“Maʼnaviyat festivali” doirasidagi tadbirlar davom etmoqda

Respublikamizning turli hududlarida mustaqilligimizning 31 yillik bayrami oldidan tashkil etilgan “Maʼnaviyat festivali” doirasidagi tadbirlar Amudaryo tumanida ham koʻtarinki ruhda boʻlib oʻtdi.

Toshkent shahridan bir guruh madaniyat va sanʼat xodimlari, el suygan ijodkorlar, teatr aktyor va aktrisalari, shoiralar bilan birga tumanimizga “kitob karvonlari”, “kino karvonlari” ham yetib keldi.

15-avgust kunidan boshlab tumanimizning turli hududlarida, eng chekka ovul va mahallalarda ham tadbirlar tashkil etilib, aholiga maʼnaviy hordiq ulashildi. Qolaversa, imkoniyati cheklangan yoshlar holidan ham xabar olinib, ularga badiiy kitoblar sovgʻa qilindi.

18-avgust kuni Olmazor mahallasi hududida joylashgan “Xotira maydoni”da “Yangi oʻzbekistonda el aziz, inson aziz!” shiori ostida gala kontsert boʻlib oʻtdi.

Kontsert dasturida tuman hokimi Sultonboy Yoʻldashev, Toshkent shahridan tashrif buyurgan el eʼzozidagi mehmonlar, mehnat faxriylari, yoshlar, kattalar, keksalar ishtirok etishdi.

Millatlararo doʻstlik, hamjixatlik, oʻzaro qon-qarindoshlik va birodarlik nafasi kezib yurgan “Xotira maydoni” bir zumda bolalarning shoʻx-shodon kulgusi va ulugʻ yoshli insonlarning tinchlik-omonik haqidagi shukronalik soʻzlari bilan toʻlib toshdi.

Tadbirda tuman hokimi Sultonboy Yoʻldashev barchani yaqinlashib kelayotgan Oʻzbekiston Respublikasi davlat mustaqilligining 31 yillik bayrami bilan samimiy tabrikladi. Yurtdoshlarimizning xonadonlariga qut-baraka, xotirjamlik tiladi.

Shuningdek, Toshkent shahridan tashrif buyurgan bir guruh madaniyat va sanʼat xodimlariga oʻz ijod namunalari bilan xalqimizga maʼnaviyat va maʼrifat ulashganliklari uchun minnaddorlik bildirdi.

Tadbir davomida Oʻzbekistonda xizmat koʻrsatgan madaniyat xodimi Zulfiya Moʻminova qoraqalpoq eliga muhabbatini oʻzining goʻzal satrlari bilan izhor etdi. Qolaversa, Amudaryo tumanining aholisi mehmondoʻst, mehnatkash va tanti insonlar ekanligini, qishloqlarda istiqomat qiluvchi oddiy insonlar orasida ham yuksak isteʼdod sohiblari bor ekanligini aytib oʻtdi.

Shundan soʻng tadbir el suygan taniqli estrada yulduzlari ijrosidagi goʻzal kuy-qoʻshiqlar bilan davom etdi.

Ozod va obod Vatanga bayramlar, toʻylar yarashadi. Yurtimizda bayram shukuhi kezib yurgan ushbu pallalarda respublikamizga tashrif buyurgan “Maʼnaviyat karvoni” oʻzi bilan birgalikda oʻzgacha koʻtarinki ruh olib keldi.

Gala kontsertda kuylangan har bir qoʻshiqda Vatan madhi, tinchlik, shukronalik tuygʻulari mujassam boʻldi.

Tuman hokimligining Axborot xizmati.