XALQ DARDI BILAN YaShASh BAXTI

Mamlakatimizda faoliyat yuritayotgan Oʻzbekiston ekologik partiyasi jamiyatimiz ijtimoiy-siyosiy hayotida oʻz oʻrniga ega. Chunki aholining ekologik madaniyatini oshirish, ular koʻnglida tabiat musaffoligini saqlashga masʼuliyat hissini tarbiyalash dolzarb ahamiyatga ega.

Ekologik barqarorlikni taʼminlash, bu boradagi muammolarga jamoatchilik eʼtiborini qaratish va salbiy oqibatlarning oldini olishda Oʻzbekiston ekologik partiyasi aʼzolarining hissasi ulkan.

Partiya aʼzosi, xalq deputatlari Amudaryo tuman Kengashi deputati, ayni paytda Qilichboy ovul fuqarolar yigʻini raisi boʻlib ishlayotgan Bahrom Qodirov partiya dasturlarini hayotga tatbiq etishda faol ishtirok etmoqda. Oliy maʼlumotli, mutaxassisligi muxandis-mexanik boʻlgan qahramonimiz oliygohni tugatgach, Mangʻit ishlab chiqarish – tejorat markazida, Qilichboy xoʻjaligi yonilgʻi quyish shohobchasida, sobiq 41-sonli kasb-hunar texnika bilim yurtida direktor oʻrinbosari vazifalarida ishladi. Keyinchalik Amudaryo maishiy xizmat koʻrsatish kasb-hunar kollejida direktor oʻrinbosari, Qilichboy ovul fuqarolar yigʻini raisi, Amudaryo maishiy xizmat koʻrsatish kasb-hunar kolleji direktori lavozimlarida faoliyat yuritdi. 2019-yildan hozirgi davrgacha Qilichboy ovul fuqarolar yigʻini raisi sifatida faoliyat olib borib, ovul aholisining turmushi sifatini oshirish, farvonligini taʼminlash, hududda milliy urf-odatlarimiz, qadriyatlarimizni yoshlar qalbiga singdirish, odobli, el xizmatiga kamarbasta oʻgʻil-qizlarni kamolga yetkazish ishlariga munosib hissa qoʻshib kelayotir.

Ushbu hudud aholisi mehnatsevar, dehqonchilikda oʻziga xos tajriba va malakaga ega ekanligini inobatga olib, oqsoqol ularga tadbirkorlik, dehqonchilik qilishlari uchun munosib sharoitlar yaratishga intiladi. Yigʻin tavsiyasiga koʻra aholiga dehqonchilik qilishlari, chorvachilik bilan shugʻullanishlari uchun imtiyozli kreditlar ajratilayapti, mini texnologiyalar sotib olishlariga yordam berilayapti.

Xalq hurmat-eʼtiborini qozongan Bahrom Qodirov 2020-yilda xalq deputatlari tuman Kengashiga Qilichboy saylov okrugidan deputat boʻlib saylandi.

U xalq vakili sifatida hudud aholisining mamlakatimizda kechayotgan ijtimoiy siyosiy jarayonlar, yangilanishlar, yuksalishlarga daxldorligini oshirish, barcha jabhalarda amalga oshirilayotgan islohotlarda faol ishtirok etishlarini targʻib qilish maqsadida tez-tez uchrashuvlar oʻtkazib turadi. Uchrashuvlar jarayonida aholi turmushidagi aniqlangan muammolarni ijobiy hal qilish uchun tinmay harakat qiladi.

Joriy yilda ana shunday xalq bilan jonli muloqotlar davrida bildirilgan murojaatlarga muvofiq Xizr eli mahallasida aholi tomorqa yerlarini oqar suv bilan taʼminlash yaxshilandi, shu mahalla hududidagi transformator koʻchirildi, Tozayop, Olmazor aholi punktlariga yangi transformator oʻrnatildi, Oftob, Bahouddin Naqshband koʻchalari yoʻli taʼmirlandi.

Bahrom Qodirov oʻz saylov okrugi hududida obodonlashtirish, koʻkalamzorlashtirish ishlariga ham alohida eʼtibor qaratadi. Yashil hududlarga, yoʻllar boʻylariga, hovli-joylar atroflariga mevali, manzarli daraxtlar, gullar koʻchatlari ekilishiga bosh boʻladi. Kam taʼminlangan oilalarga korxona, tashkilotlar atroflariga ekish uchun oʻz hisobidan turli koʻchatlar yetkazib berib, parvarishlanishini nazorat qilib boradi.

Ijtimoiy himoyaga muhtoj aholi qoʻllab-quvvatlanayotgani Bahrom Qodirovning el oqsoqoli sifatidagi, deputat sifatidagi nufuzini, obroʻsini oshirayapti. Ha, xalq dardi bilan yashagan inson haqli ravishda halqning olqishini oladi. Bu – ulkan baxtdir.

Oygul RAJABOVA.