TUMAN IChKI IShLAR ShAXSIY TARKIBI TEST SINOVLARIDAN OʻTKAZILDI

2. Keyingi yillarda Ichki ishlar organlarida amalga oshirilayotgan islohotlar tizimdagi kadrlarning egallab turgan lavozimlarida samarali xizmat qilishini taʼminlashga qaratilganligi bilan juda ahamiyatlidir.

Aytish joizki, ichki ishlar organlari xodimlari zimmasiga aholining tinch va farovon hayot kechirishini taʼminlash, jinoyatchilikning oldini olish va jamoat tartibini saqlash kabi masʼuliyatli vazifalar yuklangan.

Keyinggi yillarda ichki ishlar organlari jazolovchi, nazorat qiluvchi organdan xalq, jamiyat va davlat manfaatlarini himoya qiladigan tuzilmaga aylandi. Natijada jinoyatlar va boshqa huquqbuzarliklar profilaktikasi, jamoat tartibini saqlash, aholi xavfsizligini taʼminlash fuqarolarning huquqlari, erkinliklari hamda qonuniy manfaatlarini himoya qilishda samarali ish olib borilmoqda.

Amudaryo tumani Ichki ishlar boʻlimi ham bugungi zamon talablariga hamohang faoliyat yuritishga intilmoqda, xizmat samaradorligini oshirish maqsadida kadrlar bilan ishlash, ularni qayta tayyorlash, malakasini va jismoniy, psixologik tayyorgarligini oshirib borishga alohida eʼtibor qaratilmoqda.

Ichki ishlar boʻlimi xodimlaridan jismonan kuchli, irodali, bilimli boʻlishdan tashqari, har qanday vaziyatda oʻzini qoʻlga ola bilish, toʻgʻri yoʻl tanlay olish qobiliyati ham talab etiladi. Boʻlim xodimlarining bunday tayyorgarligi Oʻzbekiston Respublikasi Ichki ishlar vazirining maxsus buyrugʻiga asosan xizmat, jismoniy, jangovor tayyorgarlik va psixologik test sinovlaridan oʻtkazish orqali aniqlab boriladi.

30-iyul kuni Amudaryo tumanidagi 2-sonli Bolalar-oʻsmirlar sport maktabiga qarashli stadionda tuman Ichki ishlar boʻlimi shaxsiy tarkibi aʼzolari xizmat, jangovor, jismoniy tayyorgarligini, bilimini sinovdan oʻtkazuvchi test sinovlari topshirishdi.

Shuni alohida taʼkidlash joizki, ushbu tadbirni oʻtkazishga alohida tayyorgarlik koʻrildi, xodimlarning har jihatdan yetukligini baholash uchun masʼuliyatli shaxslar biriktirildi va natijalar haqqoniy baholab borildi.

Tadbirda boʻlim shaxsiy tarkib aʼzolari toʻsinga tortilish, 100 metr masofaga yugurish, 1000 metr masofaga yugurish boʻyicha jismoniy tayyorgarligini namoyish etdilar. Shuningdek, test sinovlari orqali psixologik tayyorgarligi, bilimi ham aniqlandi.

Aytish joizki, “Ichki ishlar organlarida xizmatni oʻtash tartibi toʻgʻrisida”gi nizomga muvofiq xodimlarning xizmat, jangovar va jismoniy tayyorgarligini, maʼnaviy-axloqiy darajasini oshirish uchun ichki ishlar organlarida tizimli ravishda xizmat, jangovar va jismoniy tayyorgarlik mashgʻulotlari tashkil etiladi. Xodim maxsus tayyorgarlikdan, shuningdek jismoniy kuch ishlatish, maxsus vositalar va oʻqotar qurol qoʻllash bilan bogʻliq sharoitlarda harakatlanishiga kasbiy yaroqliligi boʻyicha har yilgi tekshiruvdan oʻtishi shart. Maxsus tayyorgarlikdan oʻtgan xodimga tegishli sertifikat beriladi.

Oʻtkazilgan jismoniy, jangovor tayyorgarlik va psixologik test sinovlarini Amudaryo tumani Ichki ishlar boʻlimi shaxsiy tarkibi aʼzolari muvaffaqiyatli topshirishib, oʻz xizmat lavozimiga munosib ekanliklarini namoyish etdilar.

Yana shuni taʼkidlash joizki, yuqoridagi Nizomga muvofiq xodimlar xayrixoh, xushmuomala va eʼtiborli boʻlishi, fuqarolar va hamkasblariga sabr-toqat va hurmat bilan munosabatda boʻlishi zarur. Xodimlar fuqarolarga nisbatan qoʻpollik qilmasligi, shaxsning shaʼni va qadr-qimmatini kamsitish, asossiz ruhiy va jismoniy taʼsir oʻtkazish holatlariga yoʻl qoʻymasligi kerak.

Bu esa ichki ishlar organlari tizimining chinakam xalqchil professional tuzilmaga aylanayotganidan dalolat beradi.

Oygul RAJABOVA.