“Bir nuroniy – oʻn yoshga masʼul” koʻrik tanlovi boʻlib oʻtdi

Mamlakatimizda keksa avlod vakillarini davlat tomonidan qoʻllab-quvvatlash, ularning ijtimoiy faolligini oshirish borasida qator chora-tadbirlar amalga oshirilmoqda.

Katta hayotiy tajribaga ega otaxon va onaxonlarimiz “Bir nuroniy – oʻn nafar yoshga masʼul” tamoyili asosida oʻzi istiqomat qilayotgan mahallada ish yuritib, tarbiyasi ogʻir, maʼnaviy koʻmakka muhtoj, uyushmagan, ishsiz yoshlarga biriktirilib, ularning muammolarini bevosita hal etishga yordam berib kelmoqda. Shu orqali nuroniylarimiz yoshlarni Vatanga sadoqat, milliy qadriyatlarga hurmat, mamlakatda oshirilayotgan islohotlarga daxldorlik, diniy bagʻrikenglik va millatlararo totuvlik ruhida tarbiyalanishiga va jamiyatda oʻz oʻrnini topishiga hissa qoʻshmoqda.

Ana shunday fidoyi nuroniylar ishtirokida mamlakatimiz boʻylab “Bir nuroniy ­­– oʻn yoshga masʼul” shiori ostida koʻrik-tanlovlar oʻtkazilmoqda. Joriy yil 18-iyun kuni Amudaryo tumani Madaniyat markazi binosida mazkur koʻrik-tanlovning tuman bosqichi boʻlib oʻtdi.

Tanlovning asosiy maqsadi har bir mahallalarda “Bir nuroniy – oʻn yoshga masʼul” loyihasi asosida yoshlarga biriktirilgan nuroniylarni jamiyat hayotiga faol jalb qilish, ularning ijtimoiy faolligini oshirish, yoshlarimiz tarbiyasida keksa avlod vakilllarining tajribasidan foydalanish, jinoyatchilik va huquqbuzarliklarni oldini olish, ajrim yoqasida turgan yosh oilalar oʻrtasida barqaror muhitni vujudga keltirish borasida amalga oshirilayotgan ishlarni targʻib qilish va ijrosini taʼminlashda faol ishtirok etayotgan ijtimoiy faol nuroniylarni ragʻbatlantirish hisoblanadi.

Tanlovning tuman bosqichi Mahalla va nuroniylarni qoʻllab-quvvatlash boʻlimi, Qoraqalpogʻiston Respublikasi “Nuroniy” jamgʻarmasi, tuman Maʼnaviyat va maʼrifat boʻlinmasi, Yoshlar ishlari agentligi hamkorligida oʻtkazildi.

Tanlovda ishtirokchilar 3 ta shart, yaʼni tanishtiruv, “Yoshlar – bizning kelajagimiz” mavzusida ishtirokchilar amalga oshirgan ishlar yuzasidan hayʼat aʼzolariga yozma maʼlumot va fotoalbom shaklida taqdimot qilish hamda oʻziga biriktirilgan uyushmagan, tarbiyasi ogʻir, maʼnaviy koʻmakka muhtoj boʻlgan yoshlar bilan amalga oshirgan ishlari va erishgan natijalarini, shuningdek, yoshlarning muammolariga yechim topgani va ajrim yoqasida turgan oilalarni yarashtirgani boʻyicha fakt va misollar taqdimoti orqali oʻzaro bellashdilar.

Tanlovning yakuniy natijalariga koʻra eng yuqori bal toʻplagan Bobur nomli ovulning faoli Murotboy Soburov faxrli 1-oʻrinni qoʻlga kiritdi va tashkiliy qoʻmita tomonidan 3 million soʻm pul mukofoti bilan taqdirlandi.

Shuningdek, 2-oʻrinni qilichboylik ishtirokchi Amina Yusupova qoʻlga kiritib, 2 million soʻm bilan, 3-oʻrinni qoʻlga kiritgan Beruniy nomli mahalla faoli Shukurjon Xoʻjamuratova esa 1 millin soʻm pul mukofoti bilan taqdirlandi.

Bundan tashqari, 3 nafar ishtirokchilar, jumladan, Boʻz solma mahallasidan tashrif buyurgan ishtirokchi Salomat Madaminova, Namuna mahallasi faoli Farhod Avezov va Durunki mahallasidan kelgan faol nuroniy Davlatboy Oʻrazovlarning har biri faol ishtirki uchun tashkiliy-qoʻmita tomonidan 500 ming soʻm pul mukofoti bilan taqdirlandi.

Qoraqalpogʻiston Respublikasi Mahalla va nuroniylarni qoʻllab-quvvatlash vaziri maslahatchisi, Qoraqalpogʻiston Respublikasi “Nuroniy” jamgʻarmasi raisi va tanlovning tashkiliy-qoʻmitasi raisi Tursunboy Abdijabbarov gʻoliblar va sovrindorlarni tabriklab, Qoraqalpogʻiston Respublikasi bosqichiga yoʻllanmani qoʻlga kiritgan Bobur nomli ovulning faol nuroniysi Murotboy Saburovga omad tiladi va barcha ishtirokchilarga oʻz minnatdorligini bildirib oʻtdi.

Tanlov yakunida tadbir ishtikorchilari va tomashabinlariga “Toʻlqinjon” kafesida osh berildi.

Sevara ISMOILOVA, QDU talabasi