunday hayajonli lahzalarga boy boʻldi.

1991-yilda maktab ostonasiga ilk qadam qoʻygan jajji bolajonlar bugun hayotning achchiq-chuchugini totigan, oila qurib, har biri bir nechta farzandlarining maʼnaviy-axloqiy tarbiyasini oʻz zimmasiga olgan ota-onalar, oʻzlari faoliyat yuritayotgan mehnat jamoalarida hurmat-eʼtiborga munosib hamkasblar, tadbirkor va ishbilarmonlar darajasiga erishishgan.

Bolalikning  betakror orzulari, oʻsmirlik va yoshlik quvonchlari, begʻubor tuygʻulari bilan qayta oshno boʻlgan 21 nafar sobiq sinfdosh doʻstlar oʻzlarining jamiki shoʻxliklari-yu injiqliklarini koʻtargan va oq-qorani tanitib, mustaqil hayotga yoʻllagan muqaddas dargoh – maktab ostonasiga qadam qoʻyarkanlar, goʻyo oʻzlarini olis yillar xotiralari ichida yashayotganday his etdilar. Biri-biridan zavqli xotiralar ogʻushida oʻzlari taʼlim-tarbiya olgan sinfxonalariga kirib, aziz va moʻʼtabar ustozlari bilan dildan suhbat qurdilar.

Sobiq sinfdoshlarning birinchi oʻqituvchisi Uman Sogʻinboyeva har bir oʻquvchisining oʻziga xos xulq-atvori, ilm olishga boʻlgan qiziqishlari va intilishlari haqida toʻlqinlanib soʻzladi. Ayniqsa, alifboni oʻrganishdagi bolalarning oʻziga xos musobaqasi, karra jadvalini birgalikda yodlaganlarini maroq bilan faxrlanib hikoya qildi.

Ustoz va shogirdlarning dildan, samimiy suhbatlari, barchasi ulgʻayib, hayot haqidagi tasavvurlari, dunyoqarashlari kengaygan, jamiyatda oʻz oʻrniga ega shaxslar sifatida shakllanib ulgurgan sobiq sinfdosh doʻstlarining qadrdonlik tuygʻulari bilan kechgan diydorlashuv tadbiri fayzli dasturxon atrofida yanada joʻshqinlik kasb etdi. Sobiq sinfdosh doʻstlar bir-birlariga samimiy tilaklarini izhor etishdi. Oʻzlari erishayotgan yutuqlar, yangi rejalari xususida toʻlqinlanib soʻz yuritishdi. Barchasi birgalashib, ustozlarini sharaflovchi sheʼrlar aytishdi.

Tadbir davomidagi musiqiy lahzalar barchaga xush kayfiyat bagʻishladi. Sobiq sinfdosh doʻstlar raqsga tushib, bir-birlariga sheʼriy va musiqiy tabrik yoʻlladilar. Shu bilan birga oʻzlariga oq-qorani tanitib, joʻshqin hayot sari yoʻllagan qadrdon va muqaddas dargoh – maktab uchun oʻz sovgʻalarini topshirishdi.

Ota-onasiday mehr berib, orzulariga qanot bagʻishlagan aziz va moʻʼtabar ustozlariga guldastalar, hadyalar inʼom etdilar.

Sinfdosh doʻstlarning 20-yildan keyingi diydorlashuv marosimi hamisha aziz va biri-biriga qadrdon koʻngillarni yanada jipslashtirdi, goʻzal va betakror xotiralar tilga kirib, koʻngillarga joʻshqinlik baxsh etdi.

Robiya YOʻLDOShEVA.