PROBATsIYa HISOBIDAGI 11 NAFAR MAHKUM MUDDATIDAN ILGARI JAZODAN OZOD ETILDI

Navoiy nomli mahallada tuman Ichki ishlar organlari Probatsiya guruhi hisobida turgan mahkumlarni muddatidan ilgari jazodan ozod qilishga doir ish Jinoyat ishlari boʻyicha Taxiatosh tuman sudi tomonidan sayyor tartibda koʻrib chiqildi.                      
Shu yil 23-iyun kuni fuqarolar yigʻini binosida boʻlib oʻtgan mazkur sud majlisida Jinoyat ishlari boʻyicha Taxiatosh tuman sudi masʼullari, Amudaryo tuman prokurori yordamchisi Sanjar Xolmuradov, tuman Ichki ishlar organlari Probatsiya guruhi katta inspektori Ruslan Iskandarovlar qatnashishdi.
Sayyor sudda masʼullar soʻnggi yillarda mamlakatimizda jazoni ijro etish tizimini takomillashtirish, qayta jinoyat sodir etilishining oldini olish maqsadida mahkumlarni axloqan tuzatish va ijtimoiy moslashtirish ishlarining samaradorligini oshirish yuzasidan kompleks chora-tadbirlar amalga oshirilayotgani xususida soʻz yuritdilar. Shuningdek, tumanda ham ichki ishlar organlari Probatsiya guruhi nazorati ostidagi ozodlikdan mahrum qilish bilan bogʻliq boʻlmagan jazolarga hukm qilingan shaxslarni ijtimoiy hayotga moslashtirish, ularning bandligini taʼminlash, oʻqishga va ishga joylashtirish, nazorat ostidagilarga ijtimoiy, huquqiy va psixologik yordam koʻrsatish, eng asosiysi, shaxsni  tarbiyalash kabilar borasida samarali chora-tadbirlar amalga oshirilayotgani taʼkidlab oʻtildi.
Shundan soʻng, Amudaryo tumani ichki ishlar organlari Probatsiya guruhi tomonidan 11 nafar mahkumga nisbatan kiritilgan taqdimnomalar koʻrib chiqildi.
Sud davomida Probatsiya hisobida turgan mahkumlardan birining ilgari Oʻzbekiston Respublikasi Jinoyat Kodeksining 169-moddasida koʻrsatilgan jinoyatni sodir qilganlikda ayblanib, 5-yil 3 oy muddatga ozodlikdan mahrum qilish jazosi tayinlangani, jazoning oʻtalmagan 3-yil 5 oydan ziyod muddati 20 foiz axloq tuzatish ishlari jazosiga almashtirilgani, qurilish tashkilotlaridan birida ishchi boʻlib ishlayotgani, shu kunga qadar jazoni oʻtash tartib va qoidalariga toʻliq amal qilib kelayotgani maʼlum qilindi. Xuddi shu moddaning 2-qismida koʻrsatilgan jinoyatni sodir qilgani uchun 3-yil muddatga ozodlikni cheklash jazosiga tortilgan 3 nafar mahkumning ham tegishli tartib-qoidalarga rioya qilib kelayotgani aytib oʻtildi.
Shuningdek, mahkumlardan yana 2 nafari Oʻzbekiston Respublikasi Jinoyat Kodeksining 266-moddasi bilan jazoga tortilgani, 3-yil muddatga barcha turdagi transport vositalarini boshqarish huquqidan mahrum qilinib, 3-yil muddatga 20 foiz axloq tuzatish ishlari jazosiga sudlangani, oilaviy korxonalardan birida avtomobil yuvuvchi, ishchi boʻlib ishlab kelayotgani aytildi.
Undan tashqari, Oʻzbekiston Respublikasi Jinoyat Kodeksining 118-moddasi 2-qismiga koʻra jazoga tortilgan 2 nafar, 168-moddasi 2-qismiga koʻra 1 nafar mahkum, 131-moddasi 2-qismiga koʻra jazosini oʻtayotgan  1 nafar mahkumalarning ham hozirda oʻzining xulq-atvori, hatti-harakatlari bilan toʻliq tuzalish yoʻliga oʻtganligi, toʻgʻri hayot tarziga amal qilib, sogʻlom muhitda yashayotganligi taʼkidlab oʻtildi.
Sud ishi davomida tomonlarning fikrlari tinglanib, ish materiallari bilan taqqoslanib koʻrildi. Ish yakunida ushbu mahkumlar jazoni oʻtash tartib-qoidalariga amal qilib, sud tomonidan zimmasiga yuklatilgan majburiyatlarni bajargani va mehnatga halol munosabatda boʻlgani uchun oʻtalmagan jazo muddatidan Oʻzbekiston Respublikasi Jinoyat kodeksining 73-moddasiga asosan muddatidan ilgari shartli ravishda ozod qilindi.
Ularga doim toʻgʻri yashashga odatlanish lozimligi, jamoat joylarida axloq-odob qoidalariga amal qilishi, jinoyat yoʻliga endi kirmaslik kerakligi,  tushuntirildi.
Shuningdek, qilmishiga yarasha sud hukmiga koʻra berilgan jazoni oʻtashdan boʻyin tovlab kelganligi uchun 1 nafar mahkumga nisbatan belgilangan axloq tuzatish ishlari jazosi ogʻirroq turdagi, yaʼni ozodlikni cheklash jazosiga almashtirildi.

A.Koshanov, Jinoyat ishlari boʻyicha Taxiatosh tuman sudi raisi.