Amudaryo tumanida Vatan himoyachilari kuni keng tarzda nishonlandi

Vatan himoyachilari kuni va Oʻzbekiston Respublikasi qurolli kuchlari tashkil etilganining 31-yilllik bayrami mamlakatimizning barcha hududlari boʻlgani singari Amudaryo tumanida ham keng tarzda nishonlandi. 13-yanvar kuni tuman Madaniyat boʻlimi binosida Vatan posbonlari sharafiga bayram tadbiri tashkil etildi.

Tadbirda tuman hokimi Sultonboy Yoʻldashev, sektorlar rahbarlari, Mudofaa ishlari boʻlimi, harbiy qismlar masʼullari, maktablardagi harbiy chaqiriqqa tayyorgarlik rahbarlari, harbiy xizmatchilar va askar onalari, yoshlar hamda keng jamoatchilik vakillari ishtirok etishdi.

Tadbir avvalida Oʻzbekiston va Qoraqalpogʻiston Respublikalarining madhiyalari yangradi. Sahnadagi monitorda Oʻzbekiston Respublikasi Qurolli Kuchlarining faoliyati, zobit va askarlarning yurtimiz sarhadlarini qoʻriqlash jarayonidagi jasorat va qahramonliklari aks ettirildi.

Shundan soʻng, tuman hokimi Sultonboy Yoʻldashev soʻzga chiqib, Vatan himoyachilarini bayram bilan tabrikladi. Tuman hokimi oʻz nutqida yurtimizda ofitserlar va serjant kadrlarni tayyorlash hamda malakasini oshirishning zamonaviy talablarga javob beradigan samarali tizimi yaratilganini, harbiy xizmatni oʻzining kasbi, Vatan va xalq oldidagi muqaddas burchi deb bilgan oʻgʻlonlarimizni sharaflash, ularga ehtirom koʻrsatish barcha uchun ham qarz, ham farz ekanligini taʼkidlab oʻtdi. Qolaversa, yoshlarni uzluksiz harbiy taʼlimga jalb qilish borasida tizimli ishlar yoʻlga qoʻyilgani, birgina 2022-yilda 9 nafar tumanimiz yoshlari Oliy harbiy taʼlim muassasalariga, 8 nafar yoshlarimiz esa “Temurbeklar maktabi” harbiy-akademik litseylariga oʻqishga qabul qilingani eʼtirof etilib, ular ham kelgusida eng namunali Vatan himoyachilari boʻlib yetishishlariga ishonch bildirildi.

Tantanali bayram tadbirida tuman Mudofaa ishlari boʻlimiga hamda tumanimiz hududidagi Davlat xavfsizlik xizmati Chegara qoʻshinlari harbiy qismlarida xizmat burchini oʻtayotgan Milliy Armiya zobitlariga, harbiy hizmatchilarga Amudaryo tumani hokimining tashakkurnomalari taqdim etilib, esdalik sovgʻalari topshirildi.

Tadbirda Amudaryo tumani Mudofaa ishlari boʻlimi boshligʻi Sherzod Muradov hamda namunali askar Otabek Mahmudovlar soʻzga chiqib, mustaqillik yillarida yurtimizda davom etayotgan moddiy va maʼnaviy taraqqiyot asosida tinchlikni saqlash, iqtisodiyotni rivojlantirish va xalqimiz turmush darajasini yanada yuksaltirish borasida ulkan natijalarga erishilgani va bu taraqqiyotning birdan-bir omili – Vatandagi barqaror tinchlik ekanligini taʼkidlab, tinchlik himoyachilari, ona Vatan posbonlarining beqiyos katta xizmati, matonat va jasoratini alohida eʼtirof etishdi.

Oddiy askar Otabek Mahmudov Oʻzbekiston Respublikasi Armiyasi safida xizmat qilish oʻzi va safdoshlari uchun ulkan sharaf ekanligini, ona vatan sarhadlarini qoʻriqlash, uni har qanday yovuz kuchlardan himoya qilish har bir oʻgʻlonning muqaddas burchi ekanligini taʼkidladi.

Bayram tadbirining rasmiy tantanali qismidan soʻng, tuman madaniyat boʻlimi sanʼatkorlari tomonidan tayyorlangan katta kontsert dasturi namoyish etildi.

Sanʼatkorlarning chiqishidan oldin tinchlik, osoyishtalik posbonlari – Vatan himoyachilarini sharaflovchi sheʼrlar oʻqildi. Dilrabo kuy-qoʻshiqlar yangrab, jozibali raqslar ijro etildi.

Tadbirda tuman Madaniyat boʻlimi sanʼatkorlari tomonidan ijro etilgan “Vatan posbonlari” qoʻshigʻi barchannig qalbida Vatanparvarlik tuygʻularini yanada joʻshqinlantirdi.

Tuman hokimligining Axborot xizmati.