BAXTIYoR BOLALAR YuRTI

Xalqimizda asrlar sinovidan oʻtgan ajoyib hikmat bor: "Mehnat kishini ulugʻlaydi”. Haqiqatan ham, inson oʻz halol va fidoyi mehnati tufayli qadr topadi. Hayotini, turmush tarzini ham Alloh tomonidan oʻziga berilgan ulugʻ imkon – mehnat tufayli bezaydi, oʻzgartiradi, yangilaydi. Shunday ekan, mehnatga munosabat turli ellarda, mamlakatlarda turlicha shakllarda namoyon boʻladi. Jahonning koʻplab davlatlarida hamon kuchli kuchsizni, boy kambagʻalni, hatto katta yoshdagilar oʻzidan kichiklarni, ayniqsa balogʻat va oʻsmir yoshiga yetmagan bolalarni yollab, ezib ishlatish holatlari mavjud. Shular haqida oʻylarkanman, yaqin oʻtmishda, sobiq shoʻrolar tuzumi davrida oʻzimning ham bolaligim, oʻsmirlik davrim dalada ketmon chopish, ming bora egilib-bukilib paxta terish bilan oʻtgani yodimga tushadi. Oʻsha ogʻir yillarda to dekabr oyining qor-qirovli kunlarida ham oyoqlarimiz muz qotib paxta terganimiz, kechalari ota-onamiz bilan birga koʻsak chuvib chiqqanlarimizni, oʻquvchi boʻlsak-da ertalab zimmamizdagi falon kilo paxta terish "norma”mizni bajarishga intilgan kunlarimizni oʻylasam, bugungi fayzga toʻla hayotga shukronalar aytaman.

Ming bora shukurki, mustaqillik tufayli Oʻzbekistonda inson mehnatiga, inson omiliga munosabat tubdan oʻzgardi. Ayniqsa, bolalar va balogʻat yoshiga yetmagan oʻsmir-yoshlar mehnatidan foydalanishga chek qoʻyildi. Bugungi Oʻzbekiston bolalari, yoshlari mehnat qachon insonni ulugʻlashini, inson qaysi yoshdan mehnat maydoniga kirishi mumkinligini juda yaxshi biladilar. Birov kelib "dalaga chiq”, desa, ergashib ketavermaydilar. Chunki, bugungi oʻquvchi-yoshlarimiz bizdan koʻra aqlli, bilimdon. Eng asosiysi, mamlakatimizda voyaga yetmaganlar mehnatidan foydalanishni cheklashga doir qonuniy asoslar yaratilgan.

Xalqaro mehnat tashkilotining ratifikatsiya qilingan Konventsiyalarini amalga oshirish maqsadlarini ifoda etuvchi qator qarorlar qabul qilingan. Xususan, Oʻzbekiston Respublikasi Vazirlar Mahkamasining 2014-yil 27-maydagi "Xalqaro mehnat tashkiloti (XMT)ning Oʻzbekiston Respublikasi tomonidan ratifikatsiya qilingan Konventsiyalarini 2014-2016-yillarda amalga oshirishga doir qoʻshimcha chora-tadbirlar toʻgʻrisida”gi 132-sonli qarorining hayotga tatbiq etilishi natijasida joriy 2014-yilda ham taʼlim muassasalarida va oilalarda kelajagimiz egalari boʻlgan bolalarni ogʻir mehnatga jalb qilishga chek qoʻyildi. Endilikda mamlakatimizda ota-ona yoki taʼlim muassasasi xodimi voyaga yetmagan bolalarni ogʻir mehnatga jalb qilish, yollab ishlatishi jinoyat ekanligini ham yaxshi bilishadi.

Tumanimizda esa Vazirlar Mahkamasining yuqoridagi qarori hamda Xalqaro mehnat tashkilotining bolalar mehnatidan foydalanishni taʼqiqlashga doir muhim qonuniy hujjatlari soʻzsiz ijro etildi.

Eng asosiysi, yurtimizda kelajagimiz egalarining har tomonlama yetuk insonlar boʻlib yetishishi, chuqur bilim olishlari va boʻsh vaqtlarini mazmunli oʻtkazishlari uchun zarur shart-sharoitlar yaratilgan. Dunyoning hech bir mamlakatida taʼlim tizimiga, yosh avlod tarbiyasiga bizning yurtimizdagidek davlat siyosati darajasida eʼtibor qaratilmasa kerak. Hatto eng chekka qishloqlarimizda ham zamonaviy koʻrinishdagi taʼlim maskanlari, sport inshootlari, maʼnaviyat-maʼrifat markazlari oʻquvchi-yoshlarni oʻz bagʻriga olgan.

Bir vaqtlar, aniqrogʻi, yaqin oʻtmishda – shoʻrolar tuzumi davrida farzandlarimiz qahraton qish kirguncha bir necha oylab paxta terimiga jalb etilgan boʻlsalar, mustaqillik bolalari asosiy vaqtlarini ilm sirlarini oʻrganishga, darsdan boʻsh paytlarini esa musiqa, sport va boshqa sohalar boʻyicha tashkil qilingan toʻgaraklarda oʻtkazmoqdalar, hunar oʻrganishga bagʻishlamoqdalar. Tumanimizning chekka qishlogʻi – Boʻz yop ovulidagi bizning 10-sonli maktabimiz oʻquvchilari ham kuzning ilk kunlarida yangi oʻquv yilini boshlab, ayni kunlarda ikki oy davomida olgan bilim-larini sinovdan oʻtkazib, oʻquv yilining birinchi choragini muvaffaqiyatli yakunlamoqda.

Bugun barcha sharoitlarga ega zamonaviy taʼlim maskanlarida ilm oʻrganayotgan oʻquvchilar orasidan ertaga fermerlar, sanoatchilar, tadbirkorlar, olimlar, davlat va jamiyat arboblari yetishib chiqishiga albatta ishonamiz. Chunki, ularning har jihatdan yetuk va barkamol avlodlar boʻlib shakllanishi davlat va jamiyat eʼtiborida.

Gulasal MATYoQUBOVA,

10-sonli maktab direktori,

xalq deputatlari tuman Kengashi deputati.