Ichki ishlar organlari xodimlari kuni keng nishonlandi

Har yili mamlakatimizda 25-oktyabr − Ichki ishlar organlari xodimlari kuni sifatida keng nishonlanib kelinadi. 1991-yil 25-oktyabrda Oʻzbekiston Respublikasi Vazirlar Mahkamasining 270-sonli qarori asosida Oʻzbekiston Respublikasi Ichki ishlar vazirligi tashkil qilingan edi. 2006-yil 6-dekabrda qabul qilingan qonunga muvofiq esa ushbu sana, yaʼni 25-oktyabr Oʻzbekiston Respublikasi Ichki ishlar organlari xodimlari kuni etib belgilandi. Bu yil Oʻzbekiston Respublikasi Ichki ishlar vazirligi tashkil etilganiga 31-yil toʻldi.

Sana munosabati bilan 31-oktyabr kuni Amudaryo tumanidagi “Xon saroy” mehmonxonasida bayram tadbiri boʻlib oʻtdi.

Tadbirda tuman hokimi Sultonboy Yoʻldashev, sektorlar rahbarlari, tuman Ichki ishlar boʻlimi shaxsiy tarkibi, nafaqadagi faxriylar hamda jamoatchilik vakillari ishtirok etishdi.

Tadbirda tuman hokimi Sultonboy Yoʻldashev ichki ishlar tizimida soʻnggi yillarda amalga oshirilgan islohotlar haqida toʻxtalib oʻtdi va oʻz hayotini fuqarolarimizning tinchligi hamda osoyishtaligi, huquq va erkinliklarini ishonchli himoya qilish, jamiyatimizda qonun ustuvorligini taʼminlashdek sharafli va masʼuliyatli ishga bagʻishlab kelayotgan organ xodimlarini, tinglovchi-kursantlarni hamda faxriylarni bayram bilan samimiy muborakbod etdi.

Shuningdek, tadbirda ichki ishlar organlari xodimlarining fidokorona mehnatlarini eʼtirof etlib, ularga chuqur minnatdorlik bildirildi.

Bayram tadbirida tuman Ichki ishlar boʻlimi boshligʻi Jamaladdin Yusupov barcha hamkasblarini bayram bilan samimiy tabriklab, tizimda erishilgan yutuqlar haqida aytib oʻtdi.

Oʻtgan yili qabul qilingan “Ichki ishlar organlarida maʼnaviy-maʼrifiy ishlarni tashkil etish kontseptsiyasi”ning hayotga izchil tatbiq etilishi natijasida soha xodimlarida vatanparvarlik ruhini kuchaytirish, ularning maʼnaviy dunyoqarashini boyitish, muomala madaniyatini yuksaltirish boʻyicha amalga oshirilayotgan tizimli chora-tadbirlar aholi bilan ishlash amaliyotiga ijobiy taʼsir koʻrsatayotgani taʼkidlandi.

Tadbirda 4-sektor rahbari, tuman Davlat soliq inspektsiyasi boshligʻi Aydos Seyitov ham soha xodimlarini kasb bayrami bilan samimiy tabrikladi. El-yurt tinchligi va osoyishtaligi yoʻlida fidokorona mehnat qilayotgan xodimlarning oilalariga tinchlik, xotirjamlik, kelgusi ishlarida zafarlar yor boʻlishini tiladi. Shuningdek, oʻz xizmat vazifasini bajarish chogʻida halok boʻlgan tizim xodimlarining oila aʼzolariga, yaqinlariga marhumlarning oʻz vaqtida yurtimizda osoyishtalikni taʼminlashga qoʻshgan hissalari uchun minnatdorlik bildirib, ularning yodi hamisha qalblarga muhrlanganini aytib oʻtdi.

Tadbir davomida tuman Xalq qabulxonasi boʻlimi midiri, ichki ishlar faxriysi Erkin Rajabov istiqlolimizning ilk davrida tashkil topgan ichki ishlar organlari oʻtgan sinovli yillar davomida mashaqqatli va sharafli yoʻlni bosib oʻtgani hamda xalqimizning chinakam tayanchi va himoyachisi sifatida shakllanganligini gʻurur bilan tilga oldi.

Shuningdek, soha xodimlari oʻz faoliyatini boshlagan dastlabki kunlardan ikkita eng ustuvor masalaga – jamiyatimizda tinchlik va osoyishtalikni saqlash hamda aholi sogʻligʻini muhofaza qilishga alohida eʼtibor qaratib kelayotganligini, alohida taʼkidlandi.

Tadbirda oʻz xizmat vazifasini namunali bajarib, xalqimizning tinchligi va osoyishtaligini taʼminlashga bor kuch-gʻayratini safarbar etib kelayotgan soha xodimlarining bir nechtasiga kapitan, mayor, leytenant unvonlari berildi.

Shuningdek, nafaqadagi xodimlardan Maxsud Oʻrazimbetov, Ikrom Usenov, Amat Saparbayevlar “Oʻzbekiston ichki ishlar faxriysi” koʻkrak nishoni bilan taqdirlandi. Undan tashqari, tadbirda ishtirok etgan soha xodimlari esdalik sovgʻalari bilan taqdirlandi.

Tadbir tuman Madaniyat boʻlimi tomonidan tayyorlangan badiiy chiqishlar bilan davom etdi. Tumanimizning taniqli sanʼatkorlari tomonidan ona Vatan, doʻstlik, muhabbatni tarannum etuvchi goʻzal-kuy qoʻshiqlar yangradi.

Tizimda faoliyat yuritayotgan har bir xodim Vatanimizning asl oʻgʻlonlari sifatida zamonaviy bilimlarni egallagan, maʼnaviy va maʼrifiy dunyosi boy, har qanday xavf-xatarga qarshi matonat bilan kurashishga tayyor xalqimizning chin maʼnodagi himoyachilaridir.

Ularni yana bir bor kasb bayramlari bilan tabriklab, kelgusi ishlarida zafarlar tilaymiz!

Tuman hokimligining Axborot xizmati.