Tosh yop ovulida Qoraqalpogʻiston Respublikasi 4-sektori rahbariyatining sayyor qabuli oʻtkazildi

Tosh yop ovulida Qoraqalpogʻiston Respublikasi Davlat soliq boshqarmasi boshligʻi oʻrinbosari Umirbek Aliyev hamda tuman 4-sektor rahbari, tuman Davlat soliq inspektsiyasi boshligʻi Aydos Seitovlarning sayyor qabuli oʻtkazildi.

9-dekabr kuni ovul fuqarolar yigʻini binosida oʻtkazilgan sayyor qabulda Prezidentning tumandagi Xalq qabulxonasi mudiri Erkin Rajabov, yigʻin raisi Gulshod Sobirova, xotin-qizlar faoli, yoshlar yetakchisi va boshqa tegishli tashkilotlar masʼullari ishtirok etishdi.

Sayyor qabulda Qoraqalpogʻiston Respublikasi Davlat soliq boshqarmasi boshligʻi oʻrinbosari Umirbek Aliyev dastlab yurtimizda hududlarni ijtimoiy-iqtisodiy rivojlantirish, aholi murojaatlarni joyida oʻrganish va hal etish, turmush tarzi yaxshilanishiga koʻmaklashish kabilar borasida yoʻlga qoʻyilgan amaliy ishlar xususida soʻzladi. Shuningdek, yaratilayotgan soliq imtiyozlari, tadbirkorlarni qoʻllab-quvvatlash borasidagi chora-tadbirlarga ham toʻxtalib oʻtdi. Shundan soʻng, qabulga kelgan Tosh yop ovuli fuqarolarining murojaatlari tinglandi.

Murojaatlarning aksariyati moddiy yordam, pensiya, bolalar nafaqasi, ishga joylashish, bank-moliya, soliqqa tortish, tabiiy gaz, elektr energiyasi, ichimlik suvi taʼminotidagi muammolar, sogʻliqni saqlash, obodonlashtirish, yoʻllarni taʼmirlash kabilarga oid boʻldi.

Jumladan, ovul fuqarosi Qurbonoy Vapayeva boquvchisi yoʻq boʻlganligi sababli yer soligʻini toʻlay olmayotganini aytib, yordam soʻradi. Shuningdek, Ramila Duysenboyeva hududda gaz bosimi pastligi, oqava suv kelishi toʻxtagani sababli tomorqasini sugʻora olmayotgani, Muborak Yusupova ham boquvchisi boʻlmagani tufayli “Ayollar daftari”da roʻyxatda turishini, sharoiti ogʻir boʻlgani sababli uyini taʼmirlashga koʻmaklashishni soʻrab murojaat qildi. Ovulda yashovchi Nasiba Kamolova boshlangʻich taʼlim yoʻnalishini bitirganligi, hozirda ish topishga qiynalayotganini, Sarvar Abduraimov otasi kasal yotgani, oʻzi hech qayerda ishlamasligi, hozirgi kunda ishsiz boʻlgan ukasiga ish topishda amaliy yordam berishni soʻrab murojaat qildilar. Ushbu murojaatlar boʻyicha atroflicha oʻrganilib, batafsil tushuntirishlar berildi va masʼullarga ijobiy hal qilish topshirildi.

Taʼkidlash joizki, davlat va jamiyat oʻrtasidagi aloqalarni mustahkamlaydigan mazkur sayyor qabullar, xalq bilan yuzma-yuz muloqot uslubi aholining ishonchini oqlamoqda. Ularga kamarbasta boʻlib ogʻirini yengil qilmoqda. Bu esa har bir insonning bugunidan rozi, ertangi kunidan katta orzular bilan yashashga undamoqda.

Shu kuni “Yoshlar daftari”da roʻyxatda turgan Asaloy Toʻliboyevaga murojaatiga koʻra tikuv mashinasi berildi va tikuvchilikni tashkil qilish orqali oʻzini oʻzi band qilishiga koʻmaklashildi. Undan tashqari, qabulga kelgan ovul fuqarolari Fazilat Yoʻldosheva kreditga tikuv mashinasi olishda yordam soʻrab qilgan murojaati ijobiy hal qilingani, Zulxumor Qoʻchqorova ham murojaatiga koʻra yordam berilganidan soʻng, tadbirkorlikni boshlagani, hozirgi kunda oʻzini oʻzi band qilgani va oilasiga daromad keltirayotganini aytib, alohida minnatdorchilik bildirdilar.

Maʼlumki, ijtimoiy himoyaga muhtoj va kam taʼminlangan oilalar holidan xabar olish va ularga koʻmak koʻrsatish har bir sayyor qabulda eʼtibor qaratiladigan asosiy omil hisoblanadi. Sayyor qabuldan soʻng, shuni inobatga olgan holda Qoraqalpogʻiston Respublikasi Davlat soliq boshqarmasi boshligʻi oʻrinbosari Umirbek Aliyev, sektor rahbari, tuman Davlat soliq inspektsiyasi boshligʻi Aydos Seitov hamda fuqarolar yigʻini masʼullari ovuldagi kam taʼminlangan oilalar holidan xabar olishdi va ularning xonadonidagi sharoitlar bilan tanishib chiqishdi. Ushbu oilalarga oziq-ovqat mahsulotlari ham berildi.

O.Xudoyberganova.