Elektron navbatga yozilish tartibi va uning ahamiyati

Jismoniy va yuridik shaxslar notarial idoralarga quyidagi shakllarda oʻzlari uchun qulay vaqtda murojaat qilishlari mumkin: notarial idoraga bevosita kelib yoki telefon orqali, yozma va elektron shaklda, Oʻzbekiston Respublikasi Yagona interaktiv davlat xizmatlari portali yoki «Ye-notarius.uz» axborot portali orqali. Elektron shakldagi murojaatlar esa, «Notarius» axborot tizimida alohida tartibda yuritiladi.

Fuqarolar  «Ye-notarius.uz» axborot portalidan notariuslar haqida maʼlumot olishlari mumkin. Shuningdek axborot portalida notarial harakatlarni amalga oshirish uchun hujjatlarning roʻyxati, toʻlovlar boʻyicha elektron kalkulyatordan foydalanish imkoniyati mavjud.

Oʻzbekiston Respublikasi Yagona interaktiv davlat xizmatlari portali orqali murojaat qilinganda  fuqaroda elektron raqamli imzo boʻlishi zarur. Elektron raqamli imzo olish uchun Davlat xizmatlari markaziga murojaat qilinadi.

Murojaat qiluvchilarning axborotkommunikatsiya texnologiyalari orqali notarius qabuliga yozilish boʻyicha yoʻllangan arizalari elektron roʻyxatda avtomatik tarzda qayd qilinadi. Murojaatlar  elektron raqamli imzo bilan tasdiqlangan boʻlishi lozim.

Murojaat boʻyicha notarial harakat rasmiylashtirilishi uchun zarur boʻlgan hujjatlar loyihalari notarial idora tomonidan belgilangan vaqtda oldindan tayyorlab qoʻyiladi.

Murojaat qiluvchi belgilangan vaqtda notarius qabulida hozir boʻlishi shart. Mazkur talab bajarilmaganda qabul qilish umumiy asoslarda yoki qabul vaqtini qaytadan belgilash orqali amalga oshiriladi. Boshqa shaxs foydasi uchun belgilangan vaqtdan voz kechishga yoʻl qoʻyilmaydi.

Notarius qabuliga oldindan yozilish bu - notarial idorada navbat kutib ortiqcha vaqt yoʻqotish va asabbuzarlikning oldini oladi. Shuningdek, notariusga elektron murojaat qilishning ahamiyatli jihati notarial harakatni tez va sifatli, ortiqcha ovoragarchiliklarsiz amalga oshirish imkonini beradi.

B.Xodjametov,

Amudaryo tumanida xususiy amaliyot bilan shugʻullanuvchi notarius.