BOBUR NOMLI OVULDA “KEKSALAR UChUN TURIZM OYLIGI” DOIRASIDAGI TADBIRLAR OʻTKAZILDI

Amudaryo tumanida “Keksalar uchun turizm oyligi” doirasidagi tadbirlar qizgʻin tarzda oʻtkazilib, barcha hududlarda nuroniy otaxon va onaxonlarga alohida hurmat va ehtirom koʻrsatildi. Keksalarni qoʻllab-quvvatlash, ularning vaqtini mazmunli tashkil etish maqsadida sogʻlomlashtirish mashgʻulotlari, sport musobaqalari, turli uchrashuv va davra suhbatlari, yurtimizdagi diqqatga sazovor, tarixiy maskanlarga sayohatlar tashkil etildi.

Shu yil 28-noyabr kuni barcha hududlarda boʻlgani kabi Amudaryo tumanining Bobur nomli ovulida ham keksa avlod vakillari ishtirokida katta tadbirlar tashkil etildi.

Dastlab tadbirga tashrif buyurgan barcha mehmonlar fuqarolar yigʻini binosi oldida ovuldagi 83-sonli maktab oʻquvchilarining qoʻl mehnati namunalaridan tayyorlangan koʻrgazmani tomosha qildilar va yoshlarning hunar egallash borasidagi mahoratlariga munosib baho berdilar. Tadbirlar davomida fuqarolar yigʻini raisi Gulbahor Raimova boshchiligida yigʻin masʼullari, ovulning nuroniy otaxon va onaxonlari “Yashil makon” umummilliy loyihasi doirasida hududda yaratilgan bogʻda 300 dona turli mevali va manzarali daraxtlar koʻchatlarini oʻtqazishdi. Ovuldagi dehqonchilik boʻyicha katta tajribaga ega boʻlgan nuroniylar yoshlarga koʻchat ekish, bogʻ yaratish boʻyicha maslahatlar va tavsiyalar ham berdilar.

Shundan keyin yigʻin binosi oldidan “Salomatlik uchun 5000 qadam” shiori ostida piyoda yurish marafoni boshlandi. Ovul keksalari piyoda yurish davomida jismoniy faollik, toʻgʻri ovqatlanish tartibiga rioya etishning afzalliklari xususida suhbatlashdilar, bu boradagi foydali maslahatlarni bir-birlari bilan baham koʻrdilar.

Marafondan soʻng, tadbir ishtirokchilari boʻlgan keksalar ovul hududida yangidan barpo etilgan sport maydonchasida sogʻlomlashtirish mashqlarini bajarishdi. Mashgʻulotlar davomida “Besh tashabbus” musobaqalarining 1-mavsumida ishtirok etgan ovulning iqtidorli yoshlaridan Umida Ibragimova shashka boʻyicha Oʻzbekistonda 2-oʻrin sohibasi boʻlib, hududga sport maydonchasini qurish uchun 7 mln. soʻmlik sertifikatni qoʻlga kiritgani alohida taʼkidlab oʻtildi. Mazkur sport maydonchasi qisqa fursat ichida ushbu mablagʻ evaziga qurilib, foydalanishga topshirilgani ham faxr bilan eʼtirof etildi. Shuningdek, ovulda tumanimiz sharafini munosib himoya qiladigan yoshlar koʻpayishi uchun yanada koʻproq imkoniyat yaratilgani taʼkidlandi.

Oylik doirasidagi tadbirlar ovul hududidagi “Jasurbek” kafesida davom ettirilib, nuroniylar ishtirokida “Uch avlod uchrashuvi” tashkil etildi. Ushbu uchrashuvda ovuldagi faxriy oʻqituvchilar Malika Shukurullayeva, Guloyim Hayitboyeva, faol ayol Gulora Qutlimurodovalar oʻrta va yosh avlodga oʻzlari ishlab oʻtgan davr muhiti, qiyinchiliklari, sharoitlari haqida gapirib, Yangi Oʻzbekistonimizda ishlash, tadbirkorlik qilish, oʻqish istagidagi har bir insonga yaratilayotgan imkoniyatlarga havas qilishlari, ushbu imkoniyatlar qadriga yetish va ulardan unumli foydalanish zarurligini aytib oʻtdilar. Qizgʻin suhbatlardan ibrat olgan ovul yoshlari ham oʻzlarining bugungi kundagi yutuqlari toʻgʻrisida soʻzlashdi. Uchrashuv yakunida barcha nuroniylarga sovgʻalar topshirildi.

Tushlik mahali kafeda ochiq dasturxon atrofida davom etgan tadbirga ovuldagi Bobur nomli madaniyat markazining “Yosh havaskorlar” toʻgaragi aʼzolari ijrosidagi joʻshqin kuy-qoʻshiqlar yanada fayz kiritdi. Milliy taom – osh tanovul qilinganidan soʻng, yoshu-qari ishtirokchilar davrani oʻyin-kulgular bilan davom ettirishdi.

Shu kuni fuqarolar yigʻini raisi Gulbahor Raimova, hokim yordamchisi Alisher Yoʻldoshev hamda tuman Mahalla va nuroniylarni qoʻllab quvvatlash boʻlimi masʼullari Bahodir Boltaboyev, Bekman ota Allaberganovlar kasal yotgan onaxon, taʼlim sohasi faxriysi Xadicha Avazmurodova hamda 80 yoshdan oshgan onaxon Tojigul Matsafoyevalar xonadoniga borib, ularning holidan xabar olishdi. Onaxonlar oʻzlariga koʻrsatilgan bunday eʼtibordan nihoyatda mamnun boʻlib, minnatdorchilik bildirdilar.

Bobur nomli ovulda “Keksalar uchun turizm oyligi” doirasida oʻtkazilgan tadbirlar ishtirokchilarda unutilmas taassurotlar qoldirdi.

Ozoda Xudoyberganova.