Tuman hokimligining Axborot xizmati tomonidan OAV vakillari uchun media tur tashkil etildi

14-iyul kuni Amudaryo tumani hokimligining Axborot xizmati tomonidan tumandagi ommaviy axborot vositalari vakillari uchun media tur tashkil etildi.

Unda tuman hokimi oʻrinbosari Nodirbek Komolov, tuman hokimligining Axborot xizmati rahbari Fotima Eshimbetova, “Taraqqiyot koʻzgusi” gazetasi maxsus muxbirlari Robiya Yoʻldasheva, Oygul Rajabova hamda fotomuxbir Mahmudjon Shomuradovlar ishtirok etishdi.

Media tur doirasida jurnalistlar Mangʻit shahrining Gulzor mahallasi hududida yangidan barpo etilgan koʻp qavatli arzonlashtirilgan uy-joylarda yaratilgan shart-sharoitlar haqida batafsil maʼlumot oldilar.

Jurnalistlar yangidan qurilgan uy-joylarning eng muhim afzal tomoni − binolarning muhandislik kommunikatsiya tarmoqlariga ulanib, ijtimoiy va bozor infratuzilma obʼektlariga yaqin hududda joylashganini eʼtirof etishdi.

Darhaqiqat, yangi massivlarda qurilgan va qurilayotgan avtomobil yoʻllari, suv, gaz va elektr tarmoqlari, bolalar bogʻchalari, savdo shaxobchalari, sport maydonchalari aholining qulay shart-sharoitlarda yashashi uchun kompleks tizimni hosil qilmoqda.

 Media tur qatnashchilari uy egalarining xonadonlarida boʻlib, ular bilan ham yaqindan suhbatlashdilar. Aksariyat qismi yosh oilalardan iborat boʻlgan xonadon egalari yaratilgan sharoitlardan mamnun ekanligini bildirib oʻtishdi.

 Aytish kerakki, jami 15,6 mlrd. soʻm mablagʻ evaziga 3 ta 5 qavatli, jami 90 ta xonadonli uy-joylarning qurib bitkazilgani va foydalanishga topshirilgani uy-joyga muhtoj oilalrga katta sovgʻa boʻldi. Yangidan barpo etilgan mazkur uylarning har biri “Qishloq qurilish invest” masʼuliyati cheklangan jamiyati buyurtmasi asosida 5,5 mlrd. soʻm mablagʻ evaziga bunyod etildi.

Undan tashqari, ushbu uylarning 20-yil muddatga arzonlashtirilgan tartibda imtiyozli kredit asosida berilishi yosh oilalarga yaratilgan katta imkoniyatdir.

Tumanning meʼmoriy qiyofasini yaxshilash, yangi-yangi binolar barpo qilish va hududlarni obodonlashtirish ishlari zamirida, avvalo, odamlar uchun munosib turmush sharoitini yaratish maqsadi mujassamdir.

Jurnalistlar va ommaviy axborot vositalari vakillari tuman hokimligi va qurilish korxonasi masʼullariga yangidan bunyod qilingan uy-joylarga oid savollar bilan murojaat qilib, tegishli javoblar oldilar.

Tuman hokimligining Axborot xizmati