TARAQQIYoTGA MAShAQQATLI VA JASORATLI MEHNAT ORQALI ERIShILADI

2017-yil dekabridan beri har yili davlatimiz rahbarining Oliy Majlisga Murojaatnoma  yoʻllashi anʼanaga aylandi. Joriy yilning 20-dekabrida Prezident Shavkat Mirziyoyevning Oliy Majlis va Oʻzbekiston xalqiga navbatdagi Murojaatnomasini butun yurtimiz Fuqarolari qatori men ham ulkan qiziqish va hayajon bilan tingladim.

Murojaatnomada bildirilganidek, sohalarda amalga oshirilayotgan islohotlar tufayli yalpi ichki mahsulot hajmi ilk bor 80 mlrd. dollardan oshgan. Eksport esa 19 milliard dollarga yetgan.

Soha mutaxassisi sifatida bunda qishloq xoʻjalik mahsulotlari muhim oʻrin tutadi, deb ishonch bilan ayta olaman. Keyingi yillarda ishsiz  yoshlarga, ayollarga qishloq xoʻjaligida foydalanilib kelinayotgan ekin maydonlari uzoq muddatga ijara  berilib, eksportbop mahsulotlar, mevalar yetishtirishiga keng yoʻl ochilayotgani samarasi bu.

Oʻtgan yili mamlakat boʻyicha 100 ming gektar, tumanimiz boʻyicha 846 gektar yer fuqarolarga tanlov asosida boʻlib berilib, bandligi taʼminlangan edi. Bu tumanimiz xalqi dasturxoni toʻkin boʻlishiga zamin boʻldi, desak adashmagan boʻlamiz. Ayniqsa, dehqonlarga urugʻliklar yetkazib berilib, yerlarni ekishda yordam koʻrsatilayotgani ularga juda qulaylik boʻldi.

Kelgusi 2023-yilda ham respublika boʻyicha suv taʼminoti yaxshi boʻlgan yana 100 ming  gektar qoʻshimcha ekin maydonlari aholiga  ajratilishini eshitib, juda quvondim. Bu qishloqlarda yashayotgan 1 mln.dan ziyod aholining  bandligi taʼminlanib, daromadga ega boʻlishiga erishiladi, degan soʻzdir.

Muhimi, bizning xalqimiz mehnatkash, koʻngli oq, intiluvchan. Ular ertangi kunini oʻz mehnatlari bilan obod, farovon etish uchun astoydil intilaveradilar.

Yurtboshimiz taʼkidlaganlariday, “Taraqqiyotga – faqat mashaqqatli va jasoratli mehnat orqali erishiladi”.

Javlon RAJABOV, tuman Fermer, dehqon xoʻjaliklari va

tomorqa yer egalari Kengashi agronomi.