TUMAN BOʻYIChA 12 MINGDAN ORTIQ XONADONLAR SUYuLTIRILGAN GAZ BILAN UZLUKSIZ TAʼMINLANMOQDA

Mamlakatimizda xalq farovonligini taʼminlash, xizmat koʻrsatish sohasini zamon talablari darajasiga koʻtarish va aholi hayotiga oid maishiy muammolarni tizimli ravishda hal etishga qaratilgan chora-tadbirlar tufayli eng chekka qishloqlarda yashovchi aholi uchun ham zarur shart-sharoitlar yaratilmoqda. Ayniqsa, aholini suyultirilgan gaz bilan taʼminlash maqsadida mamlakat miqyosida sezilarli yutuqlarga erishilmoqda.

Oʻzbekiston Respublikasi Prezidentining “Raqamli Oʻzbekiston – 2030” strategiyasini tasdiqlash va uni samarali amalga oshirish chora-tadbirlari toʻgʻrisida”gi Farmoni ijrosini taʼminlash maqsadida hududlarda suyultirilgan gazni tarqatishda “E-gaz Billing” dasturi joriy qilingani bu boradagi ishlarning shaffofligini taʼminlash imkonini bermoqda.

Ayni paytda Amudaryo tumani boʻyicha 24 ming 993 ta xonadon mavjud boʻlib, shundan 12 ming 46 ta xonadon tabiiy gaz yetishmasligi sababli suyultirilgan gaz ballonlaridan foydalanadi.

Ushbu vaziyatdan kelib chiqib, tabiiy gaz yetib bormaydigan barcha xonadonlarga ID kartalari tarqatilmoqda. Suyultirilgan gazdan foydalanuvchi xonadonlar uchun 27 ming 982 ta gaz ballonlari “Amudaryotumangaz” gaz taʼminoti filiali tomonidan ijaraga berilgan.

Shuningdek, aholining oʻz mablagʻi hisobidan aylanmadagi gaz ballonlari qatoriga qoʻshilgan 12 ming 19 ta gaz ballonlari bosimga qarshi sinovdan oʻtkazilib, yorliqlar yopishtirilgan va raqamlashtirilgan. Natijada 2021-yilning 1-iyun sanasidan boshlab suyultirilgan gaz ballonlari ID kartalar orqali tarqatilmoqda.

“Amudaryotumangaz” gaz taʼminot filialiga qarashli Xolimbeg servis markazi 3 ming 802 ta, Kuyuk koʻpir shoxobchasi 3 ming 279 ta, Qipchoq ovulidagi shoxobcha 2 ming 384 ta, filialning markaziy omborxonasi 1 ming 277 ta xonadonga xizmat koʻrsatadi.

Shuningdek, filial tasarrufidagi Oq oltin shoxobchasi 1 ming 588 ta, Qangli ovulidagi shoxobcha 1 ming 404 ta, Boʻzyop ovulidagi shoxobcha 1 ming 30 ta, Doʻrman ovulidagi shoxobcha 750 ta xonadonga sifatli xizmat koʻrsatib kelmoqda. Mazkur shoxobchalarda aylanmadagi ijara gaz ballonlarining yaroqlilik muddatlarini aniqlash, bosimga qarshi sinash, gaz ballonlarini taʼmirlash ishlari oʻz vaqtida bajarilgani bois, isteʼmolchilarni suyultirilgan gaz bilan taʼminlashda uzilishlar sodir boʻlmayotganidan aholi mamnun.

Aholini suyultirilgan gaz bilan taʼminlash sifatini yanada yaxshilash maqsadida tumanda 2014-yilda Amudaryo gaz tarqatish punkti qurilib, ishga tushirilgani ayni muddao boʻldi.

Filial tasarrufidagi shoxobchalarga uzoq boʻlgan eng chekka qishloqlar, xususan, Tosh qalʼa, Yuqori qishloq, Besh ovul, Xizr eli mahallalari, Jumurtov shaharchasi, Choykoʻl, Bobur, Toʻlqin, Nazarxon ovullari hamda Tor yop, Qoramon, Bosuv, Bogʻ, Arna boʻyi mahallalarida yashovchi isteʼmolchilarga suyultirilgan gaz ballonlari ISUZU rusumli avtomashinalar orqali yetkazib berilmoqda.

Tumandagi 38 ta maktabgacha taʼlim tashkilotlarida ham suyultirilgan gaz ballonlaridan foydalaniladi. Mazkur MTTlarda suyultirilgan gazga boʻlgan ehtiyoj yuqoriligi uchun taʼminotda uzviylikni taʼminlashga alohida eʼtibor qaratilmoqda. Natijada 38 ta maktabgacha taʼlim tashkilotlari oʻz vaqtida suyultirilgan gaz bilan taʼminlanib kelinmoqda.

Joriy 2022-yilning 9-noyabr holatiga belgilangan limitdan salkam 54 tonna ziyod, yaʼni 3 ming 484 tonna suyultirilgan gaz olib kelinib, isteʼmolchilarga tarqatildi. Shu bilan birga “Amudaryotumangaz” gaz taʼminot boʻlimi tomonidan 28 ming 422 ta yangi maishiy gaz ballonlari ijaraga berilgan boʻlib, 2022-yilning birinchi yarmida yana 440 ta yangi maishiy gaz ballonlari ijaraga tarqatildi.

Koʻrilayotgan chora-tadbirlar natijasida suyultirilgan gaz ballonlaridan foydalanuvchi isteʼmolchilarga servis xizmati koʻrsatishda uzviylik taʼminlanib, aholining bu boradagi ehtiyoji toʻla qondirilmoqda.

N.XALIMBETOV, “Amudaryotumangaz” gaz taʼminoti boʻlimi boshligʻi.