NAFSIGA ERGAShIB…
Mansab – insonni oʻzgartiradi, uni yo oriyatli, imonli, mard va vijdonli odamga aylantiradi yoki manfaat va nafs quli qilib qoʻyadi. Buni ortiqcha sharh va izohlarsiz ham hammamiz yaxshi bilamiz. Mansabdor shaxs yuqoridagi birinchi toifaga mansub boʻlsa, yaxshi, jamiyatga foyda, yaqinlariga rahmat, olqish keltiradi. Agar ikkinchi toifaga mansub boʻlsa-chi?
Amudaryo tumanidagi maktabgacha taʼlim-tarbiya muassasalaridan birida rahbar sifatida faoliyat olib boruvchi Bahrixon (ism-sharifi oʻzgartirildi) Bahodirova ikkinchi toifaga mansub mansabdor boʻlib chiqdi. Bolalar muassasi direktori, qolaversa, shirindan-shakar farzandlarning onasi boʻlaturib, oʻz mansab vakolatini suiisteʼmol qilib, davlat mulkiga, aslida bolalar haqiga xiyonat qildi. Oʻzi rahbarlik qilayotgan maktabgacha taʼlim tashkilotining ishchilar roʻyxatiga, aniqrogʻi ish haqlari hisoblanadigan tabelga mavsumiy oʻtyoqar sifatida yaqin qarindoshining ism-familiyasini kiritib qoʻydi:
-Kim bilib oʻtiribdi, - oʻyladi u qilayotgan ishining noqonuniy ekanligini bilsa-da, - bor-yoʻgʻi 2-3 oy oʻtib ketadi, hujjatlarni oʻzim ushlab, oʻzim tutsam, kim tekshirib oʻtiribdi.
Ammo Bahrixonning oʻylagani boʻlmadi, davlat mulkining daxlsizligini nazorat qiluvchi tashkilotlar uning “reja”sini chippakka chiqarishdi.
MTTda davlat mulkini talon-taroj qilish bilan bogʻliq huquqbuzarlik toʻgʻrisida Amudaryo tuman prokuraturasiga kelib tushgan arizaga koʻra oʻtkazilgan tekshiruvda Bahri Bahodirova tomonidan OʻzMJtKning tegishli moddalarida nazarda tutilgan huquqbuzarlik holati sodir etilgani, u oʻz mansab vakolatidan foydalanib, 2022-yilning yanvar va fevral oylarida yaqin qarindoshini MTTga oʻtyoqar sifatida mavsumiy ishga qabul qilib, uning nomiga 1 400 000 (bir million toʻrt yuz ming) soʻm miqdorida ish haqi hisoblab, noqonuniy ravishda oʻzi oʻzlashtirib yuborganligi aniqlandi.
Bahri Bahodirova qarshisiga OʻzMJtKning tegishli moddalari boʻyicha maʼmuriy ish ochilib, mazkur ish 2022-yil 4-oktyabr sanasida Jinoyat ishlari boʻyicha Amudaryo tuman sudida koʻrib chiqildi.
Ish boʻyicha javobgar B.Bahodirovaning oʻz qilmishidan pushaymon boʻlib bergan iqrornomasi va guvohlarning koʻrsatmalari atroflicha muhokama etilib, B.Bahodirova OʻzMJtKning tegishli moddalariga asosan maʼmuriy jazoga tortildi va davlatga yetkazgan 1 400 000 soʻm miqdoridagi moddiy zarar B.Bahodirova hisobidan undirib olinib, BHMning 1 (bir) baravari miqdorida (300 000) soʻm jarima jazosiga hukm qilindi.
Xulosa shuki, insonning eng yoqimli doʻsti ham, eng yoqimsiz doʻsti ham nafs, deydilar. Qanchalik yoqimli boʻlmasin, nafs insonni halokat yoqasiga olib boradi va qanchalik yoqimsiz boʻlsa-da ortidan ergashavergan insonni oʻz nafsi quliga aylantiradi va elaro badnom qiladi. Nafs balosidan asrasin, deganlari shu-da.
J.OʻRAZBOYeV, Jinoyat ishlari boʻyicha Amudaryo tuman sudi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
