Sovet qoʻshinlarining Afgʻoniston hududidan olib chiqib ketilganiga 20-yil toʻlgani munosabati bilan 5 nafar urush qatnashchisi yubiley medali bilan taqdirlandi

Yurtimizda mustaqillik bayrami shukuhi kezib yurgan shu kunlarda Amudaryo tumanining Olmazor mahallasi hududidagi Xotira maydonida Belorussiyadan tashrif buyurgan general-mayor Bekniyazov Alik Latitovich Afgʻoniston urushi qatnashchilari bilan uchrashdi.

Uchrashuvda Afgʻon urushi qatnashchilari yoshlik davrlarini eslab, oʻsha davrdagi qiyinchiliklar, halok boʻlgan mard va jasur yigitlar front orti qahramonlari haqida xotirlashdi. Bunday insonlarning yodi hech qachon dillardan oʻchmasligini taʼkidalashdi.

Tumanimizda bunyod etilgan “Xotira maydoni”da Afgʻon urushi qatnashchilarining ruhlari kezib yurgandek boʻladi. Ushbu muqaddas maydondagi “Xotira kitobi”ga Ikkinchi jahon urushi, Afgʻon urushida qatnashgan hamda Oʻzbekiston Respublikasi mustaqilligini himoyalashda halok boʻlgan harbiy xizmatchilarning ismlari zarhal harflar bilan bitilgan.

Darhaqiqat tinchlik yoʻlida jonini fido qilgan oʻgʻlonlarni yodda saqlash, hayot kechirayotganlarini eʼzozlash insoniylik burchidir.

Xotira uchrashuvida ana shunday urush qatnashchilaridan 5 nafari − “Veteran” uyushmasi Amudaryo tumani boʻlimi boshligʻi Bahodir Jumaniyazov, uyushma aʼzolari Rimboy Halillayev, Bozorboy Shomuratov, Ozod Jumaniyazov, Shavkat Saidbayevlar “Afgʻonistondan sovet qoʻshinlari olib chiqilganiga 20-yil” yubiley medali bilan taqdirlandi.

Maʼlumotlarga koʻra, 1979-1989-yillar oraligʻida boʻlib oʻtgan Afgʻon urushida eng koʻp jabr chekkan hududlar Markaziy Osiyo respublikalari boʻldi.

Eng koʻp askar shu hududdagi ittifoqdosh respublikalardan olindi. Jumladan, Oʻzbekistondan 64 500 nafar yigit Afgʻon urushida ishtirok etgan va ulardan 1522 nafari halok boʻlgan. 2500 nafardan oshiqroq oʻzbekistonlik nogiron boʻlgan.

Xususan, Qoraqalpogʻiston Respublikasidan 3580 nafar harbiylar ishtirok etishgan boʻlsa, shundan 89 nafariga vatanimizga qaytib kelish nasib etmagan.

Vatanimiz mustaqillikni qoʻlga kiritgandan soʻng, jangchi-faxriylar, urush nogironlari va halok boʻlgan jangchilarning oila aʼzolarini ijtimoiy jihatdan himoyalash boʻyicha davlat dasturlari izchillik bilan amalga oshirib kelinmoqda.

Uchrashuv davomida jasorat egalarining bugungi dorilomon kunlarga yetib kelish oson boʻlmagani, mustaqillik, hurriyat, tinchlik eng oliy neʼmatlardan biri ekanligi hamda uni asrab-avaylash, qadriga yetish lozimligi haqida aytgan purmaʼno soʻzlari hech qachon oʻz ahamiyatini va dolzarbligini yoʻqotmaydi.

Tuman hokimligining Axborot xizmati.