Hokim yordamchisi: Asosiy maqsadimiz − xalqni rozi qilish

Turkmaniston Respublikasiga chegaradosh hududlardan biri – Amudaryo tumanining chekka hududlaridan hisoblangan Doʻrman ovulida hayot qaynamoqda. Bu yerda istiqomat qiluvchi fuqarolar oʻtayotgan har bir kunidan rozi boʻlib, ertangi kunga umid bilan yashayotgani yuzlarida aks etib turibdi.

Doʻrman ovulida aholi bandligini taʼminlash hamda kambagʻallikni qisqartirish masalalari boʻyicha hokim yordamchisi Mahmudjon Narbayev ham bu borada oʻz vazifasini sidqidildan bajarib, ovulda tadbirkorlar safini kengaytirish, oilalarning daromad manbalariga ega boʻlishlarini taʼminlash maqsadida tizimli ravishda ish olib bormoqda.

Hokim yordamchisi ushbu lavozimga tayinlangan kunidan eʼtiboran aholini xatlovdan oʻtkazib, 4 toifaga ajratib oldi. Birinchi toifaga kiruvchi yaʼni, daromadi kam, lekin daromad topishga harakat qilayotgan xonadon egalaridan biri, Komil Hojiboyevning farzandlariga 25 sotixdan yer olishida amaliy yordam berildi. Bugungi kunda Hojiboyevlar oilasi oʻz oilaviy tadbirkorligini yoʻlga qoʻyib qovun, tarvuz, sabzi, piyoz kabi poliz mahsulotlarini yetishtirmoqda.

Shuningdek, olingan hosil bozor rastalariga yetib bormasdanoq, xaridorgir boʻlib, dala boshida sotilmoqda. Xonadon egalari yetishtirilgan poliz mahsulotlarining birinchi terimida 15-20 mln. soʻm atrofida sof daromad koʻrish orqali oilaviy byudjetining barqarorlashuviga, qolaversa ishsiz yoshlarning bandligi taʼminlanishiga ham hissa qoʻshdi.

 Aytish kerakki, mahallalarda ish boshlagan hokim yordamchilari “xonadonbay” ishlash orqali aholi muammolarini oʻrganib bevosita hal qilmoqdalar.

Doʻrman ovulida xatlovdan oʻtkazilgan 501 xonadonda istiqomat qiluvchi 2 ming 661 nafar fuqarolarning ijtimoiy ahvoli oʻrganib chiqilib, yordamga muhtoj fuqarolarga amaliy yordamlar koʻrsatilmoqda. Jumladan, hokim yordamchisining saʼy-harakatlari bilan 32 nafar fuqaro doimiy ish bilan taʼminlangan boʻlsa, 34 nafar fuqaro kasb-hunarga oʻqishga yoʻnaltirildi. Shuningdek, 49 nafar fuqaroga dehqonchilik bilan shugʻullanishlari uchun yer maydonlari uzoq muddatga ijaraga berildi.

Bundan tashqari, oʻz tadbirkorligini chorvachilik yoʻnalishi boʻyicha yoʻlga qoʻyishni istagan 9 nafar fuqaroga 221 mln. soʻmlik imtiyozli kredit evaziga zotdor sigir va qoʻy-echkilar olib berilgan boʻlsa, 6 nafar fuqaroga 187 mln. soʻmlik imtiyoli kredit evaziga texnika va asbob-uskunalar olib berilib, bandligi taʼminlandi.

Ovul aholisi orasida tadbirkorlikning baliqchilik, tikuvchilik va boshqa turlari bilan shugʻullanish maqsadida imtiyozli kredit olib, yuqori daromad manbaiga ega boʻlayotgan fuqarolar ham anchagina.

Hokim yordamchisining bevosita aralashuvi hamda yordami bilan bugun ushbu fuqarolarning bandligi taʼminlanib, oilaviy sharoiti yaxshilanmoqda. Eng muhimi, ular oʻtayotgan har kunidan rozi, erangi kunga ishonch bilan mehnat qilmoqdalar.

Tuman hokimligining Axborot xizmati.