Mahalla va nuroniylarni qoʻllab-quvvatlash boʻlimi tomonidan nuroniylarni qoʻllab-quvvatlash borasida amalga oshirilayotgan ishlar boʻyicha ochiq muloqot boʻlib oʻtdi

2022-yil 25-noyabr kuni Amudaryo tumani hokimligining Axborot xizmati tomonidan Mahalla va nuroniylarni qoʻllab-quvvatlash boʻlimi binosida navbatdagi ochiq muloqot oʻtkazildi.

Unda tuman hokimligining Axborot xizmati rahbari Fotima Eshimbetova, Mahalla va nuroniylarni qoʻllab-quvvatlash boʻlimi boshligʻi oʻrinbosari, “Nuroniylar” jamoatchilik Kengashi raisi Baxadir Baltabayev, “Nuroniylar” jamoatchilik Kengashi raisi oʻrinbosari Bekman Allaberganov, faxriy jurnalist Xonimjon Rajabova hamda mahalla raislari, boʻlim mutaxassislari, ommaviy axborot vositalari vakillari ishtirok etdilar.

Ochiq muloqotni tuman hokimligining Axborot xizmati rahbari Fotima Eshimbetova ochdi va olib bordi.

Muloqot davomida boʻlim tomonidan 2022-yilning mart oyidan shu davrga qadar amalga oshirilgan ishlar sarhisob qilindi.

Taʼkidlanganidek, ijtimoiy himoyaga muhtoj, yakka-yu yolgʻiz, oʻzgalar qaramogʻiga muhtoj keksalar holidan doimiy ravishda xabar olinmoqda. Shuningdek, uyi taʼmirtalab ahvolga kelib qolgan nuroniylarning uylari taʼmirlab berilmoqda. Undan tashqari, ijtimoiy himoyaga muhtoj keksalarning salomatligini tiklashlari uchun bepul dori-darmonlar, tibbiy xizmatlar tashkil etilmoqda.

Ayniqsa, oktyabr oyining birinchi haftasi “Keksalar haftaligi”da nuroniylarga boʻlgan eʼtibor har qachongidan ham kuchaydi. Tumandagi Madaniyat markazlari hamda “Sahovat” va “Muruvvat” uylarida madaniy-maʼrifiy tadbirlar tashkil etildi. Nuroniylar “Uch avlod uchrashuvlari”, “Salomatlik uchun 5 ming qadam” tadbirlariga jalb qilindi.

Noyabr oyining “Keksalar uchun turizm oyligi” deb eʼlon qilinishi esa nuroniylarga boʻlgan eʼtibor va gʻamxoʻrlikning yana bir amaliy isboti boʻldi. Oylik boshlanganidan shu kunga qadar 6 ming 540 nafar nuroniylar chuqurlashtirilgan tibbiy koʻrikdan oʻtkazildi. 3 ming 851 nafar nuroniylar Toshkent, Samarqand, Buxoro, Xiva hamda Respublikamizning soʻlim goʻshalariga, muqaddas qadamjolariga, muzeylarga sayohatga olib borildi. Shuningdek, tumanda oʻzgalar parvarishiga muhtoj boʻlgan 36 nafar keksalarning uylarida hasharlar oʻtkazildi.

Faxriy jurnalist Xonimjon Rajabova keksalarni eʼzozlash, ularga mehr-muruvvat koʻrsatish tushunchasining mazmun-mohiyati oʻzining yoshlik davrlaridagi koʻz-qarashlardan mutlaqo farq qilishini, ushbu tushuncha kundan kunga tobora sayqallanib, mukammallashib borayotganligini aytib oʻtdi.

“Nuroniylar” jamoatchilik Kengashi raisi oʻrinbosari Bekman Allaberganov keksalarni eʼzozlash, ularga hurmat koʻrsatish muqaddas dinimizda ham oʻz aksini topganligini aytib keksalarga hurmat bajo keltirish savobi ulugʻ amallardan biri ekanligini taʼkidladi.

Ochiq muloqot davomida jurnalistlar Mahalla va nuroniylarni qoʻllab-quvvatlash boʻlimi faoliyati natijadorligiga doir savollar bilan murojaat qilib, tegishli javoblar oldilar.

Shuning bilan ochiq muloqot oʻz yakuniga yetdi.

Tuman hokimligining Axborot xizmati.