“Ogohlik− davr talabi” mavzusida yigʻilish oʻtkazildi

9-avgust kuni Amudaryo tumanining Xitoy ovuli hududida joylashgan 85-sonli umumtaʼlim maktabi binosida 2-sektor rahbari, tuman prokurori Aziz Roʻzmetov, 3-sektor rahbari, tuman Ichki ishlar boʻlimi boshligʻi Muxammetali Xojamuratov, Davlat xafvsizlik xizmati Amudaryo tuman boʻlimi boshligʻi Sanjar Nazarov hamda 3-sektor hududidagi 12 ta ovul va mahalla fuqarolar yigʻini profilaktika inspektorlari, fuqarolar yigʻinlari raislari, hokim yordamchilari, xotin-qizlar faollari va yoshlar yetakchilari ishtirokida yigʻilish boʻlib oʻtdi.

Yigʻilishni Xitoy ovul fuqarolar yigʻini raisi Davlatbay Atajanov ochib berdi va yigʻilganlarni kun tartibidagi masala bilan tanishtirib oʻtdi.

Shundan soʻng, Davlat xafvsizlik xizmati Amudaryo tuman boʻlimi boshligʻi Sanjar Nazarov hududdagi ovul va mahallalarda jamoat tartibini saqlash, huquqbuzarliklarning oldini olish, yoshlarning turli buzgʻinchi va yot gʻoyalardan asrashda mahallalarda faoliyat olib borayotgan profilaktika inspektorlari, hokim yordamchilari, xotin-qizlar faoli, yoshlar yetakchilari hamda ularning faoliyatini muvofiqlashtirib turuvchi mahalla raislarining oʻrni muhim ahamiyatga ega ekanligini taʼkidladi.

Shundan soʻng 3-sektor rahbari − tuman Ichki ishlar boʻlimi boshligʻi Muxammetali Xojamuratov joriy yilning 1-2-iyul kunlari Qoraqalpogʻiston Respublikasining Nukus shahrida boʻlib oʻtgan ommaviy tartibsizliklarning sababi va oqibatlari haqida gapirib, yoshlarni tinchlikning qadriga yetish, ona Vatanga muhabbat ruhida tarbiyalash, buzgʻunchilikka, tartibsizlikka chorlovchi axborot hurujlaridan himoya qilish zarurligini, ijtimoiy tarmoqlarda tarqalgan barcha axborotlar ham ishonchli boʻlavermasligini taʼkidladi. Qolaversa, yoshlarning maʼnaviy dunyoqarashi boy boʻlsa, yot gʻoyalarga ergashmasliklari va hech qanday kuch ularni toʻgʻri yoʻldan adashtira olmasligini aytib oʻtdi.

Shuningdek yigʻilishda yoshlarimiz erishayotgan yutuqlar, xususan, Hindistonning Chennay shahrida boʻlib oʻtgan 44-Butunjahon shaxmat olimpiadasida chempionlikni qoʻlga kiritgan jamoamiz aʼzolarining erishgan yutuqlari hamda “Yosh kitobxon oila” tanlovining Respublika bosqichi gʻoliblari boʻlgan Oʻrinboyevlar oilasini misol keltirib, barcha yoshlarni koʻproq kitob oʻqish, bilim olish, kasb-hunar egallashga hamda boʻsh vaqtini mazunli oʻtkazishga daʼvat qildi.

Shundan soʻng 2-sektor rahbari, tuman prokurori Aziz Roʻzmetov yigʻilganlarni yoshlarga oid yangiliklar, qabul qilinayotgan qarorlar va farmonlar bilan tanishtirib oʻtdi. Yangi oʻquv yilidan magistraturada oʻqiyotgan qizlarning kontrakt pullari byudjetdan toʻlab berilishi, bakalavrda taʼlim olayotgan qizlarga 7-yilga foizsiz kreditlar ajratilishi ayol-qizlarga qaratilgan katta eʼtibor va imkoniyatning namunasidir.

 Qolaversa, Vazirlar mahkamasining 2022-yil 7-iyundagi “Yoshlar muammolarini oʻrganish va hal etish tizimini yanada takomillashtirish chora-tadbirlari toʻgʻrisida”gi qaroriga asosan, endi yoshlar 18 yoshdan emas, 14 yoshga toʻlgandan keyin “Yoshlar daftari”ga kirishi mumkin.

Aytish kerakki, yoshlar uchun yaratilayotgan bu kabi imkoniyatlar ularning barcha orzu-intilishlarini ruyobga chiqarishda muhim omil boʻlib xizmat qilmoqda.

Yigʻilish yakunida 3-sektor hududida xizmat vazifasini bajarayotgan profilaktika inspektorlari, mahalla raislari, yoshlar yetakchilariga yoshlar bilan ishlashning oʻziga xos yoʻnalishlari boʻyicha tushuntirishlar berilib, muhim vazifalar belgilab olindi.

Tuman hokimligining Axborot xizmati.